रामायण सर्किटको रेल जनकपुर आउँदै- समाचार - कान्तिपुर समाचार
कान्तिपुर वेबसाईट
AdvertisementAdvertisement

रामायण सर्किटको रेल जनकपुर आउँदै

सन्तोष सिंह

जनकपुर — रामायण यात्राका लागि भारतीय रेल नयाँदिल्लीबाट पयर्टक लिएर जनकपुर आउने भएको छ । ६ सय धार्मिक पर्यटक लिएर आउने रेलको स्वागतका लागि जनकपुरमा तयारी गरिएको छ ।

तस्बिरहरू : भारतीय रेल्वे मन्त्रालय

रामायण सर्किटमा सञ्चालन हुने ‘भारत गौरव टुरिस्ट रेल’ नन्दीग्राम, बनारस, प्रयागराज, चित्रकुट, नासिक, हम्पी, रामेश्वरम् र भद्राचलम, अयोध्या, सीतामढी हुँदै नेपाल–भारत सिमाना जयनगरबाट जनकपुर आइपुग्ने मधेस प्रदेशका उद्योग, पर्यटन तथा वनमन्त्री शत्रुघ्न महतोले बताए ।

‘विशेष रेल यात्रामा बिहीबार जनकपुर आउने ६ सय पर्यटकलाई रात्रि बासका लागि होटल व्यवस्था गरिएको छ,’ उनले भने, ‘रामायण सर्किट जोड्न विशेष रेलयात्रा दिल्लीबाट सुरु भएको हो । यात्रामा सहभागी पर्यटकलाई जानकी मन्दिर परिसरमा मधेस सरकारले स्वागत गर्नेछ ।’ पर्यटकलाई जानकी मन्दिर, धनुषाधाम र जनकपुरमा दैनिक हुने गंगा आरतीमा सहभागी गराउने तयारी गरिएको मन्त्री महतोले बताए । तीर्थालु लिएर आउने रेल तत्कालै भारत फर्किने कार्यक्रम छ ।

जनकपुर स्टेसनमा दिउँसो रेलमा आइपुग्ने पर्यटकलाई स्वागतको तयारी गरिएको जानकी मन्दिरका उत्तराधिकारी महन्त रामरोशन दासले बताए । जनकपुर दर्शनका लागि आउने पर्यटकको सम्मानमा जानकी मन्दिर परिसरमा सांस्कृतिक कार्यक्रम पनि राखिएको छ ।

भारतीय रेलमा पर्यटक पहिलो पटक जनकपुर आउन लागेकाले नेपाल–भारत सिमाना र जनकपुरमा विशेष सुरक्षा नीति अपनाइएको छ । परराष्ट्र मन्त्रालयबाट आएको पत्रअनुसार भारतीय रेल र पर्यटकको सुरक्षा नीति तयार गरिएको धनुषाका प्रमुख जिल्ला अधिकारी सुरेन्द्र पौडेलले बताए । भारत र नेपाल जोड्ने पहिलो रेल नयाँदिल्लीबाट जनकपुर आउन लागेको हो । भारतीय समयअनुसार मंगलबार साँझ ७ बजे नयाँदिल्लीबाट रेल जनकपुरका लागि प्रस्थान गरिसकेको छ ।

भारतका रेल र पर्यटनमन्त्रीले संयुक्त रूपमा नयाँदिल्ली रेल्वे स्टेसनमा हरियो झन्डा देखाई रेलको बिदाइ गरेका हुन् । १४ डिब्बा रहेको उक्त रेलको प्रत्येक बोगीमा भारतीय कला, संस्कृति, परम्परा, सम्पदालगायत चित्र छन् ।

प्रकाशित : असार ९, २०७९ ०७:२०
प्रतिक्रिया
पठाउनुहोस्

रग्बी फिप्टिनमा नेपालको डेब्यु

कान्तिपुर संवाददाता

काठमाडौँ — नेपाली रग्बी टोलीले ढाकाको आर्मी रंगशालामा पहिलो अन्तर्राष्ट्रिय रग्बी फिप्टिनको आधिकारिक खेल खेलेको छ ।

ढाकास्थित आर्मी रंगशालामा पहिलो अन्तर्राष्ट्रिय रग्बी फिप्टिनको आधिकारिक खेल खेल्ने क्रममा बंगलादेशविरुद्ध नेपाली खेलाडी (नीलो) । नेपालले यसअघि रग्बी सेभेन मात्र खेल्दै आएको थियो। तस्बिर सौजन्य : एनएसजेएफ

प्रतिद्वन्द्वी बंगलादेशले पनि पहिलो आधिकारिक रग्बी खेलेको हो । ‘बंगबन्धु बंगलादेश–नेपाल अन्तर्राष्ट्रिय रग्बी सिरिज २०२२’ नाम दिइरहेको रग्बी १५ मा घरेलु टोली बंगलादेशले जित रचेको छ । खेलमा बंगलादेशले नेपाललाई ३१–७ स्कोरले हरायो ।

कप्तान कृष्ण थापा क्षेत्रीले टस जितेका थिए । नेपालले ७ खेलाडीले खेल्ने रग्बी सेभेन मात्र खेल्दै आएको थियो । विश्व रग्वी महासंघको मुख्य प्रतियोगिता १५ खेलाडीले खेल्ने रग्बी फिप्टिन हो । त्यसमा भाग लिएपछि मात्र नेपाल विश्व रग्बी महासंघको पूर्ण सदस्य बन्न पाउँछ । नेपालका प्रशिक्षक टंकराज गिरीले सञ्चारकर्मीसँग भने, ‘यो ऐतिहासिक उपलब्धिको साक्षी हुन पाउँदा गर्व लागेको छ । अब नेपालको रग्बीमा अगाडि बढ्ने ढोका खुलेको छ ।’


कप्तान क्षेत्रीले पहिलो आधिकारिक प्रतियोगिता खेलेपछि भने, ‘रग्बी सेभन खेलेको दशक बढी भइसक्यो । बल्ल आज आएर आफ्नै कप्तानीमा फिप्टिनको खेल खेल्न पाएँ । ज्यादै खुसी छु । अब हाम्रो लक्ष्य रग्बीको डिभिजन ३ खेल्ने हुनेछ ।’

नेपाल अहिलेसम्म डिभिजनबिहीन छ । रग्बी फिप्टिन खेलेपछि अब त्यो बाटो खुल्नेछ ।

बुधबारको खेल निकै प्रतिस्पर्धात्मक रह्यो । पहिलो हाफमा बंगलादेशले जम्मा एक ट्राइ (५ अंक) मात्र बटुल्यो । घरेलु मैदानको फाइदा उठाउँदै बंगलादेशले दोस्रो हाफमा २६ स्कोर थपेर नेपाललाई दबाबमा राखेको थियो ।

खेलको अन्तिम समयमा भने नेपालले खेल पूर्ण रूपमा नियन्त्रण राख्दै एक ट्राइ (५ अंक) हान्न सफल भयो । विराट श्रेष्ठले उक्त स्कोर गरेका हुन् । यो सँगै उनी नेपालका लागि रग्बी फिप्टिनमा स्कोर गर्ने पहिलो खेलाडी बने ।


ट्राइ गरेपछि सिधा पोस्टमा कन्भर्सन (गोलपोस्टमा सिधा हान्ने) को अवसर पाउँछ । श्रीराम श्रेष्ठले उक्त कन्भर्सन मा स्कोर (२ अंक) गरेपछि नेपालको स्कोर ७ पुग्यो ।

विराट नेपाली टोलीका उपकप्तान हुन् । ३१ वर्षे उनले मैदान छिर्नु अघि भनेका थिए, ‘रग्बी खेलिकन अझैसम्म एक ट्राइ हानेको छैन । आज हान्ने हो ।’ बोलेजसरी नै उनले उत्कृष्ट स्कोर गरेका हुन् । खेलको ७५ औं मिनेटमा टोलीका अग्ला खेलाडी श्रीरामले मिलाइदिएको पास सदुपयोग गर्दै उनले बल लिएर स्कोरलाइनमा डाइभ हानेका थिए ।


बाग्लुङका विराट नेपाली रग्बी टोलीका पुराना खेलाडीमध्ये एक हुन् ।

उनले करिअरको पहिलो स्कोर, त्यो पनि रग्बी फिप्टिनमा गर्न पाउँदा एकदमै खुसी लागेको सुनाए ।

प्रकाशित : असार ९, २०७९ ०७:१४
पूरा पढ्नुहोस्
प्रतिक्रिया
पठाउनुहोस्
×