दाहाल-नेपाल देउवाका कारिन्दामात्रै : भट्टराई - समाचार - कान्तिपुर समाचार
कान्तिपुर वेबसाईट
AdvertisementAdvertisement

दाहाल-नेपाल देउवाका कारिन्दामात्रै : भट्टराई 

लक्ष्मी गौतम

पाँचथर — नेकपा (एमाले)का सचिव योगेश भट्टराईले माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधवकुमार नेपाललाई प्रधानमन्त्री तथा नेपाली कांग्रेस सभापति शेरबहादुर देउवाको कारिन्दाको संज्ञा दिएका छन् । दाहाल र नेपाल दुवैमा विचार, अडान र सिद्वान्तको खडेरी लागेको उनको आरोप थियो । 

पार्टी कामको सिलसिलामा पाँचथरको फिदिम आइपुगेका भट्टराईले कान्तिपुरसँग कुराकानी गर्दै दाहाल र नेपालमा नैतिकता गुमेकै कारण विचार र सिद्वान्त नमिल्ने कांग्रेससँगको गठबन्धन मजबुद बनाउन लागेको बताए ।

‘दुवै पार्टी संकटमा रहेकाले कांग्रेसको बुइ चढेका हुन्, कांग्रेस, माओवादी केन्द्र र एकीकृत समाजवादीसहितका दलहरुको गठबन्धन अपवित्र र अनैतिक छ,' उनले भने, 'यसले देश र जनताको भलो गर्दैन ।’

बहुदलीय व्यवस्थामा विशेष परिस्थितिबाहेक जुनसुकै चुनावमा गठबन्धन गर्नु उपयुक्त नहुने उनको धारणा थियो । एक्लाएक्लै लडेमात्रै आफ्नो धरातल थाहा पाइने भन्दै भट्टराईले आसन्न प्रतिनिधि र प्रदेशसभा निर्वाचनमा एमाले एक्लै लड्ने मनस्थितिमा रहेको पनि बताए ।

प्रकाशित : श्रावण २४, २०७९ १६:४९
प्रतिक्रिया
पठाउनुहोस्

बिहारमा नीतीशले तोडे भाजपासँगको गठबन्धन

राजद र कांग्रेसको समर्थनमा फेरि मुख्यमन्त्री बन्ने तयारी
कान्तिपुर संवाददाता

काठमाडौँ — भारतको बिहार राज्यमा जनता दल युनाइटेड(जदयू) ले भारतीय जनता पार्टीसँगको सत्ता सहकार्य तोडेको छ । बिहारका मुख्यमन्त्री नीतीश कुमारले नयाँ गठबन्धन निर्माणका लागि भाजपासँगको सहकार्य तोडेका हुन् । उनले केही समयअगाडि पटनास्थित राजभवन पुगेर राज्यपाल फागु चौहानलाई राजीनामा बुझाएको भारतीय सञ्चारमाध्यमले जनाएका छन् । 

भाजपासँगको सहकार्य तोड्दै नीतीशले राष्ट्रिय जनता दल(राजद), भारतीय राष्ट्रिय कांग्रेस र वाम दलहरूको समर्थनमा सरकार बनाउने बताइएको छ । पटक-पटक सरकार बनाउनका लागि गठबन्धन फेरिरहने नीतीश राजदको समर्थनमा पुन: मुख्यमन्त्री बन्ने छन् । उनले भारतीय इतिहासमै सबैभन्दा बढी ८ पटक मुख्यमन्त्रीका रूपमा शपथ लिनेछन् । उनी यस्तो मुख्यमन्त्री हुन् जसको पार्टीले कहिल्यै पूर्ण बहुमत ल्याएको छैन तर पनि १५ वर्षदेखि बिहारको मुख्यमन्त्री छन् ।

नीतीशले राजीनामा बुझाएपछि पत्रकारहरूसँगको कुराकानीमा सबै सांसदहरूबीच बीजेपी नेतृत्वको गठबन्धन नेसनल डेमोक्रेटिक अलायन्स (एनडीए) छाड्ने सहमति भएको बताएका छन् । बिहारमा नयाँ सरकार गठन गर्नका लागि कांग्रेस र वामपन्थी दलले राजदका नेता तेजस्वी यादवलाई समर्थन पत्र बुझाइसकेका छन् ।

पूर्वमुख्यमन्त्री लालु यादवका छोरासमेत रहेका तेजस्वीले गृह मन्त्रालय र सभामुख आफूहरूले पाउनुपर्ने माग अगाडि सारेका छन् । तेजस्वी यसअघि पनि नीतीश नेतृत्वको सरकारमा उपमुख्यमन्त्री बनिसकेका छन् । यसअघि २०१५ मा जदयू, राजद, कांग्रेस र वामपन्थी दल महागठबन्धन बनाएर भाजपाविरुद्ध चुनाव लडेका थिए । उनीहरूले सरकार बनाए पनि बीचमै नीतीशले गठबन्धन तोड्दै भाजपासँग सहकार्य गरेका थिए । २०१७ मा उनी एनडीए गठबन्धनमा गएका थिए ।

भाजपाले क्षेत्रीय पार्टीहरूसँग तालमेल गरी राज्यहरूमा आफ्नो उपस्थिति बलियो बनाउँदै गएको आरोप लागेको छ । २०१७ मा ७१ सिट भएको जदयू भाजपासँगको तालमेलमा २०२० को चुनावमा मात्र ४५ सिटमा विजयी भएको थियो । कुनै समय बिहारमा 'सुशासन बाबु' का नामले समेत चिनिने नीतीशको लोकप्रियता पछिल्लो समय भने घट्दै गएको छ ।

२४३ विधायक रहेको बिहारमा सरकार बनाउन १२२ जनाको समर्थन चाहिन्छ। बिहारमा राजद ७९ सिटसहित सबैभन्दा ठूलो पार्टीका रूपमा रहेको छ । त्यस्तै जदयूको ४५ सिट रहेको छ । त्यस्तै भारतीय कांग्रेसको १९ र वामपन्थी दलहरूको १६ सिट रहेको छ । त्यस्तै भाजपासँग भने ७७ विधायक रहेका छन् । यस्तोमा नीतीशले करिब २ तिहाइ विधायकको समर्थन पाउने देखिन्छ ।

भारतमा पछिल्ला केही वर्षमा भाजपाले आफ्नो पकड बलियो बनाउँदै गएका बेला प्रतिपक्ष भने कमजोर हुँदै गएको छ । यही अवस्थामा नीतीशलाई सशक्त प्रतिपक्ष नेताका रूपमा हेरिएको छ । २०२४ मा हुने भारतीय लोकसभा चुनाव र २०२५ मा हुने बिहार विधानसभा चुनावसम्म पछिल्लो समीकरण कायम रहे भाजपालाई चुनौती थपिन सक्छ ।

सन् २०१९ को लोकसभा चुनावमा बिहारले एनडीएलाई ठूलो जित दिलाएको थियो । बिहारका ४० मध्ये ३९ सिट एनडीएले जितेको थियो । २०२४ को लोकसभा चुनावमा प्रतिपक्ष नेताका रूपमा नीतीशसहित पश्चिम बंगालकी मुख्यमन्त्री ममता बनर्जीसम्मका नेताहरूले चुनौती थप्न सक्ने देखिएको छ ।

प्रकाशित : श्रावण २४, २०७९ १६:४१
पूरा पढ्नुहोस्
प्रतिक्रिया
पठाउनुहोस्
×