नेपाल ल्यान्डपावर हो: अमेरिकी जनरल फ्लिन - समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपाल ल्यान्डपावर हो: अमेरिकी जनरल फ्लिन 

जगदीश्वर पाण्डे

काठमाडौँ — अमेरिकी सेनाको प्रशान्त क्षेत्रका प्रमुख चार्ल्स ए. फ्लिनले नेपाल ‘ल्यान्डपावर’ भएको बताएका छन् । नेपाल भ्रमणको दोस्रो दिन कान्तिपथस्थित फोहोरा दरबारमा नेपालका सुरक्षाविद् तथा पूर्वसुरक्षाकर्मीहरुसँगको शनिबार आयोजित अन्तरक्रियामा जनरल फ्लिनले अमेरिकी सेना र नेपाली सेना बीचको सहकार्य शान्तिका लागि भएको बताए।

फोहोरा दरबारमा अमेरिकी रिक्रिएसन सेन्टर छ । उनले नेपाली सेनासँग सहकार्य र सहयोग जारी राख्ने प्रतिबद्धता उल्लेख गर्दै संगठनको मुक्तकण्ठले प्रशंसा गरे । ‘नेपाल र अमेरिकाको कूटनीतिक सम्बन्ध भएको ७५ वर्ष भयो । नेपाली सेना शान्तिलाई मन पराउने सेना हो । हामी अमेरिकी सेना र नेपाली सेनाको सहकार्य शान्तिको लागि हो,’ अन्तरक्रिया कार्यक्रममा सहभागी एक सुरक्षा जानकारले जनरल फ्लिनलाई उदृत गर्दै कान्तिपुरसँग भने ।

फ्लिनले आफ्नो ३० मिनेट लामो प्रवचनमा नेपाली सेना र सरकारसँग सहकार्य गर्ने उल्लेख गर्दै नेपाली सेनाको व्यवसायीकतासँग आफूहरु प्रभावित भएको प्रस्ट पारे । उनले भने,‘म नेपाल आउने भन्दा र यहाँको सेनाको व्यावसायिकता देख्दा गर्व पनि लाग्छ ।’ कार्यक्रम दिउँसो २ बजदेखि ३:३० बजेसम्म भएको थियो ।

जनरल फ्लिनले अहिले अमेरिका ‘ग्लु’ रहेको उल्लेख गर्दै यसले संसारलाई जोड्ने काम गर्ने उल्लेख गरे । उनले इन्डो–प्यासिफिक र एसिया–प्यासिफिक क्षेत्र बीचको कुरा पनि गरे । इन्डो–प्यासिफिक भित्र ३६ मुलुकहरु रहेको उल्लेख गर्दै उनले अमेरिकाको लागि यो क्षेत्र महत्वपूर्ण भूभाग रहेको भएको बताए । ‘अमेरिकी सेना र नेपाली सेना बीचको सम्बन्ध किन महत्वपूर्ण छ भने यो सम्बन्ध दुवै मुलुकको समृद्धिका लागि हो,’ उनले अन्तरक्रियाको क्रममा भएको सहभागी अर्का सुरक्षा जानकारले भने ।

जनरल फ्लिनले नेपाली सेना विश्वकै एक उत्कृष्ट सेना रहेको उल्लेख गर्दै नेपाली सेनाले क्षमता अभिवृद्धिमा अमेरिकी सेनाले सहयोग गर्ने प्रतिबद्धता व्यक्त गरे । उनले नेपाली सेना एसियाकै पहिलो पुरानो सेना रहेको पनि बताए । उनले नेपाली सेनासँग भएको कौशलताको प्रशंसा गरे । ‘नेपालीसँग सहकार्य गर्न पाउँदा, ज्ञानको साटसाट गर्न पाउनु हाम्रो लागि राम्रो कुरा हो,’ उनले थपे । नेपाली सेनासँग उच्च हिमाली क्षेत्रमा हुने प्राकृतिक प्रशिक्षण सहयोगको कुरा पनि गरे ।

नेपाली पक्षसँग द्वीपक्षीय हित र पारस्परिक सम्बन्धमा जोड दिँदै उनले शुक्रबार नेपाल भ्रमणको दोस्रो दिन राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेट तथा प्रधानसेनापति प्रभुराम शर्मासँग भेटवार्ता गरेका थिए ।

जनरल फ्लिनले शनिबार मौसमको कारणले गर्दा माउन्टेन फ्याइट र पोखरा भ्रमण नगरेपछि काठमाडौं उपत्यकाका पुरातात्विक सम्पदाहरुको भ्रमण गरेका थिए । उनी भोलि पाँचखालस्थित वीरेन्द्र शान्ति कार्य तालिम केन्द्र र शिवपुरीस्थित सैनिक कमान्ड एन्ड स्टाफ कलेजमा भ्रमण गरेर स्वदेश फर्कने कार्यक्रम छ ।

प्रकाशित : जेष्ठ २८, २०७९ २१:२८
प्रतिक्रिया
पठाउनुहोस्

एमाले बाहेकका दलले देश समृद्ध बनाउन सक्दैनन् : केपी ओली

कान्तिपुर संवाददाता

काठमाडौँ — नेकपा एमालेका अध्यक्ष केपी ओलीले एमाले बाहेक अन्य दलले मुलुकलाई समृद्ध बनाउन नसक्ने दाबी गरेका छन् । स्थानीय तह निर्वाचनमा पार्टीको पक्षमा जनमत निर्माण गर्न सहयोग गरेका कलाकारहरुको सम्मानमा शनिबार काठमाडौंमा आयोजित कार्यक्रमलाई सम्बोधन गर्दै उनले यस्तो बताएका हुन् ।

एमाले जस्तो देशको हितमा मरिमेटेर लाग्ने पार्टी नेपालमा अरु नभएको पनि अध्यक्ष ओलीले दोहोर्‍याएका थिए ।

ओलीले भनेका थिए, 'एमाले बाहेक अन्य दलले समृद्ध नेपालः सुःखी नेपाली भनेको सुन्नु भएको छ ? देशलाई मानव समाजजस्तो बनाउनु छ भने, विकसित, सभ्य, आधुनिक नेपाल निर्माण गर्नु छ भने एमाले बाहेक अरुले अगुवाइ गर्न सक्दैन । सही सत्य कुरा यो हो । यो राजनीति गरेको होइन, भोट मागेको होइन । देशको हितको पक्षमा बोलेको हो । देशको हितको पक्षमा सत्य बोलेको हो । यदि एमालेका नीतिहरु त्यस्ता हुँदैन थिए भने अरुका नीति देशको पक्षमा हुन्थे भने म आफैं त्यो पार्टीमा हुन्थें । किनभने देशभन्दा ठूलो अरु केही पनि हुँदैन । तर यथार्थ के हो भने–एमालेजस्तो देशलाई माया गर्ने, देशको हितमा लड्ने र देशका निम्ति मरिमेट्ने अर्को पार्टी छैन ।'

देशको भूभाग समेटेर नक्सा जारी गर्न, चीनतिरको नाका खुलाउन, तराईमा डुबान भएको जमिन खोल्न, मिचिएको सीमा समस्या समाधान गर्न एमाले नै चाहिएको भन्दै अरु पार्टीहरुले त्यस्तो गर्न नसक्ने पनि अध्यक्ष ओलीको जिकिर थियो ।

प्रकाशित : जेष्ठ २८, २०७९ २१:२३
पूरा पढ्नुहोस्
प्रतिक्रिया
पठाउनुहोस्
×