कोरोनाले साउनमा ३७ को मृत्यु, ८४ प्रतिशतले खोप लगाएका थिएनन्- समाचार - कान्तिपुर समाचार

कोरोनाले साउनमा ३७ को मृत्यु, ८४ प्रतिशतले खोप लगाएका थिएनन्

अतुल मिश्र

काठमाडौँ — कोरोना संक्रमणका कारण साउनमा मृत्यु भएका ३७ मध्ये झन्डै ८४ प्रतिशतले खोप नलगाएको पाइएको छ । पछिल्लो समय कोभिड संक्रमणले मृत्यु हुनेमध्ये अधिकांश खोप नलगाएका र जटिल दीर्घरोगी छन् । तेस्रो लहरपछि झन्डै अढाई महिनासम्म (वैशाख २१ देखि असार ३२) कोभिडका कारण कसैको पनि मृत्यु भएको थिएन ।

साउन १ गतेदेखि ३१ सम्म मात्रै ३७ जनाले ज्यान गुमाए । मृत्यु हुनेमा २१ देखि ९० वर्षसम्मका छन् ।

‘साउनभरमा मृत्यु भएका ३७ मध्ये ३१ जनाको खोपको अवस्था उपलब्ध छैन अर्थात् उहाँहरूले खोप लगाउनुभएको थिएन,’ स्वास्थ्य सेवा विभाग इपिडिमियोलोजी तथा रोग नियन्त्रण महाशाखाका निर्देशक डा.चुमनलाल दासले भने, ‘दीर्घरोगी भए पनि पूर्ण खोप लिएका र सन्तुलित जीवनशैली भएकाहरूको भने मृत्यु भएको छैन ।’ खोप नलगाएकामा मात्र होइन पूर्ण मात्रा नलिएकामा पनि भाइरसको संक्रमण जटिल देखिएको उनले बताए ।

मंगलबार ५ हजार ६ सय १९ नमुनाको परीक्षण गर्दा १५.०९ प्रतिशत अर्थात् ८ सय ४८ जनामा संक्रमण देखिएको छ । एक जनाले ज्यान गुमाएका छन् । देशभर सक्रिय संक्रमितको संख्या ५ हजार २ सय ५९ पुगेको छ । हाल मृत्युदर १.२ प्रतिशत रहेको छ । स्वास्थ्य मन्त्रालयका अनुसार ७२ जना सघन उपचारमा छन् । प्रदेश १ मा ४ जना, मधेसमा २, वाग्मतीमा ५५, गण्डकीमा ३, लुम्बिनीमा ३ र सुदूर पश्चिममा १ जना गरी ६८ जना आईसीयूमा र मधेसमा २, वाग्मतीमा १, सुदूरपश्चिममा १ गरी ४ जना भेन्टिलेटरमा छन् ।

प्रकाशित : भाद्र १, २०७९ १३:०४
प्रतिक्रिया
पठाउनुहोस्

देउवाले पनि प्रदेशलाई अधिकार दिन चाहनुभएन : मुख्यमन्त्री पाण्डे

नगेन्द्र अधिकारी

काभ्रे — वाग्मती प्रदेशका मुख्यमन्त्री राजेन्द्रप्रसाद पाण्डेले प्रधानमन्त्री शेरबहादुर देउवाले पनि प्रदेशलाई अधिकार दिन नखोजेको आरोप लगाएका छन् । जिल्ला समन्वय समिति काभ्रेको छैठौं जिल्ला सभालाई धुलिखेलमा सम्बोधन गर्दै मुख्यमन्त्री पाण्डेले संघीय सरकारले प्रदेशलाई कहिले पनि अधिकार दिन नचाहेको बताए ।


‘सबै अधिकार आफू मातहत ल्याएर केपीजी तानाशाह बन्न खोज्नुभएको थियो । शेरबहादुर देउवा आएपछि त हुनुपर्ने जस्तो लागेको थियो तर भएन नि,’ पाण्डेले भने, ‘देउवा आएको १० महिनासम्म पनि अधिकार विकेन्द्रित गर्न केही सुधार भएन । व्यक्तिभन्दा पनि मानसिकताको कुरा रहेछ ।’ प्रहरी नायव महानिरीक्षकसम्मको दरबन्दी प्रदेश प्रहरी मातहत रहने प्रस्ताव भए पनि संघले त्यसो गर्न नचाहेको उनले आरोप लगाए ।

प्रदेश मातहत कर्मचारी व्यवस्थापन गर्न कानुन ल्याइएको भन्दै उनले क्रमश: पदपूर्ति हुँदै जाने बताए । जनतालाई सेवा दिने मन्त्रालयको संख्या थप गरिएको भन्दै उनले सवारी अनुमतिपत्रलगायत व्यवस्थापन गरिएको बताए ।

कार्यक्रममा सांसद गंगाबहादुर तामाङ, नवीना लामा, संविधान सभा सदस्य तिर्थ लामा, रामहरी सुवेदी, काठमाडौं विश्वविद्यालयका उपकुलपति भोला थापा, जिल्ला समन्वय समिति महासंघका अध्यक्ष नवराज गेलाल, जिल्ला समन्वय समिति काभ्रेका प्रमुख दीपककुमार गौतम, जिल्ला समन्वय समिति काभ्रेका निवर्तमान प्रमुख उद्धव केसी, मण्डनदेउपुर नगरप्रमुख टोकबहादुर वाइबा, पाँचखाल नगरप्रमुख महेश खरेल, खानीखोला गाउँपालिका अध्यक्ष इन्द्रबहादुर थिङ, प्रमुख जिल्ला अधिकारी हुमकला पाण्डेलगायतले तीन तहको सरकार मिलेर विकास र समृद्धि दिनुपर्ने बताए ।


प्रकाशित : भाद्र १, २०७९ १२:५३
पूरा पढ्नुहोस्
प्रतिक्रिया
पठाउनुहोस्
x
×