एमालेलाई कमजोर बनाएर गठबन्धन शक्तिशाली बन्न खोज्दैछ : अष्टलक्ष्मी शाक्य- समाचार - कान्तिपुर समाचार
कान्तिपुर वेबसाईट
AdvertisementAdvertisement

एमालेलाई कमजोर बनाएर गठबन्धन शक्तिशाली बन्न खोज्दैछ : अष्टलक्ष्मी शाक्य

‘एमालेलाई कमजोर बनाएर देश बलियो हुँदैन’
सुवास विडारी

मकवानपुर — वाग्मती प्रदेशकी पूर्वमुख्यमन्त्री अष्टलक्ष्मी शाक्यले नेकपा एमालेलाई कमजोर बनाएर सत्तारुढ गठबन्धन शक्तिशाली बन्न खोजेको आरोप लगाएकी छन् ।
शुक्रबारबाट सुरु भएको प्रदेशसभाको दसौं अधिवेशन सफलताको शुभकामना व्यक्त गर्दै विपक्षी दलकी नेता शाक्यले सत्ता गठबन्धन शक्तिको दुरुपयोग गरेर लोकतन्त्र कमजोर बनाउनेतर्फ उद्दत भएको आरोप लगाएकी हुन् ।

उनले स्थानीय तह निर्वाचन सकिएसँगै गठबन्धन प्रदेश र संघको चुनावको मिति तोक्न हतारिएको बताइन् । उनले मंसिरअगावै संघ र प्रदेशको निर्वाचन गर्न वर्तमान सरकारको तयारी भइरहेको बताइन् ।

‘स्थानीय तहको निर्वाचनमा गठबन्धनले देखाएको चरित्रका कारण हाम्रो निर्वाचन प्रणाली, संघीयता र राजनीतिक दलप्रति नै प्रश्न उठेका छन्,’ उनले भनिन् । उनले एमालेलाई कमजोर बनाएर देश बलियो नहुने बताइन् । ‘लोकतन्त्र, गणतन्त्र र संघीयता जोगाऔं । यो हाम्रो साझा विषय हो । दललाई कमजोर बनाएर लोकतन्त्र बलियो हुँदैन । दल बलियो भए मात्र लोकतन्त्र बलियो हुन्छ,’ उनले भनिन् ।

शाक्यले वाग्मतीमा प्रदेश सरकार जनताले महसुस गर्न नपाएको बताइन् । ‘केन्द्रीय राजधानीमा दैनिक रूपमा विभिन्न घटनाहरू भइरहेका छन् । यस विषयमा प्रदेश सरकार मौन देखिन्छ । काठमाडौं पनि प्रदेशको एउटा जिल्ला हो । त्यहाँको समस्या समाधानमा पनि हाम्रो ध्यान जान जरुरी छ । यस्ता विषयलाई पनि हाम्रो कानुनमा समेट्न जरुरी छ,’ उनले भनिन् ।

शाक्यले प्रदेशसभा समितिलाई प्रभावकारी बनाउन जरुरी रहेको औंल्याइन् । ‘सदन र समितिलाई चलायमान, प्रभावकारी र जवाफदेही बनाउनुपर्ने अहिलेको आवश्यकता हो । हामी जेजति अप्ठेरो भए पनि बाँकी समय प्रभावकारी रूपमा सदनलाई अगाडि बनाउनु हाम्रो दायित्व हो,’ उनले भनिन् ।

प्रकाशित : जेष्ठ १३, २०७९ १२:४२
प्रतिक्रिया
पठाउनुहोस्

मकवानपुर गोल्डकपमा जेठ १९ देखि

सुवास विडारी

मकवानपुर — चौथो संस्करणको स्थानीय तह मकवानपुर गोल्डकप फुटबल प्रतियोगिता–२०७९ हेटौंडामा यही जेठ १९ गतेदेखि सुरु हुने भएको छ । मकवानपुर जिल्ला फुटबल संघको आयोजना तथा जिल्लाका १० वटा स्थानीय तहको सहयोगमा हुने प्रतियोगिता जेठ २८ गतेसम्म सञ्चालन हुने छ ।

हेटौंडा–५ स्थित पिप्लेक्याम्पा रंगशालामा हुने प्रतियोगितामा एक विदेशीसहित १० वटा चर्चित फुटबल क्लबहरुले सहभागी हुनेछन् । प्रतियोगितामा विभागीय क्बल नेपाल आर्मी, नेपाल पुलिस, सशस्त्र प्रहरीको (एपीएफ) क्लब, फ्रेण्डस्, खुमलटार युथ क्लब, सिमरा, वाग्मती युवा क्लब सर्लाही, विजय युथ क्लब हेटौंडा र चितवन–११ सहभागी हुने बिहीबार हेटौंडामा आयोजित पत्रकार सम्मेलनमा जानकारी दिइयो । आयोजकका अनुसार विदेशी क्लब एभिनियर एफसी क्यामरुन पनि प्रतियोगितामा सहभागी हुनेछ ।

प्रतियोगिता विजेताले नगद १५ लाख र उपविजेताले नगद १० लाख रुपैयाँ प्राप्त गर्ने फुटबल संघ अध्यक्ष टीकाराम लामाले जानकारी दिए । प्रतियोगिताका लागि करिब १ करोड १७ लाख खर्च अनुमान गरिएको छ । ‘यस वर्ष हामीले प्रथम र द्वितीय पुरस्कारमा वृद्धि गरेका छौं । जसकारण प्रतियोगिता अझै प्रतिस्पर्धात्मक हुने अपेक्षा छ’, लामाले भने ।

अघिल्लो वर्ष विजेताले १० र उपविजेताले ५ लाख रुपैयाँ पुरस्कार प्राप्त गरेका थिए । अघिल्लो संस्करणमा नेपाल आर्मी च्याम्पियन भएको थियो । राष्ट्रिय खेलाडीहरु अन्तर्राष्ट्रिय खेलमा व्यस्त रहेका कारण यस वर्ष मच्छिन्द्र, थ्रीस्टार र मनाङ भने प्रतियोगितामा सहभागी हुने छैन ।

प्रतियोगितामा विधागतरुपमा उत्कृष्ट गोलरक्षक, डिफेन्डर, मिडफिल्डर, फरवार्ड, सर्वाधिक गोलकर्ता तथा उत्कृष्ट प्रशिक्षकलाई जनही २५ हजार रुपैयाँ नगदसहित पुरस्कार व्यवस्था गरिएको छ । प्रत्येक खेलको म्यान अफ दी म्याचलाई नगद १० हजार रुपैयाँ प्रदान गरिने प्रतियोगिता संयोजक प्रताप विष्टले जानकारी दिए ।

प्रतियोगिता पुस महिनामै हुनुपर्ने भए पनि विभिन्न अन्तर्राष्ट्रिय फुटबल प्रतियोगिता र ए डिभिजन लिगका कारण मिति सारिएको हो । केही दिनभित्र खेल तालिका सार्वजनिक गरिने आयोजकले जनाएको छ ।

प्रकाशित : जेष्ठ १२, २०७९ १७:३२
पूरा पढ्नुहोस्
प्रतिक्रिया
पठाउनुहोस्
×