गठबन्धन देशको आवश्यकता : नेता कोइराला
पूर्वी नवलपरासी — नेपाली कांग्रेसका नेता शशांक कोइरालाले राष्ट्रिय आवश्यकताले आउँदो निर्वाचनमा गठबन्धन गर्न परेको प्रस्ट पारेका छन् । 'कांग्रेस एक्लै निर्वाचनमा जाँदा पनि बहुमत ल्याउँछ,' कोइरालाले भने, 'म गठबन्धन गर्न हुँदैन भन्ने पक्षमा थिएँ तर अहिलेको आवश्यकताले गठबन्धन गरेर निर्वाचनमा जान बाध्य भएको हो ।'
नेपाली कांग्रेस जिल्लाले शुक्रबार कावासोतीमा आयोजना गरेको कार्यक्रममा कोइरालाले नेपालमा मात्रै नभएर अन्तर्राष्ट्रियरुपमा बीपीले स्थापना गरेको प्रजातान्त्रिक समाजवादको औचित्य बढ्दै गएको दाबी गरे । उनले आगामी निर्वाचनमा कांग्रेसलाई विजयी गराएर देशलाई समाजवादको बाटोमा हिँडाउन कार्यकर्तालाई निर्देशन दिए ।
पूर्वी नवलपरासीबाट लगातार तेस्रोपटक प्रतिनिधिसभामा विजयी भइसकेका कोइराला मंसिर ४ मा हुने निर्वाचन पनि उम्मेदवार बन्ने तयारीमा छन् ।
प्रकाशित : भाद्र २४, २०७९ २०:४६