व्यापारीसँग मिलेर, कमिसन खाएर करका दर तोकियो : ओली - समाचार - कान्तिपुर समाचार
कान्तिपुर वेबसाईट
AdvertisementAdvertisement

व्यापारीसँग मिलेर, कमिसन खाएर करका दर तोकियो : ओली 

कान्तिपुर संवाददाता

काठमाडौँ — प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले करका दर तय गर्ने क्रममा व्यापारीसँग मिलेको र कमिसन खाएको आरोप लगाएका छन् । पार्टीबाट निर्वाचित स्थानीय तहका जनप्रतिनिधिका लागि काठमाडौंमा आयोजना गरिएको प्रशिक्षण र अभिमुखीकरण कार्यक्रममा उनले करका दर तोक्ने क्रममा कमिसनको खेल र व्यापारीसँग साँठगाँठ गरिएको आरोप लगाएका हुन् । 

करका दर तय गर्ने काम गोप्य हुने उल्लेख गर्दै ओलीले वर्तमान सरकार र अर्थमन्त्री जनार्दन शर्माले त्यो गोपनियता कायम गर्न नसकेको आरोप लगाए । 'व्यापारीसँग मिलेर करका दर तोकिन्छ । कमिसन खाएर करका दर तोकिन्छ । यस्तो त कुनै राज्य, कुनै प्रणालीमा पनि कल्पना गर्न सकिँदैन,' उनले भने, 'यो पञ्चायत कालमा पनि हुँदैनथ्यो । कहीँ पनि हुँदैन ।'

बजेट संसद्‍मा प्रस्तुत गर्नुभन्दा पहिला मन्त्रिपरिषद्‍मा ब्रिफिङ गरिने र त्यहाँ पनि करका दर नभई बजेटको समग्र ब्रिफिङ गरिने प्रचलन रहेको ओलीको भनाइ थियो । त्यहाँ रहेका मन्त्रीले करका दर र बजेटबारे सूचना चुहाउलान् भनेर प्रधानमन्त्रीसँगै संसद् जाने प्रचलन रहेको उनले बताए । 'यो गोप्य छ, कतै खुल्दैन भनेर संसद्‍मा मात्रै बजेटको ब्रिफकेस खोलिन्छ है भनेर त्यसरी रिबनले बाँधेर, गोप्य बनाएर लगेर अर्थमन्त्रीले प्रस्तुत गर्नुहुन्छ भनेपछि रोष्ट्रममा गएर मात्रै खोलिन्छ । बजेट प्रस्तुत गरिन्छ,' उनले भने, 'यहाँ त बनाउँदै गर्दा व्यापारिका प्रतिनिधि राखेर बनाइन्छ । बनाउनु पहिला कमिसन खाएर बनाइन्छ भने के हालत भयो देशको ।' राज्यमा यस्तो अवस्था रहेको बेला जितेर आएको भन्दै ओलीले पार्टीबाट निर्वाचित जनप्रतिनिधिलाई बधाई दिएका थिए ।

बजेट निर्माण गर्ने क्रममा अर्थमन्त्रीले अनधिकृत व्यक्तिलाई कर, भन्सार र राजश्वका दर चलाउन लगाएको भन्दै एमालेले संसद्मा विरोध गरिरहेको छ । अर्थमन्त्री शर्माले कि राजीनामा गर्नुपर्ने नभए संसदीय छानबिन समिति गठन गर्नुपर्ने माग एमालेले गरिरहेको छ । नभए संसद् चल्न नदिने भनेर एमालेले संसद्‍मा अभिव्यक्ति दिइरहेको बेला अध्यक्ष ओलीको यस्तो कुरा आएको हो ।

प्रकाशित : असार २, २०७९ १३:२५
प्रतिक्रिया
पठाउनुहोस्

निउरो टिप्न जानेहरू बाघको निसानामा, ९ दिनमा २ जनाको मृत्यु

रमेशकुमार पौडेल

चितवन — निउरो टिप्न चितवन राष्ट्रिय निकुञ्ज आडको मेघौली राधाकृष्ण मध्यवर्ती सामुदायिक वनमा गएकी भरतपुर महानगरपालिका–२७ की २३ वर्षीया रेखा बस्नेतको बाघले आक्रमण गर्दा मृत्यु भएको छ । बस्नेतसहित स्थानीय १०/१२ जना बिहीबार बिहान सात बजे जंगल गएका थिए ।

बस्नेतलाई त्यही बेला बाघले आक्रमण गरेर जंगलभित्र लगेको थियो । मध्याह्न १२ बजेतिर रेखाको शव फेला परेको चितवन जिल्ला प्रहरी कार्यालयका प्रवक्ता डीएसपी नरहरि अधिकारीले जानकारी दिए । रेखा पूर्व म्यादी प्रहरी पनि हुन् ।

पछिल्लो समय चितवन निकुञ्ज आसपासमा बाघ आक्रमणको घटना बढेको छ । यसअघि जेठ २४ गते मंगलबार निकुञ्ज मुख्यालय कसराआडको घौलाघारी मध्यवर्ती सामुदायिक वनमा निउरो टिप्न गएकी भरतपुर–२३ जगतपुरकी मंगली बोटेको पनि बाघ आक्रमणमा परेर ज्यान गएको थियो । ९ दिन नहुँदै निउरो नै टिप्न गएकी अर्को महिलाको पनि बाघले नै ज्यान लिएको छ । चितवन राष्ट्रिय निकुञ्जका प्रमुख संरक्षण अधिकृत हरिभद्र आचार्य यो वर्ष घाँस काट्न, सालको पात टिप्न र निउरो टिप्न जंगल जाँदा आक्रमणका घटना भएको बताउँछन् ।

निकुञ्ज मुख्यालबाट प्राप्त विवरणअनुसार गत वर्षको असार ७ गतेयता बिहीबारको यो घटनासहित बाघ आक्रमणमा परेर ज्यान गुमाउनेहरुको संख्या १६ पुगेको छ । वर्ष दिन नहुँदै यति धेरैले ज्यान गुमाएको घटना यसअघि नभएको निकुञ्जका अधिकारी बताउँछन् । चितवन राष्ट्रिय निकुञ्ज नेपालमा बाघको मुख्य बासस्थल पनि हो । अघिल्ला वर्षहरुको तुलनामा बाघको संख्या बढेको निकुञ्जका अधिकारीहरुको अनुमान छ । त्यसैले आक्रमणका घटना पनि चिन्ताजनक रूपमा बढेका छन् ।

प्रकाशित : असार २, २०७९ १३:२१
पूरा पढ्नुहोस्
प्रतिक्रिया
पठाउनुहोस्
×