०७४ मा थोरै मतले हारजित भएका १२ निर्वाचन क्षेत्र- समाचार - कान्तिपुर समाचार

०७४ मा थोरै मतले हारजित भएका १२ निर्वाचन क्षेत्र

प्रकाश धौलाकोटी

काठमाडौँ — अबको ९३ दिनपछि अर्थात् मंसिर ४ गते प्रतिनिधिसभा तथा प्रदेश सभा सदस्य निर्वाचनका लागि मतदान हुनेछ । सरकारले निर्वाचनको मिति घोषणा लगत्तैदेखि राजनीतिक दलहरूबीच चुनाव लक्षित गतिविधि बढ्नुका साथै प्रतिनिधिसभाका १६५ र प्रदेश सभाका ३३० निर्वाचन क्षेत्रमा उम्मेदवार र जितहारका बारेमा चर्चा सुरू भएको छ । आकांक्षीहरू आफ्नो पक्षमा माहोल बनाउन र पार्टीमा टिकट पाउन कस्सिएर लागेका छन् ।

राजनीतिक दलहरूले पनि चुनावी परिणाम आफ्नो पक्षमा पार्न एउटै चुनाव चिह्न लिनेदेखि चुनावी तालमेलसम्म गरिरहेका छन् । पाँच वर्षअघि ०७४ को निर्वाचनमा नेकपा एमाले र नेकपा माओवादी केन्द्रले वाम एकतासम्मको उद्देश्यसहित वाम गठबन्धन गरेर चुनावमा होमिएका थिए भने कांग्रेस एक्लिएको थियो । तर, यसपटक भने एमाले एक्लिने सम्भावना बढेको छ ।

कांग्रेस नेतृत्वको माओवादी केन्द्र, एमाले विभाजित भएर बनेको नेकपा एकीकृत समाजवादी, जनता समाजवादी पार्टी र राष्ट्रिय जनमोर्चासमेतको सत्तारुढ गठबन्धन चुनावी तालमेल गरेर अघि बढिरहेको छ ।

गठबन्धनकै जोडबलमा गत ३० वैशाखको स्थानीय तह निर्वाचनको परिणामले कांग्रेस पहिलो शक्ति बनेको छ भने माओवादी केन्द्र बलियो आधारसहित तेस्रो दल बनेको छ । आगामी निर्वाचनलाई लिएर दलहरूका आ-आफ्नै दाउ छन् । तर, पाँच वर्षअघि भन्दा फरक गठबन्धन बन्दै गर्दा थोरै मतले मात्रै हारजित भएका क्षेत्रको नतिजामा उथलपुथल हुन सक्ने देखिएको छ ।

अघिल्लो पटक थोरै मतले पराजित हुनेमा नेपाली कांग्रेसका उम्मेदवार धेरै जना छन् । यहाँ एक हजार मतसम्मले हारजित भएका निर्वाचन क्षेत्रको चर्चा गरिएको छ ।

हुम्ला

०७४ को प्रतिनिधिसभा सदस्य निर्वाचनमा हुम्लाबाट नेपाली कांग्रेसका उम्मेदवार मंगलबहादुर शाही ४७ मतले पराजित भए । शाहीलाई वाम गठबन्धनका बागी उम्मेदवार छक्कबहादुर लामाले पराजित गरेका थिए । लामाले ८ हजार ४९१ मत पाउँदा शाहीले ८ हजार ४४४ मत पाएका थिए । लामा हाल नेकपा माओवादी केन्द्रको केन्द्रीय सदस्य छन् । कांग्रेस–माओवादीबीच तालमेलले स्थानीय तह निर्वाचनमा हुम्लाका सातमध्ये तीनमा कांग्रेस र तीनमा माओवादी केन्द्रले जितेका छन् ।

कञ्चनपुर–३

कञ्चनपुर–३ बाट ०५६ मै निर्वाचित भएर मन्त्री भइसकेका कांग्रेस नेता रमेश लेखक २५८ मतले पराजित भए । लेखकलाई वाम गठबन्धनका उम्मेदवार दीपकप्रकाश भट्टले पराजित गरेका थिए । भट्टले २६ हजार ३६४ मत ल्याउँदा लेखकले २६ हजार १०६ मत पाएका थिए । भारतबाट सुरक्षा मामिलामा पीएचडी गरेका भट्ट सेना समायोजन समितिमा सदस्य भएर काम गरेका थिए । उनी एमालेको अन्तर्राष्ट्रिय सम्बन्ध विभागको पनि सदस्य थिए । तर, वाम गठबन्धनका कारण भट्टको उम्मेदवारी कांग्रेसको केन्द्रीय समितिमै रहिसकेका पूर्वमन्त्री लेखकलाई भारी परेको थियो ।

मनाङ

सबैभन्दा कम जनसंख्या भएको जिल्ला हो मनाङ । यहाँ कुल मतदाताको संख्या नै पाँच हजार हाराहारीमात्रै छ । ०७४ को निर्वाचनमा मनाङबाट नेकपा एमालेका पोल्देन छोपाङ्ग गुरुङले कांग्रेसका टेकबहादुर गुरुङलाई २७९ मतान्तरले पराजित गरेका थिए । पोल्देन छोपाङ्गले २३०० मत पाउँदा टेकबहादुरले २०२१ मत पाएका थिए ।

काठमाडौं-८

०७४ को निर्वाचनमा काठमाडौं निर्वाचन क्षेत्र नं. ८ मा नेपाली कांग्रेसका नेता स्वर्गीय नवीन्द्रराज जोशी ४४४ मतले पराजित भएका थिए । नेकपा एमालेका जीवनराज श्रेष्ठले १३ हजार ३९७ मत पाउँदा जोशीले १२ हजार ९५३ मत पाएका थिए । एमाले विभाजित हुँदा माधव नेपाल नेतृत्वको नेकपा एकीकृत समाजवादी पार्टीतिर लागेका श्रेष्ठ अहिले संस्कृति पर्यटनमन्त्री छन् । मस्तिष्कघातको संक्रमणमा परेका जोशी ०७७ चैतमा स्वर्गीय भए । अहिले गठबन्धनबाट मन्त्री श्रेष्ठ नै उम्मेदवार हुने चर्चा छ भने सुमन सायमीले स्वतन्त्र उम्मेदवारी दिने घोषणा गरिसकेका छन् ।

मुस्ताङ

हिमालपारीको जिल्ला भनिने मुस्ताङमा पनि एमालेले कांग्रेसलाई ३६३ मतान्तरले जितेको थियो । एमालेका प्रेमप्रसाद तुलाचनले कांग्रेसका रोमी गौचन थकालीलाई ३६३ मतले पराजित गरेका थिए । तुलाचनले ३ हजार ५४४ मत ल्याउँदा कांग्रेसका थकालीले ३ हजार १८१ मत पाएका थिए ।

सुनसरी–३

सुनसरी निर्वाचन क्षेत्र नं. ३ भने कांग्रेसले वाम गठबन्धनलाई ३२१ मतले पराजित गरेको थियो । कांग्रेसका विजयकुमार गच्छदारले एमालेकी भगवती चौधरीलाई ३२१ मतान्तरले हराएका थिए । गच्छदारले ३८ हजार ९७२ मत प्राप्त गर्दा चौधरीले ३८ हजार ६५१ मत पाएकी थिइन् । तत्कालीन फोरम लोकतान्त्रिक पार्टीका अध्यक्ष रहेका गच्छदार कांग्रेसमा गाभिएपछि पार्टीको उपसभापति मनोनीत भएका थिए । चुनाव जितेर पटक–पटक मन्त्री र उपप्रधानमन्त्रीसमेत भइसकेका गच्छदारलाई वाम गठबन्धनका कारण चौधरीले राम्रै टक्कर दिएकी थिइन् ।

मोरङ-६

मोरङ क्षेत्र नं. ६ मा नेपाली कांग्रेसका नेता शेखर कोइरालाले कोइरालाहरूको आधारभूमि मोरङबाटै ६७५ मतले चुनाव हारेका थिए । गठबन्धनको उम्मेदवार बनेका नेकपा एमालेका लालबाबु पण्डितले कोइरालालाई ६७५ मतले पराजित गरेका थिए । पार्टीको १३औँ महाधिवेशनमा सर्वाधिक मतसहित केन्द्रीय सदस्य निर्वाचित भएका कोइरालालाई आफ्नो क्षेत्रबाट चुनाव हारेपछि धक्का लागेको थियो । कोइराला १४ औँ महाधिवेशनमा पार्टी सभापतिको प्रत्याशी रहिसकेका छन् । ०७४ को निर्वाचनमा पण्डितले ३३ हजार ९४१ मत ल्याउँदा कोइरालाले ३३ हजार २६६ मत पाएका थिए ।

उदयपुर-१

उदयपुर क्षेत्र नं. १ मा भने नेपाली कांग्रेसले एमालेलाई ५४८ मतले पराजित गरेको थियो । कांग्रेसका नारायण खड्काले ५४८ मतान्तरसहित नेकपा एमालेकी मञ्जुकुमारी चौधरीलाई जितेका थिए । खड्काले ३३ हजार १४२ मत पाएका थिए भने चौधरीले ३२ हजार ५९४ मत ल्याएकी थिइन् ।

सर्लाही-१

सर्लाही क्षेत्र नं. १ बाट तत्कालीन राष्ट्रिय जनता पार्टीले एमालेलाई ५७१ मतले पराजित गरेको थियो । राजपाका प्रमोद साहले एमालेका ध्रुवप्रसाद गौतमलाई ५७१ मतान्तरले पराजित गरेका थिए । साहले २२ हजार ३६ मत ल्याएर जितेका थिए भने गौतमले २१ हजार ४६५ मत पाएका थिए ।

धादिङ्ग-२

०७४ को निर्वाचनमा धादिङ्ग क्षेत्र नं. २ बाट नेकपा एमालेका खेमप्रसाद लोहनी निर्वाचित भए । उनले नेपाली कांग्रेसका दिलमान पाख्रिनलाई ६४० मतले मात्रै हराएका थिए । लोहनीले ३६ हजार २५६ मत ल्याएर विजयी भएका थिए भने पाख्रिनले ३५ हजार ६१६ मत पाएका थिए ।

काठमाडौं-१

काठमाडौं क्षेत्र नं. १ मा भने वाम गठबन्धनले गठबन्धनको प्रभाव देखाउन सकेन । नेपाली कांग्रेसका प्रकाशमान सिंहले ८१८ मतले चुनाव जिते । सिंहले १० हजार ९३६ मत ल्याएर जित्दा विवेकशील साझा पार्टीका रविन्द्र मिश्रले १० हजार ११८ मत ल्याएका थिए ।

बर्दिया–१

०७४ को निर्वाचनमा नेता बामदेव गौतम ७५३ मतले चुनाव हारेका थिए । यहाँ वाम गठबन्धन भए पनि कांग्रेसले जितेको थियो । कांग्रेसका तत्कालिन जिल्ला सभापति सञ्जयकुमार गौतमले गृहमन्त्री भइसकेका गौतमलाई पराजित गरेका थिए । सञ्जयकुमारले ४४ हजार ८२९ मत ल्याएर जिते भने बामदेवले ४४ हजार ७६ मत पाएका थिए ।

प्रकाशित : भाद्र २, २०७९ १५:१५
प्रतिक्रिया
पठाउनुहोस्

सेयर बजारका सबै सूचक बढे, नेप्से २०६८ अंकमा

कान्तिपुर संवाददाता

काठमाडौँ — बिहीबार सेयर बजारका सबै सूचक बढेका छन् । बजारको परिसूचक नेप्से २७.७२ अंक बढेको छ । सो अंकको वृद्धिपछि २०६८ अंकमा पुगेको छ । कुल २ अर्ब ५ करोड रुपैयाँको कारोबार भयो । हिजो १ अर्ब ४० करोडको कारोबार भएको थियो ।

बैंकिङ ७, विकास बैंक ११७, फाइनान्स ५३, होटल तथा पर्यटन ७, जलविद्युत् ७२, जीवन बीमा ५२, उत्पादन ५३, माइक्रोफाइनान्स ६१, निर्जीवन बीमा ५६, अन्य ३४ र व्यापार उपसमूह २२ अंक बढे ।

कुल १७१ कम्पनीको मूल्य बढ्यो भने १२ को घट्यो, ३ को स्थिर रह्यो । ४ कम्पनीको मूल्य १० प्रतिशत बढ्यो । मन्दकिनी हाइड्रो, अपर सोलु, स्वेतगंगा र अपर हेवाखोलाको मूल्य १० प्रतिशत बढेको हो । कारोबार रकमका आधारमा भने रिडी पावर, अपी पावर, शिवम् सिमेन्ट, अरुणकाबेली पावर र आईसीएफसी फाइनान्स क्रमश: अगाडि रहे ।



प्रकाशित : भाद्र २, २०७९ १५:१३
पूरा पढ्नुहोस्
प्रतिक्रिया
पठाउनुहोस्
x
×