कांग्रेसको नीति, कार्यक्रम एमालेलाई रोक्ने : ओली- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसको नीति, कार्यक्रम एमालेलाई रोक्ने : ओली

कान्तिपुर संवाददाता

काठमाडौँ — एमालेका अध्यक्ष केपी शर्मा ओलीले कांग्रेस सहयोगीबिना एक्लै अघि बढ्न नसक्ने अवस्थामा पुगेको बताएका छन् । उनले एमालेलाई रोक्ने नीति र कार्यक्रममा कांग्रेस रहेको बताए । 

काठमाडौंमा आयोजित एक कार्यक्रममा बुधबार ओलीले कांग्रेस विचारशून्य रहेको आरोप लगाएका हुन् । 'कांग्रेस ढोडको भए पनि लौरो नसमाति उभिनै नसक्ने भयो । एमालेसँग अखडामा कांग्रेस टिक्नै सक्दैन । कांग्रेस पाँच-सातवटा साथी नलिइकन उभिनै सक्दैन । कांग्रेस लुलो छ । विचारशून्य छ । कहाँ जाने थाहा छैन । भोलि उठी कहाँ जाने होइन आजै कहाँ जाने थाहा छैन,' उनले भने, 'कोसँग केका लागि मिल्ने ? किनभने राम्रो काम हुनबाट रोक्नका लागि मिल्ने । एमालेले राम्रो काम गर्छ त्यसलाई रोक्ने नीति लिएको छ ।'

कांग्रेसको नीति कार्यक्रम नै गठबन्धन रहेको र त्यसको उद्देश्य एमालेलाई रोक्ने रहेको ओलीको भनाइ थियो । 'कांग्रेसको नीति, कार्यक्रम, पुग्ने कहाँ हो भन्दा गठबन्धन । गठबन्धन गरेर के गर्ने भन्दा गठबन्धन । गठबन्धनका सबै पार्टीका सबै नेताहरूको जहान, परिवार छन् त्यसका लागि गठबन्धन गर्ने,' उनले भने ।

एमालेको समृद्ध नेपाल सुखी नेपालीको गन्तव्य रोक्नका लागि लोसपा, जसपा, नेसपा, एकीकृत समाजवादी, माओवादी केन्द्र र कांग्रेसलगायत मिलेको उनको भनाइ थियो । ओलीले भने, 'आगामी निर्वाचन एउटा निर्णयाक मोड हो । यस मोडमा प्रतिक्रियावादी शक्तिहरूलाई एकमुष्ट पराजित गर्नुपर्छ । सबै दक्षिणपन्थीहरू विभिन्न नामका दक्षिणपन्थीहरूलाई एकमुष्ट पराजित गर्नुपर्छ ।'

गठबन्धन भन्ने नामै नराम्रो रहेको ओलीको भनाइ थियो । उनले भने, 'एमालेले बोकेको महान् उद्देश्य पूरा हुन नदिनका लागि अनेक तत्वहरू जोडिया जोडियै छन् । यो जोडाइ, त्यसको नाम बडो नराम्रो राखेको छ- गठबन्धन ।'

प्रकाशित : भाद्र १, २०७९ १५:५९
प्रतिक्रिया
पठाउनुहोस्

बस्ती छिरेर सताउने बाघ नियन्त्रणमा

विप्लव महर्जन, कमल पन्थी

सल्यान/बर्दिया — सल्यानको कालिमाटी गाउँपालिका ७ बाटुलेस्थित स्थानीय बासिन्दाको घरगोठमा पसेर गाईबस्तु र बाख्रा मारेर खान थालेपछि पाटे बाघलाई बर्दिया राष्ट्रिय निकुन्ज, सेना र प्रहरीको टोलीले नियन्त्रणमा लिएको छ ।

मंगलबार राति स्थानीय तुलसी कुमारी घर्तीको गोठमा बाँधेका दुईवटा गोरु मारेर खाएको र मान्छेलाई पनि दुःख दिएको भन्दै स्थानीयहरूबाट गुनासो आएपछि सुरक्षाकर्मीको टोलीले बुधबार बिहान घर्तीको घरदेखि करिब २ सय मिटर टाढा बाँसघारीबाट पाटे बाघलाई नियन्त्रणमा लिएको हो । यस क्रममा सुरक्षाकर्मीले डाट प्रयोग गरी बेहोस बनाएर बाघलाई नियन्त्रणमा लिएका थिए ।

जिल्ला प्रहरी कार्यालय सल्यानका प्रहरी नायब उपरीक्षक सुमित खड्काका अनुसार उक्त पाटे बाघ अहिले बाँके राष्ट्रिय निकुन्जको रेस्क्यु सेन्टरमा पठाइएको छ । बाँके र बर्दिया राष्ट्रिय निकुन्ज नजिकै पर्ने भएकाले निकुन्जबाट बस्तीमा पस्ने गरेका पाटे बाघले बेलाबेलामा स्थानीयले पालेका पसु चौपाया मारेर खाने मात्र नभई स्थानीयलाई समेत दुःख दिँदै आएपछि स्थानीयले प्रहरीकहाँ निवेदन दिने गरेका थिए ।

बाँके राष्ट्रिय निकुन्जले बस्ती छोएको र निकुन्जका बाघ सिधै बस्तीमा पस्ने गरेका कारण आफ्नो ज्यानसमेत जोखिममा पर्दै आएकाले नियन्त्रणका लागि स्थानीयले माग गरेका थिए । स्थानीय नन्दराम घर्तीका अनुसार दिउँसै बस्ती आसपासका जंगलमा बाघ देखिने भएकाले निकुञ्जछेउको बाटो हिँड्न पनि स्थानीयहरू डराउने गरेका छन् ।

जंगली जनावर बाघ मात्र नभई बँदेल र भालुले पनि हैरान बनाएको र बाली नष्ट पार्ने गरेको स्थानीय निर्मल ओलीले बताए । जंगली जानवरको त्रास बढ्दै गएका कारण धेरैले बस्ती छाड्दै गएको पनि ओली बताउँछन् ।

यसअघि घाँस काट्न गएका सुर्खेत भेरीगंगा नगरपालिका—५ की ६६ वर्षीया कबी वली र सोही ठाउँका ४६ वर्षीय राम बहादुर चन्दको बाघको आक्रमणमा मृत्यु भएको थियो ।

नियन्त्रणमा लिएको पोथी बाघ करिब १२ वर्षको बूढो भएको निकुञ्जको आकलन छ । उक्त बाघ नंग्रा र दाँत भाँचिएको घाइते अवस्थामा भेटिएको प्रमुख संरक्षण अधिकृत विष्णु प्रसाद श्रेष्ठले बताए । बर्दिया निकुञ्ज र खाता जैविकमार्ग अन्तर्गत तीन वर्षयता बाघको आक्रमणबाट २५ जनाको मृत्यु भइसकेको छ । बर्दिया निकुञ्जको ठाकुरद्वारामा एक र रम्मापुरमा तीन वटा बाघ रहेका छन् ।

प्रकाशित : भाद्र १, २०७९ १५:४८
पूरा पढ्नुहोस्
प्रतिक्रिया
पठाउनुहोस्
x
×