सत्ता गठबन्धनको बैठक बस्दै- समाचार - कान्तिपुर समाचार

सत्ता गठबन्धनको बैठक बस्दै

कान्तिपुर संवाददाता

काठमाडौँ — सत्ता गठबन्धनको बैठक आइतबार बस्दैछ । गठबन्धनको सबैभन्दा ठूलो दल नेपाली कांग्रेसका सभापति एवम् प्रधानमन्त्री शेरबहादुर देउवाले आइतबार अपराह्न ४ बजेका लागि गठबन्धनको बैठक बोलाएका हुन् ।

राष्ट्रिय जनमोर्चाकी उपाध्यक्ष दुर्गा पौडेलले गठबन्धनको बैठक आइतबार अपराह्न ४ बजे प्रधानमन्त्रीको सरकारी निवास बालुवाटारमा बस्न लागेको जानकारी दिइन् ।

आगामी प्रतिनिधिसभा र प्रदेश सभा सदस्यको निर्वाचनमा तालमेल गरेर जाने सहमति गरेका कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाबीच सिट बाँडफाँटको विषयमा भने सहमति भइसकेको छैन ।

यसअघि गत साता बसेको गठबन्धन बैठकले नेता कृष्णप्रसाद सिटौलाको नेतृत्वको कार्यदल बनाएर सिट बाँडफाँटको मोडालिटी बनाउने जिम्मेवारी दिएको थियो । कार्यदलमा पाँच दलका ११ नेता सम्मिलित छन् । तर कार्यदलले पनि सिट बाँडफाँडको विषयलाई गति दिन सकेको छैन ।

सिट बाँडफाँटकै विषयमा छलफल गर्न गठबन्धनको बैठक बस्न लागेको हो । गठबन्धनले कार्यदललाई साउन मसान्तभित्र सिट बाँडफाँटको मोडालिटी तय गर्न जिम्मेवारी दिएको छ भने भदौ पहिलो साताभित्र सिट बाँडफाँटको टुंगो लगाउने गठबन्धनको सहमति छ ।

प्रकाशित : श्रावण २९, २०७९ १५:१४
प्रतिक्रिया
पठाउनुहोस्

सेयर बजारका सबै सूचक घटे, नेप्से २०१० मा 

कान्तिपुर संवाददाता

काठमाडौँ — साताको पहिलो दिन आइतबार पनि सेयर बजार राताम्मे भएको छ । सबै सूचकहरु ओर्लिएका छन् । परिसूचक नेप्से २७.९२ अंक घटेर २०१० अंकमा कायम भएको छ । कुल १ अर्ब ८७ करोड रुपैयाँको सेयर कारोबार भयो ।

बैंकिङ ८, विकास बैंक ४७, फाइनान्स ४५, होटल तथा पर्यटन २१, जलविद्युत् ४६, जीवन बीमा २३३, उत्पादन १९०, माइक्रोफाइनान्स ५०, निर्जीवन बीमा ५३, अन्य १६ र ब्यापार उपसमूह ४७ अंक घटे । कुल १८ कम्पनीको मूल्य बढ्दा १६२ को घट्यो भने ३ को स्थिर रह्यो ।

अपर हेवाखोलाको मूल्य ८ प्रतिशत बढ्यो । कालिका पावर, सामलिङ पावर र जल्पा लघुवित्तको मूल्य २ प्रतिशत बढ्यो । गुराँस लघुवित्तको मूल्य ७ प्रतिशत घट्यो । हिमालयन डिस्टिलरीको ६, इमर्जिङको ५.८ र नेपाल लाइफको मूल्य ५.७ प्रतिशत घट्यो । कारोबार रकमका आधारमा हिमालयन डिस्टिलरी, नेपाल लाइफ, शिवम् सिमेन्ट, स्वाबलम्वन लघुवित्त र नबिल बैंक क्रमश: अगाडि रहे ।


प्रकाशित : श्रावण २९, २०७९ १५:१०
पूरा पढ्नुहोस्
प्रतिक्रिया
पठाउनुहोस्
×