वर्ल्डकपमा कतारले दोहा–काठमाडौं दैनिक २ वटा मात्रै उडान गर्ने

नागरिक उड्डयन प्राधिकरणले हाल कतारलाई बिहान ३:३०, १०:३०, ११:३० र राति ०८:३० मा दोहाका लागि उडान अनुमति दिएको छ । विश्वकपको अवधिमा कतारले बिहान २:३० र साझ ५:५५ मा काठमाडौंबाट दोहाका लागि उडान तालिका राख्ने जनाएको छ । काठमाडौंबाट दोहा एकतर्फी ५ घन्टा समय लाग्छ ।

यसअघि कतारले विश्वकपका बेला काठमाडौं–दोहा दैनिक चारमध्ये तीनवटा उडान कटौती गर्दै एउटा मात्रै गर्ने जनाएको थियो । ‘पर्यटन व्यवसायीहरूले कतारसँग एउटा नभई कम्तीमा दुईसम्म उडान राख्न माग गरेकाले कतारको हेड अफिसले ३४ दिनको अवधिमा दैनिक नेपालका लागि हुने उडान संख्यालाई दुई बनाउने निर्णय गरेको छ,’ ती अधिकारीले भने, ‘जून, जुलाइ र अगस्टमा ट्राभल एजेन्सीहरूलाई एउटा मात्रै उडान हुने जानकारी गराउँदै त्यसै अनुसार टिकट बिक्री गर्‍यौं । एउटा दुइटा उडानको निर्णय केहि दिनअघि मात्रै भएको हो ।’

विश्वकपको अवधिमा अधिकांश धनी मुलुकका फुटवलप्रेमी दोहा आउजाउ गर्ने भएकाले कतारले आर्थिक लाभ हुने गन्तव्यमा उडान संख्या थप्नुपर्ने भएकाले पर्यटक र कामदार आउजाउ गर्ने नेपाल जस्ता गन्तव्यमा उडान कटौती गर्ने निर्णय गरेको हो ।

हाल कतारका लागि नेपालबाट हिमालय एयरलायन्स र नेपाल वायुसेवा निगमले क्रमश: सातामा चार र तीनवटा उडान गर्दै आइरहेका छन् । यी दुबै वायुसेवाले त्यसबेला हुने बजारको माग अनुसार उडान थपघट गर्ने जनाएको छ । ‘अहिले नै उडान संख्या थपघट गर्नेबारे कुनै निर्णय लिइसकेका छैनौं,’ हिमालय एयरलायन्सका उपाध्यक्ष विजय श्रेष्ठले कान्तिपुरसँग भने, ‘त्यसबेलाको डिमान्डका आधारमा निर्णय गर्ने छौं ।’

प्राधिकरणका सहायक प्रवक्ता ज्ञानेन्द्र भुलका अनुसार कतार सरकारले हाल नेपालबाट हुने उडानलाई पुरानो विमानस्थलमा सार्ने निर्णय गरिएको बताए । पुरानो दोहा अन्तर्राष्ट्रिय विमानस्थल अहिले उडान–अवतरण भइरहने कतारको हमाद विमानस्थलबाट ११ किलोमिटर सडक दूरीमा पर्छ ।

‘नेपाली वायुसेवालाई ट्राफिक चापका कारण पुरानो दोहा अन्तर्राष्ट्रिय विमानस्थलबाट सेवा दिन भनिएको छ,’ सहायक प्रवक्ता भुलले भने, ‘हिमालय र नेपाल वायुसेवा निगमले नया तोकिएका विमानस्थलमा जान नेपालको नागरिक उड्डयन प्राधिकरणबाट पनि अनुमति लिनुपर्छ । उनीहरू अनुमति लिने तरखरमा छन ।’ निगमका एक पाइलटका अनुसार कतारले नेपालसहित १४ वटा मुलुकका वायुसेवालाई भदौ ३० गतेदेखि हमादमा नभइ दोहा अन्तर्राष्ट्रिय विमानस्थलमा सर्न भनेका छन् । उनका अनुसार विश्वकप सकिएपछि फेरि हमाद अन्तर्राष्ट्रिय विमानस्थलबाटै उडान तथा अवतरण सुरु हुनेछ । विश्वकप खेलको उद्घाटन नेपाली समय अनुसार मंसिर ४ गते दोहामा सुरु भई पुस ३ गते समापन हुनेछ ।