कर्मचारीलाई दोष थोपरेर उम्किए मुख्यमन्त्री राउत- समाचार - कान्तिपुर समाचार
साइकल खरिद अनियमितता

कर्मचारीलाई दोष थोपरेर उम्किए मुख्यमन्त्री राउत

मातृका दाहाल

काठमाडौँ — मधेस प्रदेशका मुख्यमन्त्री लालबाबु राउत ‘बेटी पढाऊ, बेटी बचाऊ’ कार्यक्रमका नाममा भएको साइकल खरिद घोटालामा कर्मचारीहरुलाई मात्र दोष देखाएर उम्किएका छन् । 

अख्तियार दुरुपयोग अनुसन्धान आयोगले पनि साइकल खरिद प्रक्रियामा मुख्यमन्त्री राउतको देखिने गरी कुनै संलग्नता नभएको दाबी गरेको छ । तर, साइकल खरिदको सबै योजना मुख्यमन्त्री राउतबाटै भए पनि अख्तियारको मुद्दाबाट भने उनी उम्किएका छन् । राउतले आफ्नो नेतृत्वको सरकार गठन भएलगत्तै मुख्यमन्त्री ‘बेटी पढाऊ, बेटी बचाऊ’अभियान सुरु गरेका थिए । यो कार्यक्रम मधेस प्रदेशका छात्रालाई नि:शुल्क साइकल बाँड्ने नाममा आर्थिक अनियमितता भएपछि अख्तियारले गत वर्ष असोजमा फाइल नियन्त्रणमा लिएको थियो ।

मुख्यमन्त्री राउतकै योजनामा दुई चरण गरी २७ हजार २ सय ६२ थान साइकल खरिद गरिएको थियो । पहिलो चरणमा प्रतिसाइकल ६ हजार ४ सय ४२ रुपैयाँ र दोस्रो लटमा प्रतिसाइकल ८ हजार ४ सय ४६ रुपैयाँमा खरिद गरिएको थियो । प्रदेश सरकारले १७ हजार २ सय ६२ थान साइकल खरिदमा ११ करोड १० लाख २९ हजार ९ सय ५८ र दोस्रो लटमा १० हजार खरिद गर्न ८ करोड ४४ लाख ६७ हजार ५ सय रुपैयाँ भुक्तानी गरेको थियो ।

अख्तियारलाई दिएको बयानमा मुख्यमन्त्री राउतले आफ्नो खरिद प्रक्रियामा संलग्न नभएको जिकिर गरेका छन् । उनले गुणस्तर, मूल्य, पारदर्शीतालगायत खरिद प्रक्रियाका सबै काम कर्मचारीबाट भएको र आफूले नीति बनाइदिएको उल्लेख गरेका छन् ।

‘प्रदेशको नीति, कार्यक्रम र बजेटमा भएको व्यवस्थाअनुसार साइकल खरिद गरिएको हो । खरिद प्रक्रिया कसरी गर्ने, कति गर्ने सबै सरोकार खरिदमा संलग्न हुनेहरुको दायित्व हो,’ राउतले अख्तियारलाई दिएको बयानमा भनिएको छ, ‘प्रदेश सरकारले नीति बनाउने र बजेट व्यवस्थापन गर्ने मात्र हो, अन्य कुरा मलाई थाहा हुँदैन ।’

उनले बयानमा खरिदको सबै हेर्ने जिम्मा आफ्नो नभएको र कार्यालयबाट खटिएका कर्मचारीको भएको जिकिर गर्दै उम्किन खोजेका छन् ।

‘सबै हेर्ने जिम्मा मेरो होइन, कार्यालयबाट खटिएको व्यक्तिको हो, साइकल वितरण गर्दा आवश्यकताअनुसार खरिद गर्ने नीति र कार्यक्रम बजेटमा भएको अनुसार गर्न निर्देशक समिति बनाइएको छ, समिति गठन गर्दा हस्ताक्षर मेरो हो, साइकल आएको हो, गुणस्तरीय छ/छैन, टेण्डर अनुसारको भए/नभएको हेर्ने कार्य मेरो सरोकारको विषय होइन ।’

प्रकाशित : श्रावण १८, २०७९ २१:१३
प्रतिक्रिया
पठाउनुहोस्

दुई लाख डोज भ्याक्सिन निःशुल्क ल्याइयो : हिमालय एयरलाइन्स

कान्तिपुर संवाददाता

काठमाडौँ — कोभिडका बेला आफ्नो विमानले चीनबाट दुई लाख डोज भ्याक्सिन निःशुल्क चार्टर उडानबाट ल्याइदिएको हिमालय एयरलायन्सले जनाएको छ । संकटको घडीमा नेपाल सरकारसँग सहकार्य गर्दै भेरोसेल भ्याक्सिनको २ लाख डोज ल्याउन २ करोड २५ लाख बराबरका चार वटा निःशुल्क कार्गो चार्टर उडान सञ्चालन गरिएको हिमालय एयरलायन्सकी ब्रान्ड विभागीय प्रमुख उज्ज्वला दलीले बताइन् ।

हिमालयले सन् २०२०–२०२१ अवधिभर गरिएका विभिन्न संस्थागत सामाजिक उत्तरदायित्व पहल समेटिएको प्रतिवेदन बुधबार काठमाडौंमा सार्वजनिक गरेको छ ।

सन् २०२० मा देखापरेको कोभिडको प्रकोपसँगै संस्थागत सामाजिक उत्तरदायित्वअन्तर्गत कोभिड कोषमा १० लाख, कोभिड अत्यावश्यक स्वास्थ्य सामग्रीका लागि कार्गो उडान सञ्चालन, विभिन्न देशबाट अलपत्र यात्रुलाई फिर्ता ल्याउने कार्य, विभिन्न अस्पतालहरूलाई स्वास्थ्य सामग्री उपलब्ध गराउनेलगायतका काम गरिएको दलीको भनाइ छ ।

संस्थागत सामाजिक उत्तरदायित्व ब्यानरअन्तर्गत प्रयास नेपाल नामक एक गैरसरकारी संस्थामा रहेका बालबालिकाको सपना साकार पार्न हिमालये ५ वर्षदेखि शिक्षातर्फका पाइलाहरू कार्यक्रमअन्तर्गत विपन्न बालबालिकाका लागि सघाइरहेको दलीले जनाइन् । ८ वर्षअघि चिनियाँ व्यवसायीसँगको सहकार्यमा नेपालमा स्थापित हिमालयले ४ वटा विमानबाट १० गन्तव्यमा उडान गर्दै आएको छ । यसले काठमाडौंलाई हब विमानस्थल बनाएको छ ।


प्रकाशित : श्रावण १८, २०७९ २१:०७
पूरा पढ्नुहोस्
प्रतिक्रिया
पठाउनुहोस्
×