अर्थमन्त्रीको राजीनामा माग्दै पूर्वका उद्योगी र मजदुर आन्दोलित- समाचार - कान्तिपुर समाचार
कान्तिपुर वेबसाईट
AdvertisementAdvertisement

अर्थमन्त्रीको राजीनामा माग्दै पूर्वका उद्योगी र मजदुर आन्दोलित

विनोद भण्डारी

विराटनगर — बजेटमार्फत परिवर्तन गरिएका करमा संशोधन र अर्थमन्त्री जनार्दन शर्माको राजनीनामा माग्दै पूर्वका उद्योगी, व्यवसायी र मजदुर बिहीबारदेखि सडक आन्दोलनमा उत्रिएका छन् । 

मोरङ व्यापार संघ, उद्योग संगठन, नेपाल उद्योग परिसंघ प्रदेश १, नेपाल ट्रेड युनियन कांग्रेस मोरङ, नेपाल ट्रेड यूनियन महासंघ (जिफन्ड) प्रदेश १, अखिल नेपाल ट्रेड युनियन महासंघ (अन्टुफ) प्रदेश १ र समाजवादी ट्रेड युनियन प्रदेश १ ले औद्योगिक क्षेत्र गोकुवा चोकदेखि निमुवासम्म प्रदर्शन गरेका हुन् । अर्थमन्त्री शर्माले नीतिगत भ्रष्टाचार गरेर सीमित उद्योगलाई संरक्षण गर्दै जिआई वायर, वनस्पती घीउ, तेल र सेनिटरी प्याड उद्योगलाई बन्द गर्न बाध्य तुल्याउन करमा परिवर्तन गरेको उद्योगी र मजदुरको आरोप छ ।

प्रदर्शनका क्रममा 'अर्थमन्त्री राजीनामा देउ', 'झुटो अर्थमन्त्री चाहिँदैन', 'नीतिगत भ्रष्टाचार बन्द गर', 'सीमित उद्योगलाई पोस्न पाइँदैन, राज्यको डलर लुटाउन पाइँदैन,' 'अर्थमन्त्री सच्ची देउ'लगायतका नारा लगाएका थिए ।

प्रचण्ड गर्मीमा प्रदर्शनपछि आयोजित कोणसभामा उद्योगी व्यवसायीले अर्थमन्त्री शर्माले सीमित उद्योगसँग अकुत हुण्डी खाएर नीतिगत भ्रष्टाचार गर्दै कर परिवर्तन गरेर अन्य उद्योगलाई बन्द गर्न बाध्य तुल्याएको आरोप लगाए । कर परिवर्तनको विरोधमा उद्योगी र मजदुर जेठ अन्तिम साता पनि सडकमा उत्रिएका थिए । तर, अर्थमन्त्री शर्माले जेठ २७ गते आन्दोलनकारीलाई वार्ताका लागि काठमाडौं बोलाएर बजेट बनाउने क्रममा त्रुटि भएको स्वीर्कार्दै जेठ ३० गते बजेट पास हुने र असार १ गते परिवर्तित करलाई संशोधन गर्ने आश्वासन दिएपछि उद्योगीले तत्कालका लागि आन्दोलन स्थगित गरेका थिए । तर, बजेट पारित भएको साता बित्दा पनि शर्माले आश्वासन पूरा नगरेको भन्दै उद्योगी र मजदुर पुन आन्दोलनमा उत्रिएका हुन् ।

कोणसभामा मोरङ व्यापार संघका अध्यक्ष नविन रिजालले अर्थमन्त्रीको नीतिगत भ्रष्टाचारले सीमित उद्योगलाई संरक्षण गरेर अन्य उद्योग बन्द गर्न बाध्य वनाएर हजारौं मजदुरको रोजीरोटी गुम्ने स्थिति सिर्जना गरेको उल्लेख गर्दै परिवर्तित करमा संशोधन र एक दुईवटा उद्योगलाई मात्र पोस्ने अर्थमन्त्रीले राजीनामा नगरेसम्म आन्दोलन जारी रहने बताए । उनका अनुसार शुक्रबार आन्तरिक राजस्व कार्यालय र भन्सार कार्यालय घेराउ गर्ने कार्यक्रम छ ।

प्रकाशित : असार ९, २०७९ १५:५४
प्रतिक्रिया
पठाउनुहोस्

माओवादीले १२२ पालिका जित्दा बुर्जुवा र प्रतिक्रियावादीले जिब्रो टोकेका छन् : दाहाल

कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले देशको राजनीतिक धारालाई कता लैजाने भन्ने जिम्मा जनताले आफूहरूलाई दिएको बताएका छन् ।

बिहीबार ललितपुरमा आयोजित जनप्रतिनिधि सम्मान तथा प्रशिक्षण कार्यक्रमलाई सम्बोधन गर्दै दाहालले स्थानीय तह चुनावमा आफूहरूले अपेक्षा गरेभन्दा कम सिट जिते पनि तेस्रो निर्णायक शक्तिका रूपमा रहेको बताए ।

'परिणामको दृष्टिकोणले राजनीतिको बागडोरलाई कतापट्टि लैजाने राजनीतिक धारालाई कसरी अगाडि बढाउने भन्ने जिम्मेवारी हामीलाई जनताले दिएका छन् । कहीँ न कहीँ यसको चाबी जनताले माओवादी केन्द्रलाई नै दिएका छन्,' दाहालले भने ।

सिटमा केही तलमाथि भए पनि निर्वाचन सफलतापूर्वक सम्पन्न हुनु नै आफूहरूको ठूलो सफलता भएको बताए । उत्पीडित वर्गको हकहित संरक्षण र संविधान जोगाउनका लागि पनि निर्वाचन सफलतापूर्वक हुनु आवश्यक रहेको उनको भनाइ थियो ।

'हामीले सोचेजति परिणाम आएन । यो पटक कम्तीमा पनि गठबन्धन ठीक ढंगले जाँदा र पार्टीले पनि मेहनत गर्दा हाम्रो १७० देखि १७५ सम्म आउँछ, एमालेको पनि १६०-१७० तिर झर्छ । र, हामी वामपन्थी आन्दोलनको पहिलो पार्टी हुन्छौँ र देशको दोस्रो पार्टी बन्छ भन्ने आकलन गरेका थियौँ । तर हामी १२२ सिटमा सीमित भएका छौँ,' उनले भने ।

आफूहरूले आकलन गरेको भन्दा कम सिट जिते पनि अरूले भने माओवादी यति सिट जित्छ भन्ने अनुमान नगरेको उनको भनाइ छ । 'अरुका लागि भने बढी भाछ, माओवादीको यति आउला भनेर अरुले सोचेका थिएनन् । धेरै दस्तावेजहरू मैले हेरेको छु । ठूलठूला अन्तर्राष्ट्रिय संस्थाहरूले गरेको मूल्यांकनमा हामीलाई ३० वटा पालिकाभन्दा आउँदैन भन्ने थियो । त्यसरी हेर्दा १२२ भनेको धेरै हो । बुर्जुवा र प्रतिक्रियावादीहरूले अहिले जिब्रो टोकेका छन् । उनीहरूले माओवादीको यत्रो आयो भनिरहेका छन्, तर हामीले योभन्दा धेरै आकलन गरेका हौँ । माओवादी केन्द्रका लागि मुख्य कुरा निर्वाचन सफलतापूर्वक सम्पन्न हुनु हो,' उनले भने ।

प्रकाशित : असार ९, २०७९ १५:३०
पूरा पढ्नुहोस्
प्रतिक्रिया
पठाउनुहोस्
×