काठमाडौँ — आगामी निर्वाचनमा सिट बाँडफाँट गर्ने विषयमा छलफल गर्न सत्ता गठबन्धनको बैठक बसिरहेको छ । प्रकोधानमन्त्री सरकारी निवास बालुवाटारमा बुधबार अपरान्ह ४ बजेपछि गठबन्धन र सिट बाँडफाँट कार्यदलको संयुक्त बैठक बसेको हो ।

कार्यदलका सदस्य एवम् जनता समाजवादी पार्टी (जसपा)का नेता महेन्द्र राय यादवले शीर्ष नेताहरूसहित कार्यदलको बैठक बस्ने तयारी रहेको बताए ।

‘बैठक चार बजेका लागि बोलाइएको हो । हामी पुग्दैछौँ,’ उनले भने, ‘आजको बैठकमा सिट बाँडफाँटबारे महत्त्वपूर्ण छलफल हुन्छ ।’ कार्यदलले यसअघि प्रतिनिधिसभा र प्रदेशसभा क्षेत्रहरूको निर्वाचन परिणाम अध्ययनपछि दलहरूले आन्तरिक छलफल गरेका छन् ।

आजको बैठकमा दलहरूले यसअघिको दाबीमा लचकतासहित प्रस्तुत हुने नेताहरूले बताएका छन् । गठबन्धनको ठूलो दल नेपाली कांग्रेसले दलहरूलाई गठबनधनको मर्म र भावनाबमोजिम लचकतासहित प्रस्तुत हुन आग्रह गरेको छ ।

सभापति एवम् प्रधानमन्त्री शेरबहादुर देउवाले बुधबार बिहान बालुवाटारमा पार्टीका पदाधिकारी र पूर्वपदाधिकारीहरूसँग सिट बाँडफाँटबारे छलफल गरेका हुन् । बैठकले सबै दलले आ–आफ्नो दाबीबाट लचकतासहित प्रस्तुत हुनुपर्ने निष्कर्ष निकालेको छ ।