सरकार बनाउने बेला दौडधुप गर्नुभन्दा अहिल्यै गठबन्धन गरेर जान्छौं : प्रवक्ता महत- समाचार - कान्तिपुर समाचार

सरकार बनाउने बेला दौडधुप गर्नुभन्दा अहिल्यै गठबन्धन गरेर जान्छौं : प्रवक्ता महत

कान्तिपुर संवाददाता

काठमाडौँ — नेपाली कांग्रेसका प्रवक्ता प्रकाशशरण महतले वर्तमान सत्ता गठबन्धनले आगामी प्रदेश र प्रतिनिधिसभा निर्वाचनमा पनि निरन्तरता पाउने बताएका छन् । उनले अहिलेकै अवस्थामा कुनै पनि दलको बहुमत नआउने र बहुमत नभए सरकार नबन्ने भएकाले चुनावपछि सरकार बनाउन यताउता दौडधुप गर्नुभन्दा अहिल्यै गठबन्धन गरेर जानु उपयुक्त हुने पार्टीको ठहर रहेको बताए ।

रौतहटको यमुना गाउँपालिकाको शुकदेवमा शनिबार सगरमाथा तराई अस्पतालको उद्घाटन गर्दै प्रवक्ता महतले गठबन्धनमा कसरी चुनावी तालमेल गर्ने भनेर छलफल भइरहेको बताए ।

‘हाम्रो संविधानमा ४० प्रतिशत सिट पार्टीको समानुपातिक मतको आधारमा हुने व्यवस्था छ । त्यसकारण अहिलेकै अवस्थामा कुनै पनि पार्टीले एक्लै बहुमत ल्याउन कठिन छ,’ उनले भने, ‘हाम्रो उद्देश्य कांग्रेस एक्लैले दुई तिहाई प्राप्त गर्ने हुनुपर्छ । तर, बहुमत नआएर सरकार बनाउने बेला यता-उता दौडधुप गर्नुपर्ने अवस्था नआओस् भनेर हामी अहिल्यै गठबन्धन गरेर चुनाव जान चाहन्छौं ।’

उनले एमाले अध्यक्ष केपी शर्मा ओलीले गरेको संविधानमाथिको आक्रमण र प्रतिगमतकाविरुद्ध वर्तमान गठबन्धन बनेको भन्दै ओली अहिले पनि गठबन्धनलाई असफल बनाएर मुलुकलाई प्रतिगमनतर्फ लैजान उद्यत रहेको आरोप लगाए ।

‘ओलीजी अहिले पनि गठबन्धनलाई कसरी असफल पार्न सकिन्छ भनेर लागिरहनुभएको छ,’ उनले भने, ‘तर हामी त्यस्तो हुन दिँदैनौं । गठबन्धनमा कुन पार्टीको कहाँ कस्तो अवस्था छ, के अपेक्षा छ ? त्यसबारे छलफल गरेर हामी गठबन्धनलाई निरन्तरता दिन्छौं ।’

उनले स्थानीय तहको निर्वाचनमा मधेसमा गठबन्धनले सन्तोषजनक सफलता हासिल गरेको बताए । ‘मधेसमा आठ जिल्ला हुन् । तीमध्ये चार जिल्लामा गठबन्धनको नतिजा राम्रै भयो । सप्तरी, सिरहा, महोत्तरी र बारामा मात्रै हो, त्यत्ति राम्रो परिणाम नआएको । नभए अरु चार जिल्लामा राम्रो परिणाम आएको छ,’ उनले भने ।

प्रकाशित : असार ४, २०७९ १८:११
प्रतिक्रिया
पठाउनुहोस्

जनप्रतिनिधिलाई नेता पुनको निर्देशन- 'भ्रष्टाचार नगरौं, नमुना बनौं'

कान्तिपुर संवाददाता

काठमाडौँ — नेकपा माओवादी केन्द्र अर्थ तथा योजना विभाग प्रमुख वर्षमान पुनले स्थानीय पालिकामा तल्लो वर्गलाई प्राथमिकतामा राखेर नीति, कार्यक्रम र बजेट निर्माण गर्न निर्देशन दिएका छन् । 

पार्टीले शुक्रबार साँझ गरेको भर्चुअल बैठकमा विभाग प्रमुख पुनले माओवादीद्वारा निर्वाचित महानगरपालिका, उपमहानगरपालिका र गाउँपालिका अध्यक्ष/उपाध्यक्षलाई त्यस्तो निर्देशन दिएका हुन् । संविधानले नेपाललाई समाजवाद उन्मुख भनेकाले समाजवादका आधार निर्माण गर्ने गरी बजेट बनाउन उनको निर्देशन थियो । ‘पुँजीवादमा सक्नेले रोजगारी गर्ने, सक्नेले स्वास्थ्य, शिक्षा किन्ने र राम्रो आवास लिने हो,’ पुनले भने, ‘तर, समाजवाद भनेको नसक्नेलाई राज्यले हेर्ने हो । यसमा हामी स्पष्ट हुनुपर्छ ।’

पुनले तीनवटै सरकारले संविधानको मर्मअनुसार शिक्षा, स्वास्थ्य, रोजगारी र खाद्य सम्प्रभूताको ग्यारेन्टी गर्ने गरी काम गर्नुपर्ने स्पष्ट गरे ।

पुनले स्थानीयस्तरमा कृषि उत्पादन वृद्धि, बजार व्यवस्थापन, रोजगारीको अवसर सिर्जना, विपन्नता न्यूनीकरण गरी समृद्धि हासिल गर्ने गरी काम गर्न निर्देशन दिए । जनताको घरदैलोमा सरकार पुगेको नरुचाउने शक्ति तथा व्यक्तिले स्थानीय सरकार र प्रदेशविरुद्ध प्रचार अभियान चलाइरहेको भन्दै उनीहरुलाई बल पुग्ने गरी भ्रष्टाचारजन्य गतिविधि भए पार्टीलाई सह्य नहुने चेतावनीसमेत दिए । ‘कम्तीमा माओवादीले जितेका पालिकामा भ्रष्टाचार नगरौं,’ उनले भने, ‘हामीले चलाएका पालिकाहरुलाई कुनै न कुनै काममार्फत नमुना बनाऔं ।’ तर, सस्तो लोकप्रियताका लागि राज्यश्रोतको परिचालन नगर्न जनप्रतिनिधिलाई उनले सुझाए ।

स्थानीय अर्थतन्त्रलाई आत्मनिर्भर बनाउन उद्योग, व्यवसाय र कृषिमा सहुलियत ब्याजमा ऋण उपलब्ध गराउनुपर्ने पुनले बताए ।

पार्टी 'जनयुद्ध'बाट आएकाले त्यससँग सम्बन्धित कार्यक्रमहरु घाइते/अपांगता भएकाको नि:शुल्क उपचार, सहिद परिवारलाई राहत र रोजगारी दिनु आफूहरुको दायित्व भएकाले बजेटमा ती विषय नछुटाउन पनि पुनले निर्देशन दिए ।

प्रकाशित : असार ४, २०७९ १७:४५
पूरा पढ्नुहोस्
प्रतिक्रिया
पठाउनुहोस्
×