लोकतान्त्रिक गणतन्त्रलाई जनअनुभूतिबाट प्रमाणित गर्न चाहन्छौं : ओली- समाचार - कान्तिपुर समाचार

लोकतान्त्रिक गणतन्त्रलाई जनअनुभूतिबाट प्रमाणित गर्न चाहन्छौं : ओली

कान्तिपुर संवाददाता

काठमाडौँ — नेकपा (एमाले) का अध्यक्ष केपी शर्मा ओलीले समृद्ध नेपाल, सुखी नेपालीको राष्ट्रिय आकांक्षा पूरा गर्ने संकल्प बोकेर लोकतान्त्रिक गणतन्त्रलाई जनअनुभूतिबाट प्रमाणित गर्न चाहेको बताएका छन् ।

पन्ध्रौं गणतन्त्र दिवसका अवसरमा आइतबार शुमकामना सन्देशमार्फत अध्यक्ष ओलीले राष्ट्रिय समृद्धिका पाइलाहरुलाई उचाईमा पुऱ्याउने सबैको साथ रहनेसमेत अपेक्षा राखेका छन् । ओलीको सन्देशमा भनिएको छ, 'जनविरोधी शक्तिहरुका अनुचित दुष्प्रयासहरुले अवरोध पुर्‍याएर थाती रहन पुगेका राष्ट्रिय समृद्धिका पाइलाहरुलाई उचाईमा पुऱ्याउने नेकपा (एमाले) को अभियानमा सम्पूर्णको साथ रहनेछ भन्ने मैले अपेक्षा गरेको छु,'

गत आम निर्वाचनबाट बनेको नेकपा (एमाले) नेतृत्वको सरकारले नयाँ संविधानले परिकल्पना गरेको संघीय लोकतान्त्रिक शासन प्रणालीलाई सुदृढ गर्दै मुलुकलाई विकास र समृद्धिको बहसतर्फ अग्रसर गराएको उनको दाबी छ । उनले मुलुकमा आफूहरुले सुशासन र समृद्धितर्फको बहसमा केन्द्रित गर्न सफल भएको पनि बताएका छन् ।

जनताको बलिदानीपूर्ण संघर्षले स्थापित भएको लोकतान्त्रिक गणतन्त्रमाथि आज संविधानले परिभाषित गरेका राज्यका अंगहरूलाई दुरुपयोग गरी संविधान र प्रणालीको अतिरिक्त व्याख्या/ अपव्याख्याद्वारा प्रहार गर्ने काम भइरहेको उनको सन्देशमा छ । मुलुकको विकासका सम्पूर्ण कामहरुमा अल्पविराम लागेको भन्दै ओलीले केही वर्षयता सुरु भएको विकासको राष्ट्रिय बहसको ठाउँ सत्ताशक्तिको अनुचित भागबन्डा, लेनदेन र राज्यस्रोतको दोहनले लिएको बताएका छन् ।

प्रकाशित : जेष्ठ १५, २०७९ ०६:४९
प्रतिक्रिया
पठाउनुहोस्

सञ्जीव र भीष्मा विजयी

कान्तिपुर संवाददाता

हेटौंडा — गणतन्त्र दिवसको अवसरमा हेटौंडामा शनिबार आयोजित खुला दौड प्रतियोगितामा पुरुषतर्फ सञ्जीव मिजार र महिलातर्फ भीष्मा बस्नेत विजयी भएका छन् । प्रदेश खेलकुद विकास परिषद्द्वारा आयोजित दौड प्रतियोगितामा सञ्जीवले ६ किलोमिटर दूरी २३ मिनेट २६ सेकेन्डमा पूरा गरे । 

भीष्माले उक्त दूरी २७ मिनेट ३८ सेकेन्डमा पार गरिन् । विजेता दुवैल समान १५ हजार रुपैयाँ पुरस्कार प्राप्त गरेका छन् । नारायण जीसीले २३ मिनेट ३१ सेकेन्ड र गणेशबहादुर कुँवरले २३ मिनेट ४७ सेकेन्डबाट दोस्रो र तेस्रो स्थान हासिल गरेका थिए । महिलातर्फ वसन्ती गोले (२८ मिनेट ४२ सेकेन्ड) र दुर्गा स्वाती (३० मिनेट ३५ सेकेन्ड) दोस्रो र तेस्रो भए । दोस्रोले १० हजार र तेस्रोले ५ हजार रुपैयाँ पुरस्कार पाए ।

दौड बुद्धचोकबाट सुरु भएको थियो । स्पर्धामा ५८ पुरुष र ९ महिलाले प्रतिस्पर्धा गरेका थिए


प्रकाशित : जेष्ठ १५, २०७९ ०६:४७
पूरा पढ्नुहोस्
प्रतिक्रिया
पठाउनुहोस्
×