कांग्रेस र माओवादीले स्थानीय चुनावमा 'उपगठबन्धन' बनाए : एकीकृत समाजवादी - समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस र माओवादीले स्थानीय चुनावमा 'उपगठबन्धन' बनाए : एकीकृत समाजवादी 

कान्तिपुर संवाददाता

काठमाडौँ — नेकपा एकीकृत समाजवादीले सत्तारुढ गठन्धनका नेपाली कांग्रेस र नेकपा माओवादी केन्द्र 'गठबन्धनभित्र उप गठबन्धन' गरेको जनाएको छ । अध्यक्ष माधवकुमार नेपालले मंगलबार स्थायी कमिटी बैठकमा प्रस्तुत गरेको राजनीतिक प्रतिवेदनमा कांग्रेस र माओवादीले 'उपगठबन्धन' गरेर इमान्दारिता देखाउन नसकेको आरोप लगाएका छन् ।

१३ पृष्ठ लामो प्रतिवदेनमा गठबन्धनभित्र, पार्टीभित्र र प्रविधि तथा प्रशासनिक समस्यालाई छुट्टाछुट्टै शीर्षकमा कमजोरीको बारेमा औंल्याएका छन् । प्रतिवेदनमा अध्यक्ष नेपालले गठबन्धन र पार्टीभित्र ७ प्रकारको समस्याहरु देखिएको जनाएका छन् ।

'पाँच दलीय गठबन्धनभित्र आमरुपमा तालमेल नगरिएको मात्रै होइन गठबन्धनभन्दा बाहिरको दलहरुसँग तालमेल नगर्ने भन्ने गठबन्धनको निर्णयविपरीत नेपाली कांग्रेस र माओवादी केन्द्रले विभिन्न पालिकामा एमालेसँग समेत तालमेल गर्नपुगे' प्रतिवेदन भनिएको छ ।

नेपालको प्रतिवदेनमा गठबन्धनका दलहरुले कांग्रेस र माओवादी केन्द्रले स्थानीय तह चुनावमा तालमेल नै गर्न नचाहेको, भएका निर्णयहरु कार्यान्वयन इमान्दारिता नदेखाएको, गठबन्धनभित्र कांग्रेस र माओवादीले उपगठबन्धन गरेको, गठबन्धन भएको ठाउँमा समेत इमान्दारीपूर्वक भोट नहालेको निष्कर्ष रहेको छ ।

त्यसैगरी गठबन्धनभित्रका दलहरुमा सहकार्यको भावना कमजोर रहेको, गठबन्धनलाई आफ्नो हितमा मात्रै प्रयोग गर्ने चाहाना प्रमुख समस्या भएको नेपालको प्रतिवेदनमा उल्लेख छ । सो दलका नेताहरुले यसअघिदेखि नै कांग्रेस र माओवादी गठबन्धनप्रति इमान्दार नभएको बताउँदै आएका थिए । वैशाख ३० गते भएको स्थानीय तह चुनावमा एकीकृत समाजवादीले एक महानगरपालिका र एक उपमहानगरपालिकासहित २० स्थानीय तहको प्रमुख वा अध्यक्ष जितेको थियो । त्यसैगरी २३ उपप्रमुख वा उपाध्यक्ष, १ सय ९० वडाध्यक्ष, १ सय ८४ महिला सदस्य, १ सय ८० दलीत महिला सदस्य, ३ सय ८९ जना खला सदस्य गरी ९ सय ८६ जना विजयी भएका छन् । सो दलले कांग्रेस र माओवादी केन्द्रबाट जति सहयोग हुनुपर्ने त्यति नहुँदा समस्या भएको बताएका छन् ।

त्यसैगरी अध्यक्ष नेपालले आफ्नो प्रतिवदेनमा पार्टीबाट भएका ७ कमजोरीको बारेमा पनि चर्चा गरेका छन् । पार्टीभित्र गठबन्धन भैहाल्छ भन्दै आन्तरिक तयारी राम्रोसँग नगरेको, पार्टी संगठन मजबुत भएको स्थानमा भन्दा आफू उम्मेदवार हुने संभावना रहेको स्थानमा माग गर्ने गरेको, गठबन्धन हुँदा उम्मेदवारी दिन तँछाडमछाड गर्ने, गठबन्धन नहुँदा उम्मेदवार हुन नचाहेको जनाएका छन् । प्रतिवदेनमा नेताहरुले आफू खुशी उम्मेदवारी पनि फिर्ता लिएको, चुनावलाई जनतामाझ राजनीतिक पुर्‍याउने माध्यम नठानी पद प्राप्त गर्न माध्यम मात्रै ठानेको, पार्टीको टिकटबाट दिएको उम्मेदवारी आफूखुशी फिर्ता लिएको, आफूले टिकट नपाए पार्टीको विरोध गर्ने र पार्टी छाडेको, आफ्नो शक्ति र प्रभावको आकलन नगरी मनोगत विश्लेषणका आधारमा बढी आकांक्षा राख्ने गरेको जनाएको छ ।

प्राविधिक तथा प्रशासनिक समस्या पनि स्थानीय चुनावको क्रममा देखिएको प्रतिवेदनमा उल्लेख छ । सो दलले ठूलो मतपत्र प्रमुख प्रविधिक समस्या रहेको जनाएको छ । 'पहिलो छ वटा मतपत्र एकै ठाउँमा राखेर बनाइएको मतपत्रको ढाँचा नै धेरै भद्दा भयो,' प्रतिवेदनमा भनिएको छ, 'उम्मेदवार नरहेको चिह्न राखेर मतपत्र छाप्नु गलत भयो ।'

प्रतिवदेनमा मतपत्र बेठिक भएकै कारणले धेरै मत बदर भए र मत बदर भएको कारण धेरै उम्मेदवार पराजित भएको उल्लेख छ । 'पराजित घोषित भएका उम्मेदवारमा हाम्रो पार्टीका उम्मेदवार सबैभन्दा बढी रहनु भएको छ' प्रतिवेदनमा भनिएको छ । निर्वाचन आयोग निष्पक्ष नभएको आरोप लगाउँदै प्रतिवदेनमा भनिएको छ, 'उसले भन्ने एउटा गर्ने अर्को समेत गर्‍यो ।' प्रतिवदेनमा अध्यक्ष नेपालले सबैभन्दा कमजोरी पार्टीको संगठित शक्ति बलियो नहुनलाई औंल्याएका छन् ।

'यस निर्वाचनबाट प्राप्त सबैभन्दा ठूलो शिक्षा सफलता प्राप्त गर्नका निम्ति सबभन्दा पहिले बलियो र व्यवस्थित संगठन निर्माण गर्नुपर्दछ भन्ने हो,' प्रतिवेदनमा भनिएको छ, 'आर्थिक कोषको निर्माण र स्रोत साधनको व्यवस्थापन, जनताको मन छुने खालको प्रभावकारी प्रचार सामग्रीहरुको निर्माण र उम्मेदवार चयन पनि चाँडो गर्नुपर्दछ ।'

सो दलले संगठनको शक्तिभन्दा पनि कम स्थानमा मात्रै उम्मेदवारी परेको जनाएको छ । सो दलको आन्तरिक कमजोरीको कारण स्थानीय तह चुनावमा धेरै स्थानमा उम्मेदवार उठाउन नसकिएको जनाएको छ । 'अहिले भन्दा दोब्बर वडामा उम्मेदवार दिन अवस्था थियो,' प्रतिवदेनमा भनिएको थियो ।

मंगलबारबाट सुरु भएको बैठकमा सातै प्रदेशका इन्चार्जहरुले स्थानीय चुनावको समीक्षा गरेका थिए । बैठकमा प्रदेश १ का इन्चार्ज धनेन्द्र बस्नेतले संसदीय चुनावमा एमालेसँग पनि गठबन्धन गरेर जानुपर्ने धारणा राखेका थिए । 'बैठकमा सबै इन्चार्जहरुले कांग्रेस र माओवादीले गठबन्धनभित्र पनि गठबन्धन गरेको विषयलाई उठाउनु भएको थियो,' स्थायी कमिटीका सदस्य श्रीप्रसाद साहले भने, 'एमालेसँग पानी बाराबार गरेर जानु नहुने धारणा पनि आएको छ । इन्चार्ज कमरेडहरुले एमालेभित्र रहेको ओलीविरोधी शक्तिसँग मिलेर जान सकिने बताउनुभएको छ ।'

प्रकाशित : जेष्ठ ३१, २०७९ २१:५८
प्रतिक्रिया
पठाउनुहोस्

पाँच दिनदेखि अनशनरत निहारिकाको अपिल- ‘मेरो न्यायका लागि सबैले बोलिदिनुहोला’

उनीसँगै बसेका ओझा र शर्माले अनशन तोडे
कान्तिपुर संवाददाता

काठमाडौँ — न्यायको माग गर्दै पाँच दिनदेखि काठमाडौंको बसन्तपुरमा अनशनरत अविवाहित आमा निहारिका राजपुतले आफ्नो न्यायका लागि सहयोग गरिदिन अपिल गरेकी छन् । महोत्तरीको जलेश्वर नगरपालिका–८ की निहारिका २१ महिनाको छोरासहित गत शुक्रबारदेखि आमरण अनशनमा बसेकी छिन् ।

आफू १७ वर्षको हुँदा धनुषाको क्षिरेश्वर नगरपालिका–३ का शिवराज श्रेष्ठले औषधि खुवाएर बलात्कार गरेको र त्यही कारण आफू गर्भवती भई छोरा जन्मिएको उनको भनाइ छ । ‘म पाँच दिनदेखि म र मेरो बच्चाको न्यायका लागि आमरण अनशनमा छु, मलाई सबैले सहयोग गरिदिनुहोला, मेरो न्यायको लागि सबैले बोलिदिनुहोला,’ उनले भनेकी छिन्, ‘जबसम्म मेरो बच्चा र मैले यो समाजमा इज्जतले हिँड्ने वातावरण हुँदैन, त्यो दिनसम्म म संघर्ष गरिरहनेछु ।’

उनले यो लडाइँ आफ्नोमात्रै नभई आफूजस्तै हजारौँ महिलाले न्याय पाउने वातावरण सुनिश्चितताका लागि भएको बताएकी छिन् । ‘दोषीलाई छिटोभन्दा छिटो कारबाही होस् मेरो यही माग हो,’ उनी भन्छिन्, ‘म धेरै बोल्न सक्ने अवस्थामा छुइनँ । बोल्न पनि गाह्रो भइरहेको छ ।’

निहारिकाको न्यायका लागि ऐक्यबद्धता जनाएर अनशन बसेका जस्मिन ओझा र देव शर्माले मंगलबार अनशन तोडेका छन् । निहारिकाका तर्फबाट राज्य पक्षसँग वार्ताका लागि असहज भएको भन्दै सबैले अनशन तोड्न आग्रह गरेपछि आफूले अनशन निहारिकाकै हातबाट अनशन तोडेको ओझाले बताइन् ।

अधिकारकर्मी मोहना अन्सारीका अनुसार मंगलबार गृहमन्त्री बालकृष्ण खाँण र अधिकारकर्मीबीच छलफलपछि सरकार निहारिकाको मुद्दा सम्बोधन गर्न तत्पर रहेको छ । त्यसबारे बुधबार वार्ताको तयारी भइरहेको छ ।

यो पनि पढ्नुहोस् :-

प्रकाशित : जेष्ठ ३१, २०७९ २१:३०
पूरा पढ्नुहोस्
प्रतिक्रिया
पठाउनुहोस्
×