माधव नेपाललाई एमाले सचिव भट्टराईको प्रश्न– 'पश्चाताप र आत्मबोध कहिले ?'- समाचार - कान्तिपुर समाचार

माधव नेपाललाई एमाले सचिव भट्टराईको प्रश्न– 'पश्चाताप र आत्मबोध कहिले ?'

कान्तिपुर संवाददाता

काठमाडौँ — नेकपा एमाले सचिव योगेश भट्टराईले पार्टी विभाजनको समयमा चिनेको खेलाडीहरु माधवकुमार नेपाल र झलनाथ खनालले चिन्दै जाने बताएका छन् । एकीकृत समाजवादीमा देखिएको विवादको विषयमा टिप्पणी गर्दै एमाले सचिव भट्टराईले परिस्थिति अध्यक्ष नेपालको काबुभन्दा बाहिर जाने अवस्थामा पुग्न लागेको बताएका छन् । 

'हेर्दै जाउँ हामीले त्यतिबेला नै चिनेका खेलाडीहरु कमरेड माधव नेपाल र कमरेड झलनाथ खनालले बिस्तारै चिन्दै जानु हुनेछ' सचिव भट्टराईले फेसबुकमा लेख्दै प्रश्न गरेका छन्, 'आत्माबोध र पश्चातप : सिर्फ कहिले ?'

भट्टराईले एमाले विभाजनकै समयमा अध्यक्ष नेपाललाई छुट्टिने पल गरेको कुनै पनि परिस्थित काबुभन्दा बाहिर जाने भनेर त्यस समयमा भनेको स्मरण गराएका छन् । 'एकीकृत समाजवादी पार्टीको अहिलेको अवस्था देख्दा उबेला मैले पार्टी विभाजन नगर्न कमरेड माधवकुमार नेपाललाई गरेको अनुनय, विनय र एमाले विभाजनको औचित्य छैन भनी दिएको तर्क अनि नेपालको कम्युनिस्ट आन्दोलनलाई तहसनहस पार्ने षड्यन्त्रको शिकार नबन्न गरेको अनुरोध र केहीभन्दा पनि वहाँले नमाने पछि कुनैदिन परिस्थिति तपाईंको काबुभन्दा बाहिर जाने छ भनेर वहाँबाट छुट्टिएको पलको स्मरण भइरहेको छ,' भट्टराईले लखेका छन् । एमालेभित्र विवाद हुँदा नेपाललाई साथ दिँदै आएका भट्टराईसहितका नेताहरु १० बुँदे सहमति गरेर विभाजनबाट सहभागी भएका थिएनन् ।

प्रकाशित : असार १०, २०७९ १३:५३
प्रतिक्रिया
पठाउनुहोस्

भरतपुर महानगरपालिकाको बजेट पौने ६ अर्ब

दूधमा किसानलाई प्रतिलिटर ३ रुपैयाँ अनुदान दिइने
रमेशकुमार पौडेल

चितवन — भरतपुर महानगरपालिकाको ११औं अधिवेशन तथा नगरसभा शुक्रबारबाट सुरू भएको छ । नगरसभामा मेयर रेनु दाहालले आउँदो आर्थिक वर्षको नीति तथा कार्यक्रम र उपमेयर चित्रसेन अधिकारीले बजेट पेस गरेका छन् । 

आर्थिक वर्ष २०७९/८० का लागि महानगरको बजेट ५ अर्ब ७४ करोड ४२ लाख ५६ हजार रुपैयाँ प्रस्ताव भएको छ । जसमा आन्तरिक आय १ अर्ब ५० करोड ररुपैयाँ रहने छ । त्यसैगरी विकास निर्माणका लागि जनसहभागितामार्फत ३६ करोड रुपैयाँ जुटाइने बजेट वक्तव्यमा उल्लेख छ ।

चालू आर्थिक वर्षमा महानगरको बजेट ५ अर्ब ५१ करोड रुपैयाँ छ । जसमा आन्तरिक आय ९७ करोड रुपैयाँ प्राप्त भएको छ । मेयर रेनु दाहालले दूध उत्पादन गर्ने किसानलाई दिँदै आएको अनुदान १ रुपैयाँबाट बढाएर प्रतिलिटर ३ रुपैयाँ पुर्‍याउने घोषणा गरिन् ।

कृषि एम्बुलेन्सको व्यवस्था गर्ने पनि नीति तथा कार्यक्रममा उल्लेख छ । अबदेखि फोहोर व्यवस्थापनका लागि घरघरमै कुहिने नकुहिने फोहोर छुट्याएर संकलन गरिने पनि मेयर दाहालले बताइन् । दाहालले एकीकृत सहरी विकास गुरुयोजनासमेत बनाइने बताइन् ।

महानगरमा तत्काल तीनवटा रुटमा विद्युतीय बस चलाउने, भरतपुर देवघाटधामसम्म जेष्ठ नागरिकका लागि विद्युतीय बस चलाउने दाहालले बताइन् । भरतपुरको केन्द्रीय बसपार्कमा चार्जिङ स्टेसन बनाइने पनि उनले बताइन् । वि.सं. २०८० साललाई 'भ्रमण वर्ष घोषणा' गरेर पर्यटन प्रवर्धन गर्ने दाहालले बताइन् ।

प्रकाशित : असार १०, २०७९ १३:४७
पूरा पढ्नुहोस्
प्रतिक्रिया
पठाउनुहोस्
×