लिफ्ट मागेर कर्मचारीलाई लुटपाट गर्ने तीन जना भारतीय पक्राउ- समाचार - कान्तिपुर समाचार

लिफ्ट मागेर कर्मचारीलाई लुटपाट गर्ने तीन जना भारतीय पक्राउ

चित्रांग थापा

धनगढी — कैलालीको गोदावरीमा सोमबार डडेलधुराको आलीताल गाउँपालिकाका कम्प्युटर अपरेटर लोकेन्द्र भण्डारी कुटपिट गर्ने  ३ जना भारतीय नागरिक पक्राउ परेका छन् ।

तस्बिर : प्रकाश पार्कीको फेसबुकबाट

कैलाली जिल्ला प्रहरी कार्यालयका डीएसपी वेद जोशीका अनुसार नेपाली कर्मचारीलाई कुटपिट गरी उनको कारसमेत लुटेर फरार भएका भारतको हरियाणा राज्यका २१ वर्षीय भगत सिंह, २० वर्षीय सन्नी जाट र १६ वर्षीय युवकलाई प्रहरीले पक्राउ गरेको हो । उनीहरु तीनै जनालाई स्थानीयवासीको सूचनाको आधारमा कैलालीको गोदावरी नगरपालिका–१ को एैश्वर्य सामुदायिक वनमा लुकेर बसेको अवस्थामा प्रहरीले नियन्त्रणमा लिएको डीएसपी जोशीले बताए ।

धनगढी–अत्तरिया सडकखण्डनजिक रैकवार विचवाको शान्तिपुर जाने भित्री मार्गमा लुटिएको प्रदेश ३—०१—२३ च ८७२१ नम्बरको कारसमेत फेला परेको डीएसपी जोशीले जानकारी दिए । उक्त कार कम्प्युटर अपरेटर भण्डारीको हो । आफै कार चलाएर गन्तव्यतर्फ गइरहेका बेला उनी लुटिएका हुन् ।

गोदावरीनजिक रोकेर तेल हालिदिने सर्तमा उनीहरूले केही माथिसम्म लगि लिफ्ट मागेको भण्डारीले जानकारी दिएका छन् । डीएसपी जोशीका अनुसार गोदावरीमाथि पुगेपछि उनीहरुले फोटो खिच्ने बहानामा गाडी रोकाएर राजमार्गभन्दा ५० मिटर तल झाडीमा लगेर भण्डारीमाथि कुटपिट र गाडीसमेत लुटेर लगेका थिए ।

उनीहरूले भण्डारीलाई गम्छाले मुख बाँधेर, हातखुट्टासमेत बाँधेर कुटपिट गरेका थिए । ढुंगा प्रहारबाट उनको टाउकोमा चोटसमेत लागेको छ । भण्डारीसँग रहेको केही नगद र एटीएम कार्डसमेत लुटिएको थियो । उनको कैलालीको अत्तरियास्थित पद्मा अस्पतालमा उपचार भइरहेको छ ।

घटनाको प्रारम्भिक अनुसन्धान सुरु भएको र लुटेराहरुसँग बयान र सोधपुछपछि घटनाबारे थप जानकारी हुने डीएसपी जोशीले बताए ।

प्रकाशित : असार १३, २०७९ १९:२१
प्रतिक्रिया
पठाउनुहोस्

भरतपुर-बर्दघाट प्रसारण लाइनको मुद्दा प्राधिकरणको पक्षमा

स्थानीयको विरोध र मुद्दाका कारण ७ वर्षदेखि २ वटा टावर बन्न सकेनन्
कान्तिपुर संवाददाता

काठमाडौँ — स्थानीयको अवरोधका कारण २ वटा विद्युत् टावर मात्र राख्न बाँकी भरतपुर–बर्दघाट २२० केभी प्रसारणलाइनमा काम गर्न नेपाल विद्युत् प्राधिकरणलाई बाटो खुलेको छ । प्रसारणलाइनका २ वटा टावर राख्न नदिने भन्दै स्थानीयको विरोध र मुद्दापछि काम अघि नबढाउन सर्वोच्च अदालतका तत्कालीन न्यायाधीश पुरुषोत्तम भण्डारीको इजलासले २०७७ चैत २५ गते अन्तरिम आदेश दिएको थियो । जसकारण यो प्रसारण निर्माणको काम रोकिएको थियो । 

तर, सर्वोच्च अदालतका न्यायाधिशद्वय प्रकाशकुमार ढुंगाना र ईश्वरप्रसाद खतिवडाको आइतबारको संयुक्त इजलाशले उक्त मुद्दा सम्बन्धी रिट खारेज गर्दै निर्देशनात्मक आदेश जारी गरेको हो । यो प्रसारणलाइन २०७२ मंसिरमै बनाइसक्ने लक्ष्य राखिएको थियो । तर मुआब्जा विवाद र बस्तीबाट प्रसारण लाइन बिस्तार गर्न खोजिएको भन्दै पूर्वी नवलपरासीको विनयी त्रिवेणीका बासिन्दा आन्दोलित हुँदा ७ वर्षदेखि काम रोकिएको छ । यो प्रसारणलाइन नबन्दा ४ सय ५६ मेगावाट उत्पादन क्षमताको माथिल्लो तामाकोसी र मर्स्याङ्दी करिडोरका जलविद्युत् आयोजनाबाट उत्पादित विद्युत् पश्चिमतर्फ पठाउन सकिएको थिएन ।

प्रकाशित : असार १३, २०७९ १९:१७
पूरा पढ्नुहोस्
प्रतिक्रिया
पठाउनुहोस्
x
×