जबराविरुद्धको महाभियोग प्रक्रियामा ढिलाइ हुँदा प्रश्न उठेका छन् : कांग्रेस सांसद विश्वकर्मा- समाचार - कान्तिपुर समाचार

जबराविरुद्धको महाभियोग प्रक्रियामा ढिलाइ हुँदा प्रश्न उठेका छन् : कांग्रेस सांसद विश्वकर्मा

कान्तिपुर संवाददाता

काठमाडौँ — नेपाली कांग्रेसका सांसद मीनबहादुर विश्वकर्माले निलम्बित प्रधानन्यायाधीश चोलेन्द्र शम्शेर जबराविरुद्धको महाभियोग प्रक्रिया ढिला भएकोमा आफूहरूप्रति नै प्रश्न तेर्सिएको बताएका छन् । बुधबार प्रतिनिधिसभाको महाभियोग समितिको पहिलो बैठकमा विश्वकर्माले लगाउनुपर्ने व्यक्तिलाई महाभियोग लगाइए पनि ठीक ढंगले काम नभएको उनले बताए । 

कार्यतालिकाअनुसार प्रक्रिया अगाडि बढाउनुपर्ने उनको भनाइ थियो । 'हामीलाई ३ महिनाभित्रको समय हो । ३ महिनापछि भन्ने होइन । ३ महिनाभित्र यो काम सकौं । सिंगो संसद्ले हामीलाई जिम्मेवारी दिनमा ढिलाइ गर्‍यो । महाभियोग समितिमा पठाउन ढिलाइ गर्‍यो,' उनले भने । जबराविरुद्धका दस्तावेज अध्ययन गरेर छिटो टुंग्याउनुपर्ने उनले बताए ।

'पहिलो कुरा दस्तावेज अध्ययन गरौं अबको बैठकमा । पहिलो त महाभियोग त्यसपछि सम्बन्धित कागजात संकलन गर्नुपर्छ । महाभियोग प्रस्ताव आउँदा १ वर्षअघिको झल्झली सम्झ्यौं भने हामी कसैले सम्झिरहेका थिएनौं । बार बेन्च उच्च अदालत जिल्ला अदालत अस्तव्यस्त थिए । अहिले होइन कि होइन कि भन्ने लाग्छ होला,' उनले भने । जबराका बारेमा पूर्वप्रधानन्यायाधीशहरूले सार्वजनिक गरेका दस्तावेज संकलन गर्नुपर्ने उनले बताए । उनले अगाडि भने, 'पूर्वप्रधानन्यायाधीशहरूले लिखित दस्तावेज सार्वजनिक गरेका थिए । ती दस्तावेज संकलन गर्नुपर्छ होला । नागरिक समाज र जनआवाज के छ त्यसलाई पनि कार्यक्षेत्रमा राखौं ।'

जबराविरुद्ध प्रतिनिधिसभामा महाभियोग दर्ता भएको ६ महिनापछि बुधबारदेखि कारबाही प्रक्रिया सुरु भएको हो । जबराविरुद्ध विभिन्न २१ आरोप लगाएर सत्तारुढ दलहरू कांग्रेस, माओवादी केन्द्र र एकीकृत समाजवादीका सांसदहरूले फागुन १ गते प्रतिनिधिसभामा महाभियोग दर्ता गराएका थिए । महाभियोग दर्ता भएपछि जबरा स्वतः निलम्बनमा परेका थिए ।

प्रकाशित : भाद्र १, २०७९ १२:५१
प्रतिक्रिया
पठाउनुहोस्

हालसम्म ४२ जिल्लामा पूर्ण विद्युतीकरण, ९२.७१% जनसंख्यामा बिजुलीको पहुँच

कान्तिपुर संवाददाता

काठमाडौँ — गत असार मसान्तसम्ममा ९२.५२ प्रतिशत जनसंख्यामा बिजुली सुविधा पुगेको छ । नेपाल विद्युत् प्राधिकरणको विवरणअनुसार गत आर्थिक आर्थिक वर्ष २०७८/७९ को अन्तसम्ममा प्रसारण प्रणालीबाट बिजुली सुविधा नपुगेको जनसंख्या ७.४८ प्रतिशत बराबर देखिएको हो ।

हालसम्म पूर्ण विद्युतीकरण गरिएका जिल्लाको संख्या ४२ पुगेको छ । अघिल्लो आर्थिक वर्षमा पूर्ण विद्युतीकरण भएका जिल्लाको संख्या ३२ रहेकोमा गतवर्ष मात्रै थप १० जिल्लालाई पूर्ण विद्युतीकरण गरिएको छ । प्राधिकरणले आर्थिक वर्ष २०८०/८१ भित्रमा देशभरका सम्पूर्ण घरधुरीमा विद्युत् सेवा पुर्‍याउने लक्ष्य राखेको छ ।

हाल प्राधिकरणको विद्युत् उपभोग गर्ने ग्राहकको संख्या ५३ लाख २० हजार रहेको छ । अघिल्लो आर्थिक वर्ष २०७७/७८ को तुलनामा विद्युत् उपभोग गर्ने घरायसी ग्राहकको संख्या गत आर्थिक वर्ष ५.२५ प्रतिशतले बढेर ४७ लाख ७० हजार पुगेको छ । त्यस्तै सामुदायिकतर्फ ५ लाख ५० हजार ग्राहक रहेका छन् । यसरी कुल ग्राहक संख्यामध्ये गार्हस्थ्य वर्गको ९२.७१ प्रतिशत, औद्योगिक ग्राहक १.३६ प्रतिशत र अन्य वर्गका ग्राहक ५.९३ प्रतिशत रहेका छन् ।

गत वर्ष सौर्य प्लान्टसहित कुल ७ सय ३५ मेगावाट विद्युत् राष्ट्रिय प्रणालीमा थपिएको प्राधिकरणले जनाएको छ । प्राधिकरणले गत आर्थिक वर्ष २०७८/७९ मा हालसम्मकै बढी १६ अर्ब १६ करोड ५० लाख रुपैयाँ नाफासमेत कमाएको जनाएको छ । हाल वितरण प्रणालीको क्षमता अभिवृद्धि गर्न तथा नगरको सौन्दर्य कायम राख्नका लागि भन्दै काठमाडौं उपत्यकाका ११ वटै वितरण केन्द्रको मुख्य सडकमा र उपत्यका बाहिर पोखरा तथा भरतपुरमा पनि विद्युत् वितरण प्रणालीलाई भूमिगत गर्ने काम भइरहेको छ । प्राधिकरणले यसै वर्षभित्र काठमाडौं उपत्यकाका सबै ग्राहकलाई स्मार्ट मिटर जडान गर्ने योजना बनाएको छ । यसैबीच नेपाल विद्युत् प्राधिकरणले बुधबार आफ्नो ३७ औं स्थापना दिवस मनाउँदैछ ।

प्रकाशित : भाद्र १, २०७९ १२:३९
पूरा पढ्नुहोस्
प्रतिक्रिया
पठाउनुहोस्
x
×