मूल्यवृद्धिको विरोधमा उत्रिएका प्रदर्शनकारी र प्रहरीबीच बानेश्वरमा झडप- समाचार - कान्तिपुर समाचार

मूल्यवृद्धिको विरोधमा उत्रिएका प्रदर्शनकारी र प्रहरीबीच बानेश्वरमा झडप

कान्तिपुर संवाददाता

काठमाडौँ — मूल्यवृद्धिको विरोधमा उत्रिएका प्रदर्शनकारी र प्रहरीबीच बानेश्वरमा झडप भएको छ । नेकपा एमालेको भ्रातृ संगठन युवा संघले मूल्यवृद्धिविरुद्ध मसाल जुलुस निकालेर सडक अवरुद्ध गरेपछि बिहीबार बेलुकी झडप भएको हो ।

नेपाल आयल निगमले पेट्रोलियम पदार्थमा चर्को मूल्यवृद्धि गरेको भन्दै युवा संघले बुद्धनगरदेखि नयाँ बानेश्वरसम्म मसाल जुलुससहित प्रदर्शन गरेको हो । प्रदर्शनमा सहभागीले ‘मूल्यवृद्धि फिर्ता गर’, ‘प्रधानमन्त्री राजीनामा दे’ लगायत नारा लगाएका थिए । झडपपछि त्यस क्षेत्रमा यातायात सञ्चालन हुन सकेको छैन ।

पछिल्लो चरणमा भएको मूल्यवृद्धिअनुसार पेट्रोल प्रतिलिटर १ सय ९९ र डिजेल, मट्टितेल १ सय ९२ पुगेको छ । इन्धनको मूल्यवृद्धिसँगै खाद्यान्न, यातायातलगायत क्षेत्रमा पनि महँगी बढेको छ ।

प्रकाशित : असार ९, २०७९ १८:४३
प्रतिक्रिया
पठाउनुहोस्

बिमितहरूलाई नियमित रुपमा सेवा दिनूस् : स्वास्थ्य बिमा बोर्ड

कान्तिपुर संवाददाता

काठमाडौँ — स्वास्थ्य बिमा बोर्डले बिमा कार्यक्रम स्थगन गरेका सेवा प्रदायक स्वास्थ्य संस्थालाई नियमित रुपमा बिमितहरूलाई सेवा प्रदान गर्न आग्रह गरेको छ । 

केही दिनअघि स्वास्थ्य बिमाबापतको रकम नपाएको र सोको रकम भुक्तानी नभएको भन्दै केही अस्पतालहरूले बीमा कार्यक्रम स्थगन गरेका थिए ।

बिहीबार विज्ञप्ति जारी गर्दै स्वास्थ्य बिमा बोर्डले आ.व.२०७८/०७९ मा विगत वर्षका बाँकी रहेका १९ लाख ९ हजार ५७ संख्याका दाबी र चालु आ.व.का दाबी ३३ लाख ७५ हजार ८३७ गरी कूल ५२ लाख ८४ हजार ८९४ संख्याका दाबीहरू परीक्षण गरी ८ अर्ब १३ करोड रुपैयाँ भुक्तानी भएको जनाएको छ । चालु आ.व.को जेठ १५ गतेसम्मको १८ लाख ५३ हजार ९ सय ५३ वटा दाबीलाई प्राथमिकताका साथ परीक्षण गर्ने कार्य भइरहेको बोर्डले जनाएको छ ।

बोर्डका कार्यकारी निर्देशक डा दामोदार बसौलाले परीक्षण भएका दाबीहरूको भुक्तानी यथाशीघ्र गर्ने कार्यमा बिमा बोर्ड लागिपरेको र आगामी दिनमा कार्यतालिका तयार गरी नियमित भुक्तानी गरिने दाबी गरे । ‘स्वास्थ्य बिमा कोष व्यवस्थापन तथा सञ्चालन कार्यविधि, २०७८ अनुसार स्वास्थ्य बिमा कोष स्थापना भई बोर्डमा प्राप्त सम्पूर्ण रकम उक्त कोषमा मौज्दात रहने व्यवस्था छ र परीक्षण भएका दाबीहरूको बाह्रै महिना भुक्तानी गर्न सकिने व्यवस्था छ,’ डा बसौलाले भने ।

उनले बिमा बोर्डमा हाल दैनिक हुने दाबी बढ्दो क्रममा रहेका कारण दाबी प्रविष्ट हुने र दाबी परीक्षण गर्ने अनुपातमा तादात्म्यता मिलाउन जनशक्तिको अभावमा केही बिलम्व हुन गएको बताएका छन् ।

बिमा कार्यक्रममा प्रतिपरिवारले ३ हजार ५ सय रुपैयाँ तिरेर १ लाख रुपैयाँसम्मको उपचारबापतको सेवा प्राप्त गर्दछन् । बिमा बोर्डका अनुसार ६ वर्षको अवधिमा ७७ जिल्लाका ७ सय ४६ वटा स्थानीय तहका करिब ५६ लाख ३९ हजार नागरिक स्वास्थ्य बिमा कार्यक्रममा आबद्ध भइसकेका छन् । देशभरका ४ सय ५० वटा सेवा प्रदायक संस्थाहरूबाट दैनिक २५ देखि ३० हजार संख्यामा दाबी आउने गरेका छन् ।

प्रकाशित : असार ९, २०७९ १८:३९
पूरा पढ्नुहोस्
प्रतिक्रिया
पठाउनुहोस्
×