कांग्रेस महामन्त्री शर्मा भन्छन् : बालेन एक्लै हुन् वा एक्लै छन् नसोचौँ- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस महामन्त्री शर्मा भन्छन् : बालेन एक्लै हुन् वा एक्लै छन् नसोचौँ

'बालेनलाई दिउँ बधाई ! बदलौँ आफूलाई !'
कान्तिपुर संवाददाता

काठमाडौँ — कांग्रेस महामन्त्री विश्वप्रकाश शर्माले काठमाडौं महानगरपालिकाको मेयरमा वालेन्द्र साह(बालेन) को विजयले राजनीतिक दलहरूलाई सकारात्मक ढंगले दबाब दिएको बताएका छन् ।

बालेनको जितले बदलिएको समयअनुरुप राजनीतिक दल, नेतृत्व, व्यक्ति, प्रवृत्ति र पद्दति सबैले आफूलाई बदल्नुपर्ने समय आएको उनले बताएका हुन् । शुक्रबार सामाजिक सञ्जालमार्फत बधाई दिँदै उनले लेखेका छन्, 'बालेनलाई दिउँ बधाई ! बदलौं आफूलाई !'

मुख्य दलको शैली र प्रस्तुतिप्रति असन्तुष्ट मतदाताले वैकल्पिक राजनीतिको नारा र दल भने नरोजेको शर्माको भनाई छ । 'अवस्थाप्रति रुष्ट मतदाताले व्यवस्थाकै विकल्प खोज्न चाहनेलाई रोजेनन् । नत्र वैकल्पिक राजनीतिको नारासहितको दल र उम्मेदवारको उपस्थिति मैदानमा थियो अनि व्यवस्थाकै विकल्पको नारासहितको दल र उम्मेदवार पनि मैदानमा थिए ।'

काठमाडौंका मतदाताले दिएको सन्देश गहन रूपले आत्मसात गर्नुपर्ने पनि उनको भनाई छ । 'मतदाताले विजयी बनाइसकेपछि बालेन एक्लै हुन् वा एक्लै छन् नसोचौँ । जनताको काममा जननिर्वाचित मेयरलाई सघाऔं,' शर्माले लेखेका छन् । बालेनको जित आफूहरूको पराजय मात्र नभई उनीप्रति जनताको आशा र विश्वासको जित पनि भएको उनले बताएका छन् ।

प्रकाशित : जेष्ठ १३, २०७९ ११:४६
प्रतिक्रिया
पठाउनुहोस्

मेयर वालेन्द्रलाई शुभकामना दिँदै केशव स्थापितले भने– 'रचनात्मक सहयोग रहने छ' 

कान्तिपुर संवाददाता

काठमाडौँ — काठमाडौं महानगरपालिकामा नेकपा एमालेको तर्फबाट मेयरमा उम्मेदवार केशव स्थापितले नवनिर्वाचित मेयर वालेन्द्र साहलाई शुभकामना दिँदै काठमाडौंको विकास र समृद्धिमा चाल्ने सकारात्मक कदममा सहयोग गर्ने बताएका छन् । 

चुनावीको अन्तिम परिणाम सार्वजनिक भएपछि शुक्रबार विज्ञप्ति प्रकाशित गर्दै साहले विपक्षी मतदाताको मन जित्ने काम गर्ने अपेक्षा लिएको बताएका छन् ।

'पाँच वर्षे कार्यकालमा तपाईँको विपक्षमा मतदान गर्ने मतदाताको पनि मन जित्ने काम गर्नुहुने छ भन्ने अपेक्षा पनि लिएको छु,' स्थापितले भनेका छन्,'काठमाडौंको विकास र समृद्धिसँगै तपाईँले चालेका हरेक सकारात्मक काममा रचनात्मक सहयोग अवश्य रहने छ । यद्यपि, तपाईँले गरेका रहेक कमजोरीमा भने म निरन्तर खबरदारी अवश्य गरिरहने छु ।'

वैशाख ३० गते भएको स्थानीय तह चुनावमा स्वतन्त्र उम्मेदवार साह ६१ हजार ७ सय ६७ मत प्राप्त गरी विजयी भएका थिए । उनको निकटतम प्रतिद्वन्द्वी नेपाली कांग्रेसकी सिर्जना सिंह रहिन् । एमालेका स्थापित तेस्रो रहे ।

'निर्वाचनमा पराजय भोग्दै गर्दा ‘काठमाडौँ महानगरपालिका’ मा मेयर पदमा निर्वाचित बालेन साहलाई म शुभकामना भन्न चाहन्छु । काठमाडौँ महानगरवासीले तपाईँमाथि भरोसा गर्दै मतपेटिकामा खसालेका हरेक मतपत्रको तपाईँले सम्मान गर्नुहुनेछ भन्ने मैले अपेक्षा लिएका छु,' स्थापितले भनेका छन् ।

आफू पटकपटक धुलो टक्टक्याएर उठेको व्यक्ति भएको भन्दै स्थापितले भने, 'म पटक–पटक लडेर पनि फेरि धुलो टक्टक्याएर उठेको व्यक्ति हुँ। त्यसैले मैले यो लोकतान्त्रिक अभ्यासमा हार–जितलाई सामान्य रुपमा लिएको छु । काठमाडौं म र मेरो पुस्तौ–पुस्ता जन्मिएको माटो हो । त्यसैले मलाई यहाँको माटो, यहाँको सम्पदा, यहाँको संस्कृति, यहाँको विकास, यहाँको समृद्धिप्रति अगाध स्नेह छ, अगाध प्रेम छ । '

प्रकाशित : जेष्ठ १३, २०७९ ११:४१
पूरा पढ्नुहोस्
प्रतिक्रिया
पठाउनुहोस्
×