न्यायाधीश र वकिलबीचको घुस वार्तालापबारे बारको ध्यानाकर्षण- समाचार - कान्तिपुर समाचार
कान्तिपुर वेबसाईट
AdvertisementAdvertisement

न्यायाधीश र वकिलबीचको घुस वार्तालापबारे बारको ध्यानाकर्षण

कान्तिपुर संवाददाता

काठमाडौँ — नेपाल बार एसोसियसनले व्यवसायी इच्छाराज तामाङलाई छुटाउन काठमाडौं जिल्ला अदालतका न्यायाधीश राजकुमार कोइराला र अधिवक्ता रुद्र पोखरेलबीच भएको लेनदेनको अडियोबारे ध्यानाकर्षण भएको जनाएको छ ।

एसोसियसनकी महासचिव अन्जिता खनालले बुधबार विज्ञप्ति जारी गर्दै न्यायाधीश कर्मचारी तथा कानुन व्यवसायीहरूबाटै हुने अवाञ्छित, अमर्यादित र अनुचित कार्यको निन्दा गरेकी छिन् ।

खनालले जारी गरेको विज्ञप्तिमा भनिएको छ, 'सार्वजनिक भएको अडियो समाचारका सम्बन्धमा सोको आधिकारिकता र सत्य-तथ्य बेहोराको अनुसन्धान तथा छानबिन गरी उक्त कार्यमा कसैको संलग्नता रहेको पाइएमा कसुरदारलाई कानुनी दायरामा ल्याउनका लागि यस नेपाल बार एसोसियसन सम्बन्धित नियमनकारी निकायहरूसँग जोडदार माग गर्दछ ।'

न्युज २४ टिभीले मंगलबार साँझ सार्वजनिक गरेको अडियोमा न्यायाधीश कोइराला र अधिवक्ता रुद्र पोखरेलबीच व्यवसायी तामाङलाई धरौटीमा छुटाउन भएको घुस लेनदेनको कुराकानी भएको खुलासा भएको छ ।

सार्वजनिक भएको अडियोमा तामाङलाई १० करोडमा छुटाउँदा २ करोड आफूहरुलाई आउने भन्दै पोखरेलले कोइरालालाई भनेका छन् । त्यसमा कोइराला आफू तयार रहेको तर माथिल्लो निकायबाट पनि जानकारी आउनुपर्ने कुरा उल्लेख गरेका छन् ।

अधिवक्ता पोखरेलले प्रधानन्यायाधीशदेखि काठमाडौं जिल्ला अदालतका प्रमुखसम्मलाई आफूले मिलाउने कुरा अडियोमा गरेका छन् । यो अडियो सार्वजनिक भएपछि काठमाडौं जिल्ला अदालतले न्यायाधीश कोइरालालाई बुधबार कुनैपनि इजलास तोकेको छैन ।

प्रकाशित : असार ८, २०७९ १४:४९
प्रतिक्रिया
पठाउनुहोस्

सस्तोमा पेट्रोलियम पदार्थ खरिदबारे अध्ययन भइरहेकाे छ : मन्त्री बडू

कान्तिपुर संवाददाता

काठमाडौँ — पेट्राेलियम पदार्थकाे मूल्यमा जनतालाई कुनै राहत नदिएकाे सरकारले सस्ताेमा खरिद गर्नेबारे अध्ययन भइरहेको भन्दै पन्छिएको छ । उद्योग, वाणिज्य तथा आपूर्ति मन्त्री दिलेन्द्रप्रसाद बडूले पेट्रोलियम पदार्थको खरिद गर्न बजार विविधिकरणका लागि अध्ययन भइरहेको बताए ।  पेट्रोलियम पदार्थको मूल्यवृद्धि बारेमा राष्ट्रियसभामा घुमाउरो जवाफ दिँदै उनले सस्तोमा खरिद गर्ने विषयमा अध्ययन भैरहेको बताएका हुन् । हाल नेपालले भारतीय आयल कर्पोरेसनबाट मात्रै तेल खरिद गर्ने गरेको छ । अन्यबाट पनि तेल खरिद हुन सक्नेबारे अध्ययन भइरहेकाे उनकाे भनाइ छ ।

‘बजार विविधिकरण र सस्तोमा पेट्रोलियम पदार्थको खरिद गर्ने सम्बन्धी विभिन्न बजारका विषयमा अध्ययन गर्न राष्ट्रिय योजना आयोगका उपाध्यक्षको नेतृत्वको आयोगमा काम भैरहेको छ’ बडूले भने, ‘संस्थागत सुधारका लागि बनेको कार्यदलको कार्यदेशभित्र सबै विषय परेका छन् । ’ नेपालमा खपत हुने सबै पेट्रोलियम पदार्थको नेपाल आयल निगमले भारतीय आयल निगमसँग सम्झौताअनुसार खरिद गरिरहेको छ । बडूले सरकारले संस्थागत सुधारका लागि काम गरिरहेको बताए ।

सांसदहरुको प्रश्नको जवाफ दिँदै उनले जेठ महिनाभित्र दुई पटक मात्रै मूल्यवृद्धि गरेको बताए । ‘वैशाख ३१ गते र त्यसपछि जेठ १० गते मूल्यवृद्धि गरिएको छ । बैशाख र जेठ फरक फरक महिना हुन्,’ बडूले भने 'मूल्य समायोजन सम्बन्धी नियमावलीको उल्लंघन गरिएको छैन ।' कर घटाएर इन्धनमा सहुलियत दिन सकिनेबारे भने उनले जवाफ दिएनन् । इन्डियन आयल कर्पोरेसन (आईसोसी) बाट १३१. ९१ रुपैयाँमा खरिद गरिएको पेट्रोल सरकारले लगाएको अचाक्ली करकै कारण सर्वसाधारणले १९९ मा खरिद गर्छन् । त्यस्तै, १४६.५२ रुपैयाँमा खरिद गरिएको डिजेल उपभोक्ताले १९२ रुपैयाँमा किन्नुपर्छ ।


प्रकाशित : असार ८, २०७९ १४:३८
पूरा पढ्नुहोस्
प्रतिक्रिया
पठाउनुहोस्
×