बाढीपहिरोले देशभरका पाँच सडक पूर्ण अवरुद्ध- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाढीपहिरोले देशभरका पाँच सडक पूर्ण अवरुद्ध

रासस

काठमाडौँ — वर्षाका कारण बाढीपहिराले गर्दा देशभरका पाँच सडक पूर्ण र १३ सडक आंसिकरुपमा अवरुद्ध भएका छन् ।

वर्षाका कारण हाल पूर्णरुपमा अवरुद्ध भएका सडकमा मुस्ताङको काभ्रेभिर, रारा राजमार्गको नुवाकोट–तोप्ला सडक, साँफेबगर–मार्तडी–कोल्टी सडकको अम्कोट–बल्दे सडक, रोल्पाको कोइलावास–लमही, अर्जुनखोला–घोराही–होलेरी–घर्तीगाउँ–थवाङ–लुकुम सडक र चितवनको मौरी पुल रहेका छन् ।

मुस्ताङको काभ्रेभिर सडक पहिरो तथा ठूलो ढुङ्गा बाटोमा खस्दा सवारीसाधन आवागमन अवरुद्ध भएको छ । उपकरण प्रयोग गरी पहिरो हटाउने काम भइरहेको सडक विभागले जनाएको छ । रारा राजमार्गमा निरन्तर पहिराका कारण अवरुद्ध भएकामा अहिले एउटा निजी स्काभेटर भाडामा लिएर सडक खुलाउने प्रयास भइरहेको छ ।

साँफेबगर–मार्तडी–कोल्टे सडकमा वर्षा र लेदो आउने क्रम रोकिएपछि यातायात खुलाउन सकिने र अहिलेका लागि वैकल्पिक बाटोका लागि सहमति जुटाउने प्रयास भइरहेको विभागले जनाएको छ । सहिद मार्ग खुलाउनका लागि स्काभेटर परिचालनको तयारी भइरहे पनि अरु स्थानमा पहिरो गएकाले सो खण्डमा पुग्न कठिन भएको छ । मौरी पुलमा वर्षाका कारण अझै धेरै टुक्राटुक्री जम्मा भए पनि हटाउनका लागि सो स्थानमा उपकरण परिचालन गरिएको छ ।

हाल १३ सडक एकातर्फी रुपमा मात्रै सञ्चालनमा रहेका छन् । कोसी राजमार्गको सम्माटार, पृथ्वी राजमार्गको बाँसबारी, त्रिभुवन राजपथको छत्तीस खोला, डुम्रे–बेंसीसहर–चामे सडकको उदिपुर, म्यार्दी भीरमा सडक अवरुद्ध रहेको छ । कोसी राजमार्गको फक्सिन्डा दोभानबाट बरुण खोलासम्मको सडक, अरनिको राजमार्गको कोदारी र बसेरी, पुष्पलाल राजमार्गको खहरे र दोबिल्ला, कर्णाली राजमार्गको जारकोटको सडक पनि एकातर्फबाट मात्रै खुलाइएको छ । विसं २०७९ यता हालसम्म १९ राजमार्गको १०९ स्थानमा अवरुद्ध भएको छ । अवरुद्ध भएका स्थानमध्ये ८९ सडक खुलिसकेको छ ।

प्रकाशित : श्रावण १९, २०७९ १४:०१
प्रतिक्रिया
पठाउनुहोस्

जोखिम मोलेरै प्रभावित क्षेत्रमा फर्किंदै विस्थापित

डिल्लीराम खतिवडा

उदयपुर — धार परिवर्तन गर्दै आएको सप्तकोसी पसेर जलमग्न भएको बेलका नगरपालिका क्षेत्रका विस्थापित सर्वसाधारणहरू बिहीबार बिहानैदेखि प्रभावित क्षेत्रमा फर्किन थालेका छन् । बुधबार क्षति हुन नदिन स्थानीय प्रशासनले उद्धार गरेका सर्वसाधण जोखिमकै बिच उक्त क्षेत्रमा फर्किएको बेलका नगरपालिका प्रमुख अशोक कार्कीले बताए ।

जोखिम कायमै रहे पनि प्रभावित क्षेत्रमा रहेको घरमा अन्नबाली र पशुचौपाया संरक्षण गर्ने भन्दै विस्थापित सर्वसाधारणहरू जबरजस्ती फर्किएको बेलका नगरपालिकाका प्रमुख अशोक कार्कीले बताए । उनका अनुसार प्रभावित क्षेत्र प्रवेशमा रोक लगाउन प्रहरी परिचानल गर्नु परेको छ ।

कोसी गाउँ पसेर २ हजार ५ सय परिवारलाई विस्थापित बनाएको प्रमुख जिल्ला अधिकारी वीरेन्द्रकुमार यादवले बताउँदै आएका छन् । उनका अनुसार २ हजार ५ सय परिवारका २० हजारभन्दा बढी जनसंख्या विस्थापित हुने भएका छन् । नदी नियन्त्रणका लागि दुई महिनायता गरिएको प्रयास विफल भएपछि बेलका नगरपालिका-८ डुम्रिबोटेबाट कोसी हिजो बेलका नगरपालिका क्षेत्रमा पसेको हो ।

कोसीको मूल बहाव पनि पश्चिम (उदयपुरतर्फ) मोडिएको र यसले धेरै ठूलो जोखिम निम्त्याउन सक्ने बेलका नगरप्रमुख कार्कीले बताए । नगरप्रमुख कार्कीका अनुसार डुम्रिबोटेमा कटान गरेर कोसी पुरानै धार हुँदै बगेको छ । २०४५ सालअघि कोसी ७ नम्बर नोच दक्षिण डुम्रिबोटे हुँदै बग्ने गरेको सर्वसाधण बताउँछन् ।

अहिले प्रभावित क्षेत्र कोसी टप्पु आरक्षण क्षेत्रको भएकाले केही वर्षयता उसले बस्ती खाली गर्न भनेको थियो । कोसी पसेको बहानमा बस्ती खाली गराउन खोजिएको भन्दै सर्वसाधारणहरू पुनः घर फर्किएको वडा नं. ३ का सदस्य फाल्गुणी कार्कीले बताए ।

झन्डै दुई महिनायता लगातार पश्चिम धार कटान गर्दै आएको सप्तकोसी बुधबार बेलका नगरपालिका-८ डुम्रिबोटेबाट तल्लो तटीय क्षेत्रको गाउँ पसेको छ । डुम्रिबोटेबाट कोसी बेलकाको तल्लो क्षेत्रका गाउँ पसेको हो ।

प्रकाशित : श्रावण १९, २०७९ १३:४८
पूरा पढ्नुहोस्
प्रतिक्रिया
पठाउनुहोस्
x
×