सत्ता गठबन्धनको बैठक बस्दै
काठमाडौँ — सत्ता गठबन्धनका शीर्ष नेताहरुको बैठक बस्दैछ । बिहीबार बिहान १० बजे प्रधानमन्त्रीको सरकारी निवास बालुवाटारमा गठबन्धनको बैठक बस्न लागेको प्रधानमन्त्रीको सचिवालयले जनाएको छ । बैठकमा आगामी प्रतिनिधिसभा र प्रदेशसभा सदस्य निर्वाचनकालागि सिट बाँडफाँड र संसद्बाट नागरिकता विधेयक पारित गर्ने विषयमा छलफल हुने नेताहरुले बताएका छन् ।
दलहरुले निर्वाचनमा तालमेल गरेर अघि बढ्ने सहमति गरे पनि त्यसका लागि बनेको कार्यदलले अहिलेसम्म सिट बाँडफाँडको खाका तय गर्न सकेको छैन । बुधबार बसेको कार्यदलको बैठकमा नेताहरुले शीर्ष नेताहरुसँग छलफलपछि मात्रै निष्कर्षमा पुग्न सकिने भन्दै उठेका थिए ।
बिहीबारको बैठकमा कार्यदलका संयोजन कृष्णप्रसाद सिटौलाले कार्यदलमा भएको छलफलको विषय र प्रगतिबारे नेताहरुलाई जानकारी गराउने र त्यसबारे दलभित्र आन्तरिक छलफलपछि मात्रै निष्कर्षमा पुग्ने कार्यदलको तयारी छ ।
गठबन्धनले साउन २० मा सिटौला नेतृत्वमा पाँच दलका नेता सम्मिलित ११ सदस्यीय कार्यदल बनाएको थियो । कार्यदलमा नेपाली कांग्रेसका पूर्वमहामन्त्रीसमेत रहेका सिटौला, महामन्त्री गगनकुमार थापा र ज्ञानेन्द्रबहादुर कार्की छन् । माओवादी केन्द्रबाट वर्षमान पुन र देव गुरूङ, नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल, जनता समाजवादी पार्टीबाट रामसहाय यादव र रकम चेम्जोङ तथा राष्ट्रिय जनमोर्चाबाट हिमलाल पुरी र आनन्द शर्मा सदस्य छन् ।
कार्यदलले २०७४ को प्रतिनिधिसभा र प्रदेशसभा सदस्य निर्वाचनको पहिलो हुने निर्वाचित हुने र समानुपातिक निर्वाचन प्रणालीको परिणाम र स्थानीय तह निर्वाचन २०७९ को परिणामलाई आधार मानेर सिट बाँडफाँड गर्ने समझदारी गरेको छ ।
प्रकाशित : भाद्र २, २०७९ ०९:५६
