समाजवादी लक्ष्य हासिल गर्न वाम-लोकतान्त्रिक गठबन्धन भरपर्दो विकल्प : दाहाल- समाचार - कान्तिपुर समाचार

समाजवादी लक्ष्य हासिल गर्न वाम-लोकतान्त्रिक गठबन्धन भरपर्दो विकल्प : दाहाल

कान्तिपुर संवाददाता

काठमाडौँ — नेकपा (माओवादी केन्द्र) का अध्यक्ष पुष्पकमल दाहालले समाजवादी लक्ष्य हासिल गर्न वर्तमान वाम-लोकतान्त्रिक गठबन्धन भरपर्दो विकल्प भएको बताएका छन् । पन्ध्रौं गणतन्त्र दिवसको अवसरमा आइतबार शुभकामना सन्देश जारी गर्दै दाहालले देशको परिवर्तन र अग्रगमनसहित संविधानले निर्दिष्ट गरेको समाजवादी लक्ष्य हासिल गर्न वाम-लोकतान्त्रिक गठबन्धन भरपर्दो विकल्प रहेको बताएका हुन् । 

नेपालको राजनीतिक इतिहासमा विभिन्न राजनैतिक विचार र प्रवृतिहरु बीचका संघर्ष, सहकार्य र रुपान्तरणको प्रक्रियाबाट ठूलाठूला राजनैतिक परिवर्तन संभव भएको उल्लेख गर्दै दाहालले आजको दिन सम्पूर्ण देशभक्त, वामपन्थी, प्रगतिशील र लोकतान्त्रिक शक्तिहरुलाई संघीय लोकतान्त्रिक गणतन्त्रको रक्षा, विकास र सुदृढीकरणका लागि एकताबद्ध भई अघि बढन अपिलसमेत गरेका छन् ।

दाहालले गणतन्त्र दिवस २०७९ को अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरुमा सुस्वास्थ, दीर्घायू र उत्तरोत्तर प्रगतिको कामना गरेका छन् । १० वर्षे 'जनयुद्ध', संयुक्त जनआन्दोलन, मधेस आन्दोलन लगायतका आन्दोलनका क्रममा गणतन्त्र प्राप्तिका लागि आफ्नो प्राणको आहुति दिने सहिदहरुमा श्रद्धाञ्जली व्यक्त गर्दै उनले आन्दोलनको क्रममा बेपत्ता र घाइते योद्धाहरुमा सम्मान व्यक्त गरेका छन् ।

देशव्यापीरुपमा एकैसाथ सम्पन्न स्थानीय तह निर्वाचनमा जनताको उत्साहजनक सहभागिता रहेको उल्लेख गर्दै उनले निर्वाचनमा जित-हारभन्दा पनि संविधान कार्यान्वयन गर्ने र लोकतन्त्रलाई समृद्ध बनाउने अग्रगमनको प्रक्रिया विजयी बनेकोमा खुसी व्यक्त गरेका छन् ।

प्रकाशित : जेष्ठ १५, २०७९ ०८:०१
प्रतिक्रिया
पठाउनुहोस्

आर्थिक, सामाजिक रुपान्तरणसहित समृद्ध नेपाल निर्माणमा अघि बढौं : अध्यक्ष नेपाल

कान्तिपुर संवाददाता

काठमाडौँ — नेकपा एकीकृत समाजवादीका अध्यक्ष माधवकुमार नेपालले संघीय लोकतान्त्रिक गणतन्त्रात्मक शासन व्यवस्थाको माध्यमबाट आर्थिक, सामाजिक रुपान्तरणसहित समृद्ध नेपाल निर्माणका लागि अगाडि बढ्न आह्वान गरेका छन् ।

आइतबार १५ औं गणतन्त्र दिवसको अवसरमा शुभकामना व्यक्त गर्दै उनले नेपाली जनताको दशकौं लामो संघर्षबाट मुलुकमा संघीय लोकतान्त्रिक गणतन्त्र स्थापना भएको उल्लेख गरेका छन् । गणतन्त्र स्थापनाका लागि भएको ऐतिहासिक जनक्रान्तिसहित न्यायपूर्ण आन्दोलनहरुमा सहादत प्राप्त गर्ने सहिदहरुप्रति भावपूर्ण श्रद्वाञ्जली अर्पण गर्दै उनीहरुको योगदानको उच्च सम्मान व्यक्त गरेको उनले बताएका छन् ।

'जनताको बलिदानपूर्ण संघर्षको फलस्वरुप लोकतान्त्रिक गणतन्त्र, संघीयता, धर्मनिरपेक्षता, समानुपातिक तथा समावेशी शासन व्यवस्थासहितको संविधान निर्माणमा सफलता प्राप्त भएको हो । सार्वभौमसत्ता पूर्णरुपमा जनतामा निहीत रही जननिर्वाचित प्रतिनिधिबाट शासन सञ्चालन हुने व्यवस्था उत्कृष्ट राजनीतिक प्रणाली भएपनि अझै हाम्रो जीवनपद्धतिका रुपमा स्थापित र संस्थागत हुन सकिरहेको छैन । राजनीतिक परिवर्तनले जनताको जीवनस्तरमा गुणात्मक परिवर्तन ल्याउन सकेको छैन,' शुभकामना सन्देशमा उनले भनेका छन् ।

अर्कोतिर यही व्यवस्थाको माध्यमबाट शासनसत्तामा पुगेकाहरुमा स्वेच्छाचारी प्रवृति, निरंकुश तरिका र अहंकारी व्यवहार तथा भ्रष्ट आचरण देखिनु दु:खद पक्ष भएको उनको भनाई छ ।

'गत वर्ष सार्वभौम जनताको प्रतिनिधित्व हुने प्रतिनिधिसभालाई पटक-पटक विघटन गरी मुलुकलाई पुनः राजनीतिक अस्थिरतातर्फ धकेल्ने प्रयासलाई जनताले असफल बनाएका थिए। जनभावनाको कदर गर्दै संविधानद्वारा निर्दिष्ट दायित्व पूरा गर्नु, सार्वभौमिकता, स्वाधीनता र राष्ट्रिय एकतालाई सुदृढ गर्दै देशलाई आर्थिक विकासको मार्गमा अगाडि बढाउनु अहिलेको आवश्यकता हो,' उनले भनेका छन्, 'असंलग्न परराष्ट्र नीतिप्रति निष्ठावान रहँदै राष्ट्रको सार्वभौम सत्ता र स्वाभिमानको रक्षार्थ दृढताका साध उभिनु हामी प्रत्येक नेपालीको कर्तव्य र जिम्मेवारी हो ।'


प्रकाशित : जेष्ठ १५, २०७९ ०७:५९
पूरा पढ्नुहोस्
प्रतिक्रिया
पठाउनुहोस्
×