न्यायाधीश कोइरालालाई कार्यसम्पादनमा रोक लगाइयो- समाचार - कान्तिपुर समाचार
न्यायाधीश-वकिल घूस लेनदेन प्रकरण

न्यायाधीश कोइरालालाई कार्यसम्पादनमा रोक लगाइयो

कान्तिपुर संवाददाता

काठमाडौँ — घूस लेनदेनको अडियो प्रकरणमा जोडिएका काठमाडौं जिल्ला अदालतका न्यायाधीश राजकुमार कोइरालालाई कार्यसम्पदानमा रोक लगाइएको छ ।

न्यायपरिषद्‍को बुधबार बसेको बैठकले उनीमाथि छानबिन प्रक्रिया पूरा नहुँदासम्म कुनै पनि कार्यसम्पादन गर्न नपाउने निर्णय गरेको हो ।

कोइराला र अधिवक्ता रुद्र पोखरेलबीच घुस लेनदेनको अडियो रेकर्ड सार्वजनिक भएपछि न्यायपरिषद्‍को बैठक बुधबार बसेको थियो । बैठकले उक्त प्रकरण छानबिनका लागि परिषद्‍का सदस्य रामप्रसाद श्रेष्ठको नेतृत्वमा तीन सदस्यीय छानबिन समिति गठन गरेको छ ।

समितिमा उच्च अदालत पाटनका कायम मुकायम मुख्य न्यायाधीश महेशप्रसाद पुडासैनी र न्यायाधीश महेश शर्मा पौडेल छन् । समितिलाई ४५ दिनभित्र छानबिन गरी प्रतिवेदन बुझाउनु पर्ने समयसीमा तोकिएको न्यायपरिषद् सचिवालयका प्रवक्ता मानबहादुर कार्कीले जानकारी दिए ।

न्यायाधीश राजकुमार कोइराला र अधिवक्ता रुद्र पोखरेलबीच व्यवसायी इच्छाराज तामाङलाई धरौटीमा छुटाउनका लागि घूस लेनदेनको अडियो वार्ता सार्वजनिक भएपछि बुधबार परिषद्‍को बैठक बसेको हो ।

काठमाडौं जिल्ला अदालतका न्यायाधीश कोइरालाले भने आफूले अनुचित कार्य नगरेको दाबी गरेका छन् । साथै उनले आफ्नाबारे सार्वजनिक भएको समाचारप्रति ध्यानाकर्षण भएको उल्लेख गरेका छन् ।

घटनाबारे न्यायपरिषद्‍बाट छानिबनको माग गर्दै उनले त्यसमा पूर्ण सहयोग गर्ने पनि बताएका छन् । न्यायाधीश कोइरालाले फेसबुकमा लेखेका छन्, 'मबारे आज आएको समाचारप्रति मेरो ध्यानाकर्षण भएको छ । मबाट कुनै अनुचित कार्य भएको छैन । विभिन्न प्रभाव र दबाबका बाबजुद निष्पक्ष भूमिका निर्वाह गरेको छु । ममाथि न्याय परिषद्‍बाट छानबिन होस् तथा सहयोग गर्ने पूर्ण प्रतिबद्धता व्यक्त गर्दछु ।'

'झ्याप्य्राक्कै २ जति लिउँ न !'

न्यायाधीश-वकिल घूस प्रकरणबारे श्रेष्ठको नेतृत्वमा छानबिन समिति


प्रकाशित : असार ८, २०७९ १६:४४
प्रतिक्रिया
पठाउनुहोस्

मकवानपुर जिल्ला भलिबल संघमा सिटौला

सुवास विडारी

मकवानपुर — मकवानपुर जिल्ला भलिबल संघको अध्यक्षमा बसन्तकुमार सिटौला सर्वसम्मत चयन भएका छन् । 

हेटौंडामा बुधबार भएको संघको पाँचौ अधिवेशनबाट सिटौलाको अध्यक्षतामा सर्वसम्मत नयाँ कार्यसमिति चयन गरिएको हो । संघको उपाध्यक्षमा इन्द्र सञ्जेल र चुँडा खड्का, महासचिवमा सन्तोष श्रेष्ठ र कोषाध्यक्षमा शंकर कार्की चयन भएका छन् ।

समिति सदस्यहरुमा मनोज लामा, ईन्द्र बज्राचार्य, कमल बिडारी, सजिता पौडेल, सिशम माझी, रजु घले र रञ्जन अमात्य चयन भएका छन् । जिल्ला भलिबल संघका निवर्तमान अध्यक्ष विन्द्रलाल श्रेष्ठले नवनिर्वाचित अध्यक्ष सिटौलालाई जिम्मेवारी हस्तान्तरण गरेका थिए ।

अध्यक्षमा चयन भएसँगै सिटौलाले जिल्लामा भलिबल खेलाडी उत्पादनका लागि आवश्यक कार्यक्रमहरु सञ्चालन गरिने बताए । उनले जिल्लामा बर्सेनी आवश्यकताअनुसार स्थानीय र राष्ट्रियस्तरको प्रतियोगिता सञ्चालन गर्ने प्रतिबद्धता समेत जनाए ।


प्रकाशित : असार ८, २०७९ १६:४१
पूरा पढ्नुहोस्
प्रतिक्रिया
पठाउनुहोस्
×