जो इसारा बुझेरै काट्छन् दाह्री-कपाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

जो इसारा बुझेरै काट्छन् दाह्री-कपाल

टीकाप्रसाद भट्ट

रामेछाप — मन्थली नगरपालिका–८ जखनिटार माझीगाउँमा एउटा सैलुङ छ श्याम हेयर कटिङ । उक्त सैलुन अरु सैलुनभन्दा भिन्न छ । गाउँको पहिलो सैलुन, दोस्रो तालिम नलिएका व्यक्ति सञ्चालक र तेस्रो‚ बोल्न नसक्ने । त्यहि सैलुन अहिले सबैको प्यारो लाग्न थालेको छ ।

सैलुन सञ्चालन गर्ने जखनिटारका श्याम माझी बच्चैदेखि बोल्न सक्दैनन् । तर‚ उनले ग्राहकले भनेजस्तै अर्थात् फोटोमा देखाएको जस्तै कपाल‚ दाह्री काटिदिन्छन् र ग्राहकलाई खुसी बनाएर पठाउछन् । मुस्कानसहितको सेवामा खप्पिस श्यामको सैलुनमा थप विशेषता पनि छन् । उनी गाउँका वृद्ध र बालकको कपाल काटेको पैसा लिँदैनन् । पैसा कम भएका मानिसहरू आउँदा जति छ, त्यति लिएर कपाल काटिदिन्छन् ।

सोमबार श्यामको शैलुनमा पुग्दा ४ जना युवाहरू कपाल काट्न लाइनमा थिए । उनी एक जना बालकको कपाल काट्दै भेटिएका थिए । माझीले सोमबार कपाल काटेर १ हजार कमाएका छन् । ३ वर्षदेखि उनको सेवा निरन्तर चलिरहेको छ । कोरोना महामारीको समयमा स्थानीय प्रशासनले सदरमुकामका सैलुन बन्द गरेपछि माझीले एकछत्र व्यापार गरेका थिए । त्यसबेला देखि उनी चम्किएका हुन् । ६ किलोमिटर टाढाको उक्त गाउँमा जिल्ला सदरमुकामदेखि पुगेर कपाल काटेर फर्कन्छन् ।

सैलुनको भित्तामा विभिन्न डिजाइनमा कपाल काटेका फोटा झुन्ड्याइएको छ । उनी जुन फोटो देखायो त्यस्तै कपाल बनाउन पोख्त छन् । ‘जस्तो भन्यो त्यस्तै काटिदिन्छन्’ स्थानीय कृष्ण श्रेष्ठ भन्छन्‚ ‘म सधैं यहीँ आउँछु । श्यामले कपाल काटेको मोल पनि सरल छ ।’ पैसा लिदा १ सय देखि १ सय ५० सम्म लिन्छन् । असाध्यै मेहनतले कपाल काट्ने श्यामले अहिलेसम्म कसैको चित्त दुख्ने गरी कपाल बिगारेका छैनन् । अचम्म त के भने- यस्तो सीप आर्जन गर्नका लागि उनले अहिलेसम्म कुनै संस्थामा गएर तालिम लिएका छैनन्; सबै देखेरै जानेका हुन् ।

सानै उमेरदेखि गाउँमा अरुको कपाल काट्थे । सदरमुकामको सैलुनमा पुगेर फर्केपछि उनलाई पनि गाउँमा सैलुन राख्ने इच्छा जागेको हो । आफ्नै काका केशरबहादुर माझीले चिसापानी जाने सडकसँग जोडेर पक्की घर बनाएका थिए । त्यहि घरको सटरमा उनले सैलुन खोले । एउटा ऐना, केहि कैँची, एउटा कुर्सी राखेर काम थालेका उनको सीप देखेर गत वर्ष मन्थली नगरपालिकाले सैलुनका लागि आवश्यक सामान अनुदानमा हस्तान्तरण गरेको थियो । ठूला ऐना, कपाल काट्ने अटोमेटिक मेसिन, केही स्प्रे, स्याम्पु राख्ने दराजजस्ता सामान मन्थली नगरपालिकाले हस्तान्तरण गरेको थियो । नगरपालिकाले सामान दिएपछि उनी थप हौसिएर काम गरिरहेका छन् ।

श्याम २३ वर्षका भए । उनले विवाह गरी ल्याएकी श्रीमती टिकामाया पनि बोल्न सक्दिनन् । उनले सांकेतिक भाषामा कक्षा १२ पढेकी छन्; सानो काखे छोरा छ; घरमा वृद्ध बा-आमा छन् । श्याम त्यही सैलुनको कमाइले घर धानिरहेका छन् । मासिक करिब १६ हजार रुपैयाँ आम्दानी गर्ने कुरा उनले लेखेर जानकारी दिए । उनले घरको खर्च धानेर बचतसमेत गर्ने गरेका छन् ।

प्रकाशित : श्रावण २८, २०७९ १४:४४
प्रतिक्रिया
पठाउनुहोस्

नेताहरूलाई के गरी मिलाउने भन्ने मेरो सबैभन्दा ठूलो चुनौती भयो : दाहाल 

कान्तिपुर संवाददाता

काठमाडौँ — माओवादी केन्द्रका अध्यक्ष पुष्पकमल दाहालले पार्टीका नेताहरूलाई कसरी एकताबद्ध बनाएर अगाडि बढ्ने भन्ने चुनौती आफूलाई रहेको बताएका छन् । उनले पार्टीको नेतृत्व तहमा रहेका नेताहरूबीचको विवादले जनतामा नराम्रो सन्देश गइरहेको र त्यसलाई कसरी मिलाउने भन्ने सबैभन्दा ठूलो चुनौती रहेको बताए । 

पोस्टबहादुर बोगटी स्मृति प्रतिष्ठानको सातौं वार्षिक साधारणसभा कार्यक्रममा शनिबार दाहालले एक तहका नेताहरूमा पार्टीको विचार, नीति, व्यवहार र नेतृत्वप्रति विश्वास धर्मराएको आफूले देखेको अध्यक्ष दाहालको भनाइ थियो । 'नेताहरूको एउटा पंक्तिमा विचार, व्यवहार, नीति, नेतृत्वप्रतिको विश्वास धर्मराएको देखिन्छ । नेताहरू एकढिक्का भएर जाने हो भने जनता जुरुक्क उठ्ने सम्भावना छ,' दाहालले भने, 'मेरो चुनौती नेताहरूलाई के गरी मिलाउने भन्ने, आजको सबैभन्दा ठूलो चुनौती भएको छ । नेताहरूलाई मात्रै मिलाउन सक्ने र एकढिक्का भएर यो पार्टी नेतृत्वमा स्थपित गर्ने हो भने जनतामा दुःख छैन ।'

तराई-मधेसका नेताहरूमा विवाद रहेकाले स्थानीय तह निर्वाचनमा ५० ठाउँमा पराजित हुनुपरेको दाहालको भनाइ थियो । मधेसमा अरु पार्टीबाट माओवादीमा कार्यकर्ता र बुद्धिजीवी प्रवेश गरिरहँदा पार्टीका शीर्ष नेताहरू भने आपसमा लडाइ गरिरहेको भन्दै उनले असन्तुष्टि पोखे । 'तराई-मधेसमा यो बीचमा हजारौं कार्यकर्ता, बुद्धिजिवी पार्टीमा प्रवेश गरेका छन् । हाम्रै पार्टीका नेताहरू एकले अर्कालाई के गरी खुट्टा तान्ने र हराउने हो भन्ने तँछाड र मँछाड भएको छ । अनि नेताहरूको लागि छानबिन समिति बनाउनुपर्ने अवस्था आएको छ,' उनले भने ।

दाहालले विगतमा माओवादीमा रहेका र विभिन्न कम्युनिस्ट पार्टीमा रहेका नेता तथा समूह एकतामा आउन लागेको बताएका थिए । उनले दाबी गरे, 'पूर्वमाओवादी र कम्युनिस्ट घटकहरू आउने क्रम चलेको छ । कतिपय समूहगत एकता गर्ने कुरा भएको छ ।' आउने प्रतिनिधिसभा र प्रदेश सभाको निर्वाचनमा पार्टीका शीर्ष नेतादेखि कार्यकर्तासम्म एकताबद्ध भएर गयो भने वामपन्थी दलहरूमध्ये माओवादी पहिलो पार्टी बन्ने सम्भावना रहेको उनको भनाइ थियो ।

प्रकाशित : श्रावण २८, २०७९ १४:१६
पूरा पढ्नुहोस्
प्रतिक्रिया
पठाउनुहोस्
x
×