सबै जातजातिको भाषा र साहित्यलाई जोगाउनुपर्छ : प्रधानमन्त्री देउवा- समाचार - कान्तिपुर समाचार
कान्तिपुर वेबसाईट
AdvertisementAdvertisement

सबै जातजातिको भाषा र साहित्यलाई जोगाउनुपर्छ : प्रधानमन्त्री देउवा

कान्तिपुर संवाददाता

काठमाडौँ — प्रधानमन्त्री शेरबहादुर देउवाले सबै जातजातिको भाषा, साहित्य र संस्कृतिको जगेर्ना गर्नुपर्ने बताएका छन् । उनले त्यसका लागि नेपाल प्रज्ञा प्रतिष्ठानले विगतदेखि काम गर्दै आएको भन्दै भाषा साहित्य संरक्षणको कार्यलाई थप अघि बढाउन आग्रह गरे । नेपाल प्रज्ञा प्रतिष्ठानको ६५ औँ वार्षिकोत्सव समारोह तथा राष्ट्रिय कविता महोत्सवमा सम्बोधन गर्दै प्रधानमन्त्री देउवाले सरकारले प्रतिष्ठानका लागि आर्थिक अभाव हुन नदिने बताए ।

‘प्रज्ञा प्रतिष्ठानले मुलुकको ज्ञान-विज्ञान, साहित्य‚ कला र भाषा संस्कृतिको विकासका लागि विगतदेखि महत्त्वपूर्ण भूमिका खेल्दै आएको छ; यसले स्वदेशभित्र मात्रै होइन, हाम्रो भाषा साहित्यलाई विदेशमा समेत चिनाउन अग्रणाी भूमिका निभाएको छ,’ उनले भने, ‘प्रतिष्ठानलाई कुनै आर्थिक संकट हुनु हुन्न । त्यसका लागि सरकारले के गर्न सक्छ ? कति हुन्छ सरकारको तर्फबाट आर्थिक सहयोग उपलब्ध हुनेछ ।’

उनले प्रतिष्ठानलाई नेपालका सबै समुदायको भाषा, साहित्य र कलालाई संरक्षण गर्दै थप अघि बढाउन आग्रह गरे ।

‘प्रतिष्ठानले वृहत् शब्दकोष तयार पारी प्रकाशन गर्न लागेको सुन्दा खुसी लागेको छ । त्यस्तै बजारमा उपलब्ध हुन छाडेका पुराना प्रकाशनहरूलाई पुनः बजारमा ल्याउन लागेको समेत सुनेँ; यी कामका लागि धन्यवाद दिन चाहन्छु,’ उनले भने ।

प्रकाशित : असार ९, २०७९ १४:५६
प्रतिक्रिया
पठाउनुहोस्

सबै स्थानीय तहमा लागू भयो ‘सूत्र’, बेलायतद्वारा नेपाललाई हस्तान्तरण 

कान्तिपुर संवाददाता

काठमाडौँ — बेलायतको आर्थिक तथा प्राविधिक सहयोगमा तयार पारिएको ‘स्थानीय सञ्चित कोष व्यवस्थापन प्रणाली’ (सूत्र) नेपाल सरकारलाई हस्तान्तरण गरिएको छ । स्थानीय तहका लागि तयार पारिएको वित्तीय व्यवस्थापनसम्बन्धी यो सफ्टवेयर प्रणालीलाई नेपालका लागि बेलायतका राजदूत निकोला पोटिलले बिहीबार काठमाडौंमा आयोजित एक कार्यक्रममार्फत हस्तान्तरण गरेकी हुन् । 

सूत्र प्रणालीले स्थानीय सरकारलाई उनीहरुको सार्वजनिक वित्त व्यवस्थापनमा सहयोग गर्छ । त्यस्तै, वित्तीय संघीयता सम्बन्धी कामहरु र जोखिम पहिचानसमेतका काम यो प्रणालीमार्फत भइरहेको छ । स्थानीय सरकारहरुले योजना बनाउने, रकम विनियोजन गर्ने, आय–व्ययको अभिलेख राख्ने र स्वचालित रुपमा वित्तीय प्रतिवेदनहरु तयार पार्नका लागि यसले मद्दत पुर्‍याउने ठानिएको छ । स्थानीय तहले सूत्रमार्फत नै राजस्व अनुमान गर्न, बजेट तयार गर्न, बजेट स्वीकृत गर्न, विभिन्न स्रोतबाट प्राप्त कोषको विवरण राख्न, खर्चको लेखा राख्नलगायत गतिविधि गर्न सक्नेछन् ।

सूत्र प्रणाली नेपाललाई हस्तान्तरण गर्दै बेलायती राजदूत निकोला पोटिलले स्थानीय सरकारहरुको सार्वजनिक वित्तीय व्यवस्थापनमा जवाफदेहिता र पारदर्शिता सुनिश्चत गर्ने एप्लिकेसन रहेको बताइन् । ‘यो प्रणालीले स्थानीय तहहरुको एकीकृत वित्तीय विवरण वास्तविक समय (रियल टाइम) मा उलपब्ध गराउन सक्छ । जसले पारदर्शिता कायम गर्न र वित्तीय जोखिम न्यूनीकरणमा महत्वपूर्ण भूमिका खेल्नेछ,’ राजदूत पोटिलले भनिन् ।

महालेखा नियन्त्रक सुमन अर्यालले सूत्र प्रणालीले सार्वजनिक वित्त व्यवस्थापनमा संघीय र स्थानीय सरकारको समय र लागत दुवै बचत गर्ने बताए । त्यस्तै यो प्रणालीबाट सबै स्थानीय तहको एकीकृत वित्तीय विवरण तयार पार्न सकिने पनि उनको भनाइ छ । ‘यो प्रणालीबाट मुख्यगरी तीनवटा कारणले महत्वपूर्ण छ । पहिलो, शासकिय प्रणालीमा प्रविधि प्रयोग । दोस्रो, स्थानीय सरकारको वित्तीय व्यवस्थापन र तेस्रो, डिजितल रुपान्तरणमार्फत् सार्वजनिक जवाफदेहिता,’ महालेखा नियन्त्रक अर्यालले भने ।

स्थानीय तहको पहिलो निर्वाचनका क्रममा सुरु भएको सुत्र प्रणालीमा अहिले ७५३ वटै स्थानीय तह आवद्ध भइसकेका छन् । यो प्रणालीले वित्तीय तथ्याङ्कको गुणस्तर सुधार गर्न सहयोग गर्ने ठानिएको छ ।

प्रकाशित : असार ९, २०७९ १४:५०
पूरा पढ्नुहोस्
प्रतिक्रिया
पठाउनुहोस्
×