तारा एयरको जहाज खोज्न नेपाली सेनाको टोली मानापाथी हिमालतर्फ

नेपाली सेनाको मध्य कमाण्ड हेडक्वार्टर पोखराका प्रमुख बाबुराम श्रेष्ठले स्थानीयले खबर गरेको भएपनि यकिन भने नभएको बताए । ‘स्थानीयले उक्त स्थानमा जहाज दुर्घटनामा परेको बताएका छन्, लोकेट भयो भन्ने छ’ उनले भने, ‘यकिन भइसकेको छैन । हामी अब त्यस स्थानमा केन्द्रित भएका छौं ।’

थासाङ गाउँपालिका अध्यक्ष प्रदिप गौचनले दुर्घटनाको आश‌ंका गरिएको स्थानको पहिचान गर्न त्यसतर्फ चारजना गइरहेको बताएका छन् । उनले सेनाले पाएको जानकारी अनुसार त्यसतर्फ उद्दार टोली गइरहेको बताएका छन् ।

हुस्सु लागेका कारण दुर्घटनास्थलमा हेलिकोप्टर जान सकेको छैन । जहाज खोज्न निस्किएको नेपाली सेनाको हेलिकोप्टर मुस्ताङको कोवाङमा अवतरण भएको छ ।

पोखराबाट जोमसोम उडेको तारा एयरको कलसाईन ९ एन इ टी भएको ट्वीनअटर जहाज आइतबार बिहानदेखि सम्पर्कविहीन बनेको थियो ।

आइतबार बिहान बिहान ९ बजेर ५५ मिनेट जाँदा पोखराबाट उडेको जहाजमा चालक दलका तीनसहित १६ नेपाली र ६ विदेशी नागरिक रहेका छन् ।