'तीन जनाको टाउकोमा प्रहार, शरीरमा चोटैचोट, दिनेशको मृत्यु झुण्डिएर'- समाचार - कान्तिपुर समाचार
कान्तिपुर वेबसाईट
AdvertisementAdvertisement
काभ्रेस्थली घटना

'तीन जनाको टाउकोमा प्रहार, शरीरमा चोटैचोट, दिनेशको मृत्यु झुण्डिएर'

मातृका दाहाल

काठमाडौँ — परिवारै सखाप हुने गरी भएको तारकेश्वर नगरपालिकाको काभ्रेस्थली घटनामा तीन जनाको टाउकोमा बोधो वस्तुले प्रहार, शरीरका विभिन्न भागमा धारिलो वस्तुले घोपेर तथा एक जनाको झुण्डिएर मृत्यु भएको पोस्टमार्टम रिपोर्टले देखाएको छ ।

प्रतिकात्मक तस्बिर : सटरस्टक

भीमसेनथापा गाउँपालिका–६ गोरखा स्थायी घर भई काठमाडौंको तारकेश्वर नगरपालिका २, पदमसालमा बस्दै आएका एकै परिवारका चार जना ४१ वर्षीय दिनेश पाण्डे, उनकी पत्नी ३९ वर्षीय सुनिता, १३ वर्षकी छोरी आशिका र ८ वर्षीय छोरा आशिक साउन १६ गते बिहान घरमै मृत फेला परेका थिए । त्यसपछि प्रहरीले शव र घटनाको मुचुल्का उठाएर पोस्टमार्टमका लागि चारै जनाको शव त्रिवि शिक्षण अस्पताल महाराजगन्ज पठाएको थियो ।

प्रहरीको प्रारम्भिक अनुसन्धानमा दिनेशले श्रीमती र छोराछोरीको हत्या गरेर आत्महत्या गरेको हुन सक्ने उल्लेख गरिएको थियो । शिक्षण अस्पतालको पोस्टमार्टम रिपोर्टले पनि तीन जनाको हत्या गरेर दिनेशले झुण्डिएर आत्महत्या गरेको हुनसक्ने देखाउँछ । पोस्टमार्टममा संलग्न चिकित्सकका अनुसार दिनेशको मृत्यु ‘हृयांगिङ’बाट भएको देखिन्छ । ती चिकित्सकले सुनिता, आशिका र आशिकको मृत्युको कारण टाउकोमा बोधो वस्तुले हानेर अनि शरीरका विभिन्न भागमा धारिलो वस्तु घोपेर भएको देखिन्छ ।

‘सुनिता, आशिका र आशिकको मृत्यु शरीरका विभिन्न भागमा ‘मल्टिपल स्ट्याविङ’ (विभिन्न भागमा घोपेर) र टाउकोमा ‘ब्लन्ट हन्ट’ (बोधो वस्तुले प्रहार) बाट भएको देखिन्छ,’ पोस्टमार्टममा संलग्न एक चिकित्सकले कान्तिपुरसँग भने, ‘दिनेशको देब्रे हात र पेटमा चोट लागेको तथा घाँटीमा डोरीले बेरिएरको देखिन्छ । यसलाई हामीले ‘पार्सियल हृयांगिङ’बाट डेथ भएको उल्लेख गरेका छौं ।’

पोस्टमार्टम रिपोर्टलाई आधार मानेर घटनाको विश्लेषण गर्दा दिनेशले श्रीमती सुनिता, छोरी आशिका र छोरा आशिकको पहिला हत्या गरेर उनले आत्महत्या गरेको देखिन्छ । पोस्टमार्टम रिपोर्टमा तीन जानमाथि छाती र पेटसहित शरीरका भित्रि भागसम्म धारिलो वस्तुले घोपेको चोट देखिन्छ । त्यस्तै टाउकोमा बोधो वस्तुले प्रहार (ब्लन्ट हन्ट) गरिएको देखिएको छ ।

पोस्टमार्टममा संलग्न चिकित्सक र अनुसन्धानमा खटिएका प्रहरी अधिकारी दिनेशले तीन जनालाई बेहोस बनाउन पहिले टाउकोमा हानेर त्यसपछि धारिलो वस्तुले घोपेको हुन सक्ने बताउँछन् । उनका अनुसार परिवारका सदस्यको हत्या गरेर विछिप्त बनेपछि आफ्नै शरीरका विभिन्न भागमा धारिलो वस्तु प्रहार गरेको र त्यसको पीडा खप्न नसकेर घाँटीमा डोरीले बेरेर मृत्यु रोजेको हुनसक्ने देखिन्छ ।

शिक्षण अस्पताल महाराजगन्जमा कार्यरत फरेन्सिक विज्ञ डा. गोपाल चौधरीले घटना विश्लेषण, प्रकृति, स्थलगत अवलोकन र पोस्टमार्टम रिपोर्ट केलाउँदा दिनेशले तीन जनाको हत्या गरेर आत्महत्या गरेको हुनसक्ने बताए । ‘पोस्टमार्टम रिपोर्टको नतिजा अनि घटनाको स्थलगत अवलोकन/विश्लेषण गर्दा घटना दिनेशबाटै भएको हुनसक्ने देखिन्छ, हामीले रिपोर्ट प्रहरीलाई पठाइसकेका छौं, यस बारेको बाँकी विषय प्रहरीबाटै आउला ।’ प्रहरीले घटनास्थलमा फेला पारेको मृतक दिनेशको सुसाइड नोटमा पनि ‘श्रीमती र छोरा/छोरीको हत्या गरेर आफूले आत्महत्या गर्न बाध्य भएको’ उल्लेख छ ।

१२ वर्ष कुवेत बसेर केही वर्षअघि मात्रै फर्किएका दिनेश र उनकी श्रीमती सुनिताको केही वर्षयता पारिवारिक सम्बन्ध राम्रो नभएको र त्यसबाटै उत्पन्न विवाद हत्याको रुपमा पुगेको प्रहरीले जनाएको छ ।

सुसाइड नोटमा दिनेशले पत्नीसँग सम्बन्ध बिग्रिएको, माइतीपक्षसँग मिलेर सम्पत्ति हडप्न खोजेको, आफूलाई घरेलु हिंसा गरेको आरोपमा प्रहरीमा थुनाएको लगायत विषय उल्लेख गरेका छन् । सुसाइड नोटमा दिनेशले छोराछोरीलाई एक्लै राख्न नसकेर सँगै लग्नु (मार्नु) परेको उल्लेख गरेका छन् ।

दिनेश र सुनिताबीचको पारिवारिक विवाद प्रहरीसम्मै पुग्ने गरेको र मिलापत्र टुंगिने गरेको देखिएको छ । तर, यस पटक श्रीमती र सन्तानको हत्या गरेर उनले आत्महत्या गर्न बाध्य भएको सुसाइड नोटमै खुलाएका छन् ।

प्रकाशित : श्रावण २०, २०७९ १७:४२
प्रतिक्रिया
पठाउनुहोस्

चिनियाँ विदेश मन्त्रालयले गर्‍यो परराष्ट्रमन्त्री खड्काको भ्रमणतालिका सार्वजनिक

दुई देशका विदेशमन्त्रीहरूले एक वर्षभन्दा कम अवधिमा भ्रमण आदानप्रदान गरेका छन्, जसले चीन र नेपालबीचको आपसी विश्वास र मित्रतालाई झल्काउँछ : चिनियाँ विदेश मन्त्रालय
लक्ष्मी लम्साल

बेइजिङ — परराष्ट्रमन्त्री नारायण खड्काले चीनको भ्रमण गर्ने कुरा बेइजिङले पुष्टि गरेको छ। शुक्रबार बेइजिङमा पत्रकार सम्मेलन गरी चिनियाँ परराष्ट्र मन्त्रालयकी प्रवक्ता ह्वा छुन् यिङले अगस्ट ८ देखि १० तारिखसम्म नेपालका परराष्ट्रमन्त्री खड्काले चीनको भ्रमण गर्न लागेको पुष्टि गरेकी हुन्।

पत्रकार सम्मेलनमा प्रवक्ता ह्वाले नेपाल र चीन असल छिमेकी तथा साझेदार भएको बताउँदै नेपाली परराष्ट्रमन्त्री खड्काको यो भ्रमण चिनियाँ स्टेट काउन्सिलर तथा विदेशमन्त्री वाङ यीको गत मार्चमा भएको नेपाल भ्रमणको आदानप्रदान भएको बताइन्।

‘एक वर्षभित्रमा दुवै देशबाट मन्त्रीस्तरीय आउजाउले नेपाल र चीनबीचको विश्वासलाई प्रगाढ बनाएको छ’, प्रवक्ता ह्वाले भनिन्, ‘दुई देशका विदेशमन्त्रीहरूले एक वर्षभन्दा कम अवधिमा भ्रमण आदानप्रदान गरेका छन्, जसले चीन र नेपालबीचको आपसी विश्वास र मित्रतालाई झल्काउँछ।’

प्रवक्ता ह्वाका अनुसार चिनियाँ पक्षले यस भ्रमणबाट नेपाली पक्षसँग रणनीतिक सम्पर्कलाई थप सुदृढ गर्ने, एकअर्कालाई दृढताका साथ सहयोग गर्न र विकास तथा समृद्धिका लागि दीर्घकालीन रणनीतिक साझेदारीलाई अगाडि बढाउन सघाउने अपेक्षा गरेको छ।

चिनियाँ परराष्ट्रमन्त्री वाङले नेपाल र दक्षिण कोरियाली विदेशमन्त्रीलाई एकैसाथ शानतोङ प्रान्तको छिङ्ताओमा स्वागत गर्ने कार्यक्रम छ। विश्वचर्चित छिङ्ताओ बियर महोत्सवको ३२औं संस्करण समापन भएको भोलिपल्ट सो स्थलमा यो भेटघाट तय भएको छ। त्यसअघि अगस्ट ६ देखि ८ तारिखसम्म चिनियाँ विदेशमन्त्री वाङ यीले बांग्लादेश र मंगोलियाको भ्रमण गर्ने र त्यो भ्रमण सकिएपछि छिङ्ताओमा नेपाली तथा दक्षिण कोरियाली समकक्षीलाई स्वागत गर्ने कार्यक्रम रहेको चिनियाँ सञ्चारमाध्यमहरूले उल्लेख गरेका छन्।

मंगोलिया र बंगलादेश भ्रमणका क्रममा वाङ यीले आपसी सम्बन्ध र साझा सरोकारका अन्तर्राष्ट्रिय तथा क्षेत्रीय मुद्दाहरूमा विचार आदानप्रदान गर्ने जनाइएको छ। दक्षिण कोरियामा नयाँ सरकार बनेयता कुनै पनि उच्चस्तरीय प्रतिनिधिमण्डलले चीन भ्रमण गर्न लागेको यो पहिलो पटक हुनेछ। त्यसैगरी नेपाली परराष्ट्रमन्त्री खड्काको पनि यो पहिलो चीन भ्रमण हुनेछ।

प्रकाशित : श्रावण २०, २०७९ १७:३७
पूरा पढ्नुहोस्
प्रतिक्रिया
पठाउनुहोस्
×