सजाय भुक्तान गरेर फर्किएकैको योजनामा चिनियाँको अपहरण- समाचार - कान्तिपुर समाचार
कान्तिपुर वेबसाईट
AdvertisementAdvertisement

सजाय भुक्तान गरेर फर्किएकैको योजनामा चिनियाँको अपहरण

कान्तिपुर संवाददाता

काठमाडौँ — अपहरण तथा शरीर बन्धकसम्बन्धी कसुरमा सजाय भुक्तान गरेर फर्किएका लक्ष्मण गुरुङको योजनामा बुधबार साँझ चिनियाँ नागरिक याङ याङ र उनका दोभासे सूर्यबहादुर राईलाई अपहरण गरेको खुलेको छ ।

काठमाडौं महानगरपालिका-२ लाजिम्पाट खरेलटोलमा फ्ल्याट लिएर बसेका चिनियाँ नागरिक याङ याङ र ओखलढुङ्गा चिशखुगढी गाउँपालिका-५ चिसापानी घर भई वनस्थली बस्ने चिनियाँ भाषा दोभासे २६ वर्षीय सूर्यबहादुर राईलाई अपहरण गरी अपहरणकारीले १ करोड रुपैयाँ फिरौती मागेका थिए ।

साउन १८ (बुधबार) साँझ उनीहरूलाई अपहरण गरेको अरोपमा प्रहरीले मुख्य योजनाकार गोरखाको सिरानचोक गाउँपालिका-५ घर भई धापासी बस्ने २८ वर्षीय लक्ष्मण गुरुङसहित ६ जनालाई पक्राउ गरेको थियो । लक्ष्मण यसअघि पनि अपहरण तथा शरीर बन्धकसम्बन्धी कसुरमा पक्राउ परेर सजाय भुक्तान भएको प्रारम्भिक अनुसन्धानमा खुलेको काठमाडौं प्रहरी प्रवक्ता एसपी दिनेशराज मैनालीले जानकारी दिएका छन् ।

प्रहरीको आपराधिक अभिलेखअनुसार गुरुङ २०७१ भदौ २९ गते मुद्दा नम्बर १३७ तथा २०७३ चैत्र १६ गते मुद्दा नम्बर २४७ मा अपहरण तथा शरीर बन्धकसम्बन्धी कसुरमा मुद्दा दर्ता भई पक्राउ परेका थिए । उक्त मुद्दामा ३ वर्ष कैद सजाय भुक्तान भएको प्रारम्भिक अनुसन्धानमा खुलेको प्रहरीले जनाएको छ ।

प्रहरीले उक्त फैसलाको प्रतिलिपी अदालतबाट माग गरेको र आवश्यक अनुसन्धान भइरहेको एसपी मैनालीले बताए । हिमालराज गिरीलाई लक्ष्मणसहितको समूहले पटक-पटक फोन गरी धम्क्याएर फिरौती असुलेका थिए । ‘जेल बसेर निस्किका आरोपी मुख्य योजनाकार भएको खुलेको छ,’ एसपी मैनालीले भने, ‘अपहरण उद्योगमा जेल बसेर निस्केका गुरुङले नै प्रहरीलाई समेत संलग्न गरी योजना बनाएको पाइएको छ ।’

प्रहरीले अपहरणका योजनाकार लक्ष्मण गुरुङ, पाटन उच्च अदालतका एक न्यायाधीशका पीएसओ हवल्दार गोरखा आरुघाट गाउँपालिका-७ घर भई रानीबारी बस्ने ३७ वर्षीय कर्णबहादुर गुरुङ र प्रहरी वृत्त बालाजुमा कार्यरत घुमुवा प्रहरी जवान बर्दिया राजापुर नगरपालिका-१० घर भई बालाजु बस्ने २८ वर्षीय शिव सुनार, सर्लाही लालबन्दी नगरपालिका-११ घर भई मित्रनगरस्थित सिन्धुली गेस्टहाउस बस्ने २९ वर्षीय रोहित मगर, प्यूठान नगरपालिका-८ बागदुला घर भई मित्रनगर बस्ने २८ विशाल मगर, नुवाकोट शिवपुरी गाउँपालिका-६ पालथोक घर भई बानियाँटार बस्ने २७ वर्षीय विनोद केसीलाई पक्राउ गरी अनुसन्धान थालेको छ ।

चिनियाँ नागरिक याङ याङ कल सेन्टर सञ्चालक भएको र पछिल्लो समय प्रहरीले कल सेन्टरमा छापा मार्न थालेपछि दरबारमार्गस्थित उत्तर ढोकाको कल सेन्टर छाडेर फ्ल्याटमा बस्न थालेको सुइँको पाएका प्रहरीको सूचनाको आधारमा लक्ष्मणले अपहरणको योजना बनाएको पाइएको छ ।

ती चिनियाँ कल सेन्टर छाडेर भाग्न लागेको र अवैधानिक कल सेन्टरबाट प्रशस्त रकम कमाएको सुइँको पाएको प्रहरी हवल्दार गुरुङ र घुमुवा प्रहरी जवान सुनारले लक्ष्मणलाई सघाएका थिए । उनीहरूविरुद्ध मुलुकी अपराध संहिता ऐन, २०७४ को परिच्छेद-१७ को अपहरण वा शरीर बन्धकसम्बन्धी कसुरमा काठमाडौं जिल्ला अदालतबाट म्याद थप भई अनुसन्धान भइरहेको छ ।

प्रकाशित : श्रावण २३, २०७९ १०:०१
प्रतिक्रिया
पठाउनुहोस्

दसैं खर्च जोहो गर्न भारततिर

जमुनाह नाका हुँदै दैनिक एक हजार जना भारततर्फ जाँदै
रूपा गहतराज

नेपालगन्ज — नेपाल–भारत सीमा नाका जमुनाह हुँदै भारततर्फ जानेको अहिले ताँती लागेको छ । कोही एक्लै त कोही समूहमा झोला–गुन्टा बोकेर भारततिर लागेका भेटिन्छन् । रोपाइँका लागि घर फर्केकाहरू दसैं खर्च जुटाउन भारत जान लागेका हुन् । असारे रोपाइँ सकेर परिवारको आवश्यकता पूरा गर्न दैनिक हजारौं संख्यामा नेपाली भारततर्फ जाँदै गरेको दृश्य जमुनाह नाकामा दैनिक देखिन्छ ।

शुक्रबार सीमा नाका जमुनाहमा भेटिएका दाङका मोहन वलीले रोपाइँ सकेर भारत जान लागेको बताए । ‘वर्षभरि खाने खेती रोप्न आएको थिएँ,’ उनले भने, ‘अब चाडपर्वको खर्च जोहो गर्न फेरि हिंडियो मुम्बईतिरै ।’ उनको समूहमा गाउँका १० जना युवा उनीसँगै भारततिर जाँदै थिए । वर्षमा ६ महिना नेपाल र ६ महिना भारतमै बित्ने गरेको उनीहरूले सुनाए ।

झन्डै ३० वर्षदेखि भारतमा काम गर्दै आएका दैलेखका रमेश विष्टले भारत नगई आफ्नो दैनिक नचल्ने बताए । भारतीय बस छुट्छ कि भनी हतारमा हिंडिरहेका उनले सिमला जाने बताए । ६ जनाको परिवार पाल्न भारत जानैपर्ने बाध्यता रहेको उनले सुनाए । ‘जुनै व्यवस्था आए पनि हाम्रो अवस्था बदलिएन,’ उनले दुःखेसो सुनाए, ‘खेतीपातीका बेला स्वदेश र अन्य बेला झोला बोकी भारत नपसी सुखै छैन ।’

सल्यानका मोहनलाल रोकाले भने गाउँमा काम गर्ने वातावरण नहुँदा भारत जानुपर्ने बाध्यता रहेको सुनाए । ‘गाउँमा काम छैन । गरेको कामको पनि उचित पारिश्रमिक पाइँदैन,’ उनले भने, ‘हाम्रो नेपालमा राम्रो रोजगारको व्यवस्था नभएकाले भारत जानु परेको छ । गरिबलाई हेर्ने सरकार कहिल्यै देख्न पाइएन ।’ सरकारले समेत यस्ता विषयमा चासो नदिंदा वर्षौंदेखि भारतीय नागरिकबाट हेलाको पात्र हुन बाध्य भएको सुर्खेतका मानबहादुर रोकाले बताए । ‘घरपरिवार छोडेर अर्काको देशमा काम गर्न जाने रहर त कसलाई हुँदो हो र? तर, गुजाराका लागि जानैपर्ने बाध्यता छ,’ उनले भने, ‘नेताहरू कार्यकर्ता पोस्नमै व्यस्त छन्, हाम्रो हालत जस्ताको त्यस्तै छ ।’

कक्षा १२ पास गरे पनि स्वदेशमा केही काम नपाएपछि भारतमा मजदुरी गर्न जान लागेको दैलेखका डम्बर थापाले बताए । ‘अब चाडपर्व सुरु हुन थाल्यो, खर्चपानी चाहियो । परिवार त पाल्नै पर्‍यो,’ उनले भने, ‘नेपालमा हाम्रा लागि जागिर छैन । आफ्ना मान्छे हेरी यहाँ काम दिइन्छ । भनसुनबिना कामै पाइँदैन ।’ नेपालमा रोजगारीको अभाव रहेको र स्वरोजगारका लागि सीप र लागतको अभावले रोजगारीका लागि वर्षैपिच्छे भारत जानुपरेको सल्यानका गणेश बुढाथोकीले सुनाए । ‘आफूसँग हातमा सीप छैन, व्यापार–व्यवसाय गर्न लगानी छैन । त्यसैले बाध्यताले भारतमा मजदुरी गर्न जानु परेको छ,’ उनले भने, ‘आफ्नै गाउँठाउँमा बस्ने रहर त कसलाई हुँदैन र ∕ तर, यहाँ काम पाइँदैन ।’

अहिले जमुनाह नाकामा दिनहुँ भारततर्फ जाँदै गरेका नेपालीको घुइँचो देखिन्छ । दैनिक एक हजारको संख्या यो नाका हुँदै भारत जाने गरेको इलाका प्रहरी कार्यालय जमुनाहका इन्चार्ज वरिष्ठ प्रहरी नायव निरीक्षक माधव रिजालले बताए । ‘अहिले स्याउ टिप्ने सिजन भएकाले सिमला जानेहरूको संख्या बढी छ,’ उनले भने, ‘स्वदेशमा रोजगारी नपाएपछि दैनिक गुजाराका लागि भारततिरै जानुपर्ने विकल्प उनीहरूसामु छ ।’

प्रकाशित : श्रावण २३, २०७९ ०९:४७
पूरा पढ्नुहोस्
प्रतिक्रिया
पठाउनुहोस्
x
×