पाल्पामा बस दुर्घटना, उद्धार कार्य जारी [अपडेट]- समाचार - कान्तिपुर समाचार

पाल्पामा बस दुर्घटना, उद्धार कार्य जारी [अपडेट]

घनश्याम गौतम

रूपन्देही — गुल्मीबाट बुटवलतर्फ आउँदै गरेको बस पाल्पामा दुर्घटनामा परेको छ । गुल्मीको मजुवाबाट बुटवल आउँदै गरेको लु १ ख ५९५२ नम्बरको बस पाल्पाको रिब्दीकोट गाउँपालिका–२ रिब्दीकोटमा दुर्घटना भएको हो ।

पाल्पाका प्रहरी प्रमुख प्रहरी उपरीक्षक जनकबहादुर शाहीले केहीको मृत्यु भएको, धेरै घाइते भएको तर, सबै विवरण आइनसकेको बताए ।

‘म पनि घटनास्थल पुग्नै लागेको छु,’ उनले भने, ‘बस सडकबाट ३ सय मिटर तल खसेको छ, केहीको मृत्यु भएको आशंका छ, धेरै घाइते छन् ।’ प्रहरी र स्थानीयले उद्धार गरिरहेको उनले बताए । घटनास्थलमा पाल्पाको अर्गली र हार्थोक प्रहरी चौकीबाट प्रहरी पुगेको छ ।

घटनास्थलमा रहेका घाइतेका अनुसार अर्को बसलाई साइड दिने क्रममा बस दुर्घटनामा परेको थियो । बस गुल्मीको मजुवाबाट बुटवल आउँदै थियो ।

.....

पाल्पा जिल्लाको रिब्दीकोट गाउँपालिका–३, लघुवामा बस दुर्घटना भएको छ । बुर्तिबाङबाट बुटवल आउँदै गरेको लु १ ख ५९५२ नम्बरको बस केहीबेर अघि लघुवामा दुर्घटना भएको हो । बस सडकबाट करिब ३/४ सय मिटर तल खसेको प्रत्यक्षदर्शीले बताएका छन् ।

उक्त ठाउँ नजिक यसअघि मलामी सवार बस दुर्घटना भएको थियो । गत पुस १८ गते भएको दुर्घटनामा ७ जनाले ज्यान गुमाएका थिए ।


प्रकाशित : श्रावण ८, २०७९ १७:५१
प्रतिक्रिया
पठाउनुहोस्

मंगलम् ग्रुपका निर्देशक चुरिवाल ‘कर्पोरेट बिजनेस एक्सेलेन्सी अवार्ड’बाट सम्मानित

कान्तिपुर संवाददाता

काठमाडौँ — मंगलम् ग्रुपका प्रबन्ध निर्देशक अभिनव चुरिवाल कर्पोरेट बिजनेस एक्सेलेन्सी अवार्डबाट सम्मानित भएका छन् । उक्त अवार्ड उपराष्ट्रपति नन्दबहादुर पुनले प्रदान गरे । कर्पोरेट म्यागजिनद्वारा गत मंगलबार होटल र्‍याडिसनमा आयोजित कर्पोरेट बिजनेस अवार्ड समारोहमा चुरिवाललाई सम्मान प्रदान गरिएको हो ।

आफ्नो व्यवसायमा उत्कृष्ट योगदान पुर्‍याउने व्यवसायीलाई सम्मान गर्दै दिइने यो अवार्ड कर्पोरेट म्यागेजिनले हरेक वर्ष एक समारोह आयोजना गरी प्रदान गर्ने गर्दछ । कार्यक्रममा ईश्वरलाल प्रतिष्ठानका अध्यक्ष प्रदिपलाल श्रेष्ठ, नेपाल चेम्बर अफ कमर्सका उपाध्यक्षहरु उर्मिला श्रेष्ठ र दिपक मल्होत्रा, नेपाल चेम्बर अफ कमर्सका पूर्वअध्यक्ष सुरेन्द्र वीर मालाकार, नेपाल उद्योग वाणिज्य महासंघका उपाध्यक्ष दिनेश श्रेष्ठ, पूर्व उपाध्यक्ष उमेशलाल श्रेष्ठ, कार्यकारिणी सदस्य हेमराज ढकाल, डिस होमका प्रबन्ध निर्देशक सुदिप आचार्य लगायतका प्रतिष्ठित व्यक्तित्वहरुको उपस्थिति थियो ।


प्रकाशित : श्रावण ८, २०७९ १७:४०
पूरा पढ्नुहोस्
प्रतिक्रिया
पठाउनुहोस्
×