काेही आजीवन उम्मेदवार, कोही मतदाता मात्रै बन्ने अवस्था अन्त्य हुनुपर्छ : सांसद पाण्डे - समाचार - कान्तिपुर समाचार

काेही आजीवन उम्मेदवार, कोही मतदाता मात्रै बन्ने अवस्था अन्त्य हुनुपर्छ : सांसद पाण्डे 

कान्तिपुर संवाददाता

काठमाडौँ — एमालेकी सांसद बिन्दा पाण्डेले निर्वाचनसँग सम्बन्धित कानुन संशोधन गरेर संविधानको मर्मअनुसारका बनाउनुपर्ने माग गरेकी छन् । प्रतिनिधिसभाको मंगलबारको बैठकमा ध्यानाकर्षण प्रस्ताव राख्दै पाण्डेले कुनै एक नेता एउटा निर्वाचन क्षेत्रबाट आजीवन उम्मेदवार बन्ने र बाँकीले उसको मतदाता मात्रै बन्ने अवस्थाको अन्त्य गर्न कानुनी संशोधन हुनुपर्ने प्रस्ताव गरेकी हुन् । 

प्रतिनिधिसभा र प्रदेशसभाको मंसिर ४ गते हुने निर्वाचनका लागि निर्वाचनसँग सम्बन्धित कानुन संशोधन गर्नुपर्ने पाण्डेको माग छ । उनले एक व्यक्ति कुनै एक निर्वाचन क्षेत्रबाट लगातार २ पटक मात्रै उम्मेदवार बन्न पाउने वा समानुपातिकबाट २ पटक मात्रै सांसद बन्न पाउने कानुनी व्यवस्था गर्न प्रस्ताव गरेकी छन् ।

'संघीय संसद्को प्रतिनिधिसभा र प्रदेश सभाको समानुपातिक र पहिलो हुने दुवै निर्वाचन प्रणालीअन्तर्गत एउटै व्यक्ति, एउटै निर्वाचन क्षेत्र र एउटै निर्वाचन प्रणालीअन्तर्गत निरन्तर बढीमा २ पटक मात्रै उम्मेदवार हुने व्यवस्था गर्नुपर्छ । अहिलेको कोही आजीवन उम्मेदवार भइरहने र अरु आजीवन कसैको लागि मतदाता मात्रै बन्ने अवस्थाको अन्त्य हुनुपर्छ,' उनको माग थियो ।

कोही व्यक्ति संसद्‍मा अपरिहार्य छ भन्ने दललाई लागेमा फरक निर्वाचन क्षेत्र र फरक निर्वाचन प्रणालीबाट आउन सक्ने छुट दिने कानुन बनाउनुपर्ने पाण्डेको प्रस्ताव छ । 'कोही व्यक्ति संसद्का लागि अपरिहार्य छ भनेर सम्बन्धित दलले अनुभूति गर्छ भने त्यस्ता व्यक्तिलाई फरक निर्वाचन प्रणाली वा फरक निर्वाचन क्षेत्रबाट उम्मेदवार बन्न सक्ने व्यवस्था गर्न सकिन्छ । एउटै व्यक्ति एउटै निर्वाचन क्षेत्रबाट निरन्तर आजीवन उम्मेदवार बन्ने कुराको अन्त्य गर्नुपर्छ,' उनले भनिन् ।

स्थानीय तहको प्रमुख/उपप्रमुख तथा अध्यक्ष/उपाध्यक्षमा दुई कार्यकाल निर्वाचित व्यक्ति तेस्रोपटक उम्मेदवार बन्न नपाउने व्यवस्था स्मरण गराउँदै सांसद पाण्डले अब त्यो व्यवस्था स्थानीय तहका अन्य कार्यकारी पद र प्रतिनिधिसभा तथा प्रदेश सभामा लागू गर्नुपर्ने बताइन् । स्थानीय तहका लागि कानुनी व्यवस्था गरिएको तर प्रतिनिधिसभा र प्रदेश सभाका लागि भने त्यो व्यवस्था नगरिएकोमा उनले आलोचना गरिन् ।

'अहिले निर्वाचन आयोगले निर्वाचनसँग कानुनलाई संविधानसम्मत ढंगले संशोधन गर्नका लागि मस्यौदा तयारी गरिरहेको स्थिति छ । मंसिर ४ गते हुने निर्वाचनमा संविधानसम्मत बनाउनका लागि संसद्‍मा ती संशोधन कानुन पेस गरियोस् भन्ने सरकारलाई आग्रह गर्न चाहन्छु । यो संसद्‍बाट पारित भएर मात्रै त्यो निर्वाचनमा जानुपर्छ भन्ने कुरा पनि मैले ध्यानाकर्षण गर्न चाहे,' उनले भनिन् ।

प्रकाशित : श्रावण २४, २०७९ १२:२३
प्रतिक्रिया
पठाउनुहोस्

देउवालाई भेटेर खनालले भने : कसैलाई अपमान हुने गरी सिट बाँडफाँड नहोस्

'वाम एकताका लागि एमालेले रुचि देखाएन'
कान्तिपुर संवाददाता

काठमाडौँ — नेकपा (एकीकृत समाजवादी) का नेता एवं पूर्व प्रधानमन्त्री झलनाथ खनालले आगामी निर्वाचनमा गठबन्धन गरेर जाँदा सबै दललाई समान ढंगले सिट बाँडफाँट हुनुपर्ने बताएका छन् । 

मंगलबार प्रधानमन्त्री शेरबहादुर देउवालाई नेपाली चियाको गुणस्तरका बारेमा भारतमा विभिन्न प्रतिवेदन पेस भइरहेकोबारे जानकारी गराउन बालुवाटार पुगेका खनालले स्थानीय निर्वाचनलाई हेरेर सिट बाँडफाँड हुनुपर्ने बताएका हुन् ।

नेता खनालले प्रत्येक पार्टीको आफ्नो हैसियत हुने भएकोले २०७४ को निर्वाचन र हालै सम्पन्न स्थानीय तहको निर्वाचनलाई मध्यनजर गरेर आगामी प्रदेश र संघको निर्वाचनमा सिट बाँडफाँड गर्न आवश्यक रहेको बताए ।

गठबन्धनमा सहभागी दललाई अपमान गरेमा तालमेल नहुने भन्दै सबैलाई दललाई समान रूपमा सिट बाँडफाँड गर्ने बुटी खोजेर अघि बढ्नुपर्ने खनालको भनाइ थियो ।'गठबन्धनमा दलहरु जे आधारमा थपिन्छन्, त्यही आधारमा आवश्यक पर्ने ठाउँमा तालमेलको कुरा हुन्छ । तालमेल गर्दा प्रत्येक पार्टीको आफ्नो हैसियत हुन्छ । २०७४ को निर्वाचनको कुरा, भर्खरै सम्पन्न भएको स्थानीय निर्वाचनको परिणाम यी सबै आधारमा उभिएर सबैलाई समान हुने ढंगले हामीले तालमेल गर्नुपर्छ । कसैले अपमान फिल गरेमा उ तालमेलमा आउँदैन । सबैलाई समान हुने खालको तालमेलको बुटी बनाउन आवश्यक छ,' उनले भने ।

त्यस्तै आगामी प्रदेश तथा प्रतिनिधिसभा चुनाव अगाडि वाम एकता हुने सम्भावना नरहेको पनि खनालले बताए । सबैभन्दा ठूलो वामपन्थी दल एमालेले एकताका लागि कुनै पहल नगरेको उनको भनाइ थियो । ' वाम एकताका लागि सबैभन्दा ठूलो पार्टीले पहल गर्नुपर्ने हो, उसमा त्यो रुचि मैले देखिनँ । बृहत् वाम एकताको सम्भावना अहिले छैन,' उनले भने ।

प्रकाशित : श्रावण २४, २०७९ १२:१०
पूरा पढ्नुहोस्
प्रतिक्रिया
पठाउनुहोस्
×