चिनियाँ जनकंग्रेसका अध्यक्ष लीको भ्रमणमा संसदीय सहकार्यका सम्झौता हुँदै
काठमाडौँ — नेपाल र चीनबीचमा संसदीय तहमा सहकार्य गर्ने गृहकार्य भएको छ । द्विपक्षीय वार्ताका दौरान नेपालको संघीय संसद र चीनको राष्ट्रिय जनकंग्रेस बीचमा द्विपक्षीय सहकार्य र भ्रमण आदान–प्रदान सम्बन्धमा सम्झौता हुने गृहकार्य भइरहेको संसद सचिवालयका एक पदाधिकारीले जानकारी दिए ।
चिनियाँ कम्युनिष्ट पार्टी (सीपीसी) स्थायी समितिको राष्ट्रिय जनकंग्रेस अध्यक्ष ली चान्सको भ्रमणका दौरान सोमबार बेलुकी नेपाली पक्षसँग संसदीय सहकार्य र सांसदहरुको भ्रमण आदान–प्रदानको लागि सम्झौता हुन लागेको संसद सचिवालयले जनाएको छ ।
अध्यक्ष लीको सोमबार दिउँसो करिब साढे ३ बजे एक सय जनाको उच्चस्तरीय टोलीसहित काठमाडौंमा उत्रँदै छन् । अध्यक्ष ली चिनियाँ राष्ट्रपति सी चिनफिङका विश्वास पात्र मानिन्छन् । नेपालमा पछिल्लो समय आफ्नो चासो बढाइरहेको चीनको अध्यक्ष लीको टोलीमा ६ मन्त्रीस्तरका नेतासहित विशेष विमानमा नेपाल आउन लागेको परराष्ट्र स्रोतले बतायो । लीको सुरक्षाको लागि सरकारले विशेष व्यवस्था समेत मिलाएको छ ।
राष्ट्रपति सीले सीपीसीको २० औं जनकंग्रेस अघि आफ्नो नजिकका मित्र लीलाई नेपाल भ्रमणमा पठाएका हुन् । उनी रुस, मंगोलिया हुँदै नेपाल आउने र नेपालबाट दक्षिण कोरिया हुँदै चीन फर्कने कार्यक्रम रहेको चिनियाँ सञ्चारमाध्यमले नजाएको छ । उनी चिनियाँ संविधान अनुसार दोस्रो वरियता र चिनियाँ कम्युनिष्ट पार्टी (सीपीसी) को वरियतामा तेस्रो वरियतामा पर्छन् ।
अध्यक्ष लीले सोमबार दिउँसो नेपाल आएलगतै सोमबारै सभामुख सापकोटासँग नयाँ बानेश्वरस्थित संसद् भवनमा द्विपक्षीय वार्ता गर्ने छन् । उक्त संसद् भवन चीनले नै निर्माण गरिदिएको हो ।
सभामुख सापकोटाले सोमबारै लीको सम्मानमा चिनियाँ टोलीलाई रात्रिभोज सोल्टी होटलमा आयोजना हुँदैछ । मंगलबार बिहान अध्यक्ष लीले नयाँ बानेश्वरमै राष्ट्रियसभाका अध्यक्ष गणेश तिमिल्सेनासँग भेटवार्ता गर्ने छन् । त्यसपछि एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालसँग छुट्टा–छुट्टै भेट्ने कार्यक्रम छ । परराष्ट्रमन्त्री नारायण खड्कासँग भने त्यसपछि सोल्टीमा भेटवार्ता हुनेछ । त्यसपछि प्रधानमन्त्री शेरबहादुर देउवालाई भेटवार्ता गर्न बालुवाटार पुग्ने छन् ।
अध्यक्ष लीले अध्यक्ष लीले राष्ट्रपति विद्यादेवी भण्डारीसँग शीतल निवासमा भेटवार्ता गर्ने छन् । यस्तै, परराष्ट्र मन्त्रालयको अनुसार उनी बिहीबार नेपालबाट फर्कने कार्यक्रम छ ।
आगामी प्रतिनिधि र प्रदेशसभा निर्वाचन अघि तथा चीनमा अर्को महिना हुन गइरहेको चिनियाँ कम्युनिष्ट पार्टी (सीपीसी) को २० औं जनकंग्रेसको बारेमा पनि दुई पक्ष बीचमा विचारहरु आदान–प्रदान हुने बताइएको छ । २०७६ असोज २५–२६ मा चीनका राष्ट्रपति सी चिनफिङको दुई दिने राजकीय नेपाल भ्रमण गरेयता अध्यक्ष लीको नेपाला दोस्रो ठूलो उच्च तहको भ्रमण हो । सी नेपालमा २३ वर्षपछि भ्रमण गर्ने चीनका राष्ट्रपति हुन् । चिनियाँ अध्यक्ष ली सभामुख सापकोटाको निमन्त्रणमा नेपाल आएका लागेका हुन् । गत चैत २९ मा भएको भिडियो संवादका दौरान लीलाई नेपाल भ्रमणको नियन्त्रणा दिएका थिए ।
प्रकाशित : भाद्र २७, २०७९ १३:३१
