नेविसंघले माग्यो त्रिवि पदाधिकारीको राजीनामा- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेविसंघले माग्यो त्रिवि पदाधिकारीको राजीनामा

कान्तिपुर संवाददाता

काठमाडौँ — नेपाल विद्यार्थी संघले त्रिभुवन विश्वविद्यालयले एकपछि अर्को परीक्षामा लापरबाही गरेको भन्दै त्रिविका पदाधिकारीको राजीनामा माग गरेको छ । निजी कलेजसँगको मिलेमतोमा प्रश्नपत्र बनाउने, गत वर्षकै प्रश्नपत्र यसपालि पनि हुबहु दोहोर्‍याउने र फरक विषयका प्रश्नपत्र वितरण गरी विद्यार्थीको भविष्यमा गम्भीर आघात पुर्‍याउने काम त्रिविबाट भइरहेकै नेविसंघको आरोप छ। 

त्रिविले असार २२ मा व्यवस्थापन संकायअन्तर्गत बिबिए छैटौं सेमेस्टरका लागि लिएको एमजिटी २०३: अर्गनाइजेसन बिहेबिएरको प्रश्नपत्र मोर्डन नेपाल कलेजको प्रि-बोर्डका लागि लिएको प्रश्नपत्रसँग हुबहु मिलेको छ । नेविसंघका अध्यक्ष दुजाङ शेर्पाले विज्ञप्तिमार्फत् देशकै ठूलो र प्रतिष्ठित विश्वविद्यालयमै परीक्षाजस्तो संवेदनशील विषयमा लापरबाही भएका घटना हुनु लज्जास्पद भन्दै त्रिविका पदाधिकारीले राजीनामा दिनुपर्ने बताएका छन् ।

शनिबार मात्रै 'बिबिए छैटौं सेमेस्टरको नेप्लिज सोसाइटी एण्ड पोलिटिक्स एसओसी २०२' विषयको परीक्षामा पाँचौं सेमेस्टरको सोसोलोजीको प्रश्न सोधिएको भन्दै विद्यार्थीले विरोध गरेका थिए।

त्रिविको यस्तो गैरजिम्मेवार, शंकास्पद तथा लापरबाहीपूर्ण कदमप्रति नेविसंघ केन्द्रीय समितिको गम्भीर ध्यानाकर्षण भएको विज्ञप्तिमा उल्लेख छ। यसअघि त्रिविले गत जेठमा एमए तेस्रो सेमेस्टरको ‘पब्लिक इकोनोमिक्स’ र प्रथम सेमेस्टरको ‘इन्टरनेसनल पोलिटिक्स’ विषयका प्रश्नपत्रहरू गत वर्षकै हुबहु दोहोर्‍याएको थियो।

‘उक्त घटनाको छानबिन गर्न गठित छानबिन समितिद्वारा तयार पारिएको प्रतिवेदन आजसम्म सार्वजनिक नगर्नु, दोषीलाई उम्काउने चलखेल गर्नु, पटकपटक परीक्षा प्रणालीको विश्वसनीयतामाथि प्रहार गरिरहनु, बिचौलिया/निजी कलेजसँग साँठगाठ गरिरहनु, आदि घटनाले विश्वविद्यालयका पदाधिकारी तथा जिम्मेवार निकायहरू पतित भएको पुष्टि भैसकेको छ,’ नेविसंघले भनेको छ ।

यस्तो छ नेविसंघको विज्ञप्ति :

प्रकाशित : असार २६, २०७९ १३:१०
प्रतिक्रिया
पठाउनुहोस्

कांग्रेस बैठक : पदाधिकारी सानेपामा, शेखर समूह विशालनगरमा

कान्तिपुर संवाददाता

काठमाडौँ — नेपाली कांग्रेसको केन्द्रीय कार्यसमिति बैठक सोमबार बस्दैछ । सभापति एवम् प्रधानमन्त्री शेरबहादुर देउवाले स्थानीय तह निर्वाचनको समीक्षा र आसन्न निर्वाचनको तयारीका सम्बन्धमा छलफल गर्न सोमबार दिउँसो १ बजे बस्ने गरी केन्द्रीय समिति बैठक बोलाएका छन् । 

केन्द्रीय समिति बैठकको तयारीका लागि आइतबार सानेपास्थित केन्द्रीय कार्यालयमा पदाधिकारी बैठक बस्दैछ भने नेता शेखर कोइराला समूहको बैठक विशालनगरमा बस्दैछ । मुख्यसचिव कृष्णप्रसाद पौडेलले सोमबारदेखि बस्ने केन्द्रीय समिति बैठकको तयारीका लागि आइतबार दिउँसो पदाधिकारी बैठक बस्न लागेको जानकारी दिए ।

'सभापतिज्यू कार्यव्यस्तताका कारण बैठकमा आउनुहुन्न । उपसभापतिज्यूले बैठक सञ्चालन गर्नुहुन्छ, केन्द्रीय समिति बैठकका एजेन्डाहरू तय गर्नेबारे छलफल हुन्छ,’ उनले भने । मुख्यसचिव पौडेलले सोमबारदेखि हुने बैठकमा मूलतः स्थानीय तह निर्वाचनको समीक्षा र समसामयिक राजनीतिक विषयहरूमाथि छलफल हुने बताए । त्यस्तै, केन्द्रीय समिति बैठकमा कसरी प्रस्तुत हुने भन्नेबारे रणनीति बनाउन कोइराला समूहको अलग्गै बैठक बस्दैछ ।

पार्टी सञ्चालनमा सभापति देउवाले एकलौटी गरेकोमा विरोध गर्दै आएको कोइराला समूहले यसपटकको केन्द्रीय समिति बैठकमा दबाब बढाउने संकेत गरेको छ । नेता कोइरालाले आफूनिकट नेताहरूलाई आइतबार दिउँसो विशालनगरस्थित सम्पर्क कार्यालयमा छलफलका लागि बोलाएका छन् । यसअघि गत बिहीबार र शुक्रबार दुई दिनसम्म अलग्गै छलफल गरेको कोइराला समूहले देउवा पार्टी र सरकार सञ्चालन दुवैतिर असफल भएको निष्कर्ष निकालेको थियो ।

१४ औँ महाधिवेशनपछि छ महिनामा गरिसक्नुपर्ने विधानबाट निर्देशित कामसमेत सभापति देउवाले पूरा गर्न नसकेको कोइराला समूहको भनाइ छ । सभापति देउवाले सरकार सञ्चालनमा व्यस्त हुँदा विधानले गरेको कोषाध्यक्ष चयनदेखि सदस्यहरूको मनोनयन, विभाग गठन लगायत महत्त्वपूर्ण संगठन व्यवस्थापनका काममा समय दिन सकेका छैनन् । कोइराला समूहले भने ती काममा सभापति देउवाले चासो नै नदिएको आरोप लगाउँदै आएको छ ।

प्रकाशित : असार २६, २०७९ १३:०१
पूरा पढ्नुहोस्
प्रतिक्रिया
पठाउनुहोस्
×