नवराजकी आमा भन्छिन्– अपराधीहरू अलिअलि गरेर छुट्दैछन्, आँसु कसरी रोकुँ ? [भिडियो]- समाचार - कान्तिपुर समाचार
कान्तिपुर वेबसाईट
AdvertisementAdvertisement

नवराजकी आमा भन्छिन्– अपराधीहरू अलिअलि गरेर छुट्दैछन्, आँसु कसरी रोकुँ ? [भिडियो]

प्रकाश धौलाकोटी

काठमाडौँ — शरीरमा यात्राको थकान, मलिन अनुहार, गला बस्न लागेको बोली । छोराका हत्यारालाई कारबाही गर्न माग गर्दै जाजरकोटदेखि काठमाडौं आइपुगेकी ४० वर्षीया उर्मिला विक मंगलबार माइतीघरमा छोरो सम्झिएर भक्कानिइन् । ‘हाम्रो छोरोलाई भीडले मारेर भेरीमा बगाइदिएको दुई वर्ष बित्यो । तर, हामीले न्याय पाएनौँ ।  अपराधी अलिअलि गरेर छुट्दैछन्,’ आँखाभरि आँसु पार्दै उर्मिलाले अघि भनिन्, ‘सबैले नरुनू त भन्छन्, तर हाम्रो छोरो माटोमा मिलाउने दोषी खुलेआम छन्, अनि आँसु कसरी रोकुँ ?’ 

ठीक दुई वर्षअघि, ०७७ को जेठ १० मा रुकुम पश्चिमको चौरजहारी नगरपालिका ८, सोतीमा अन्तरजातीय प्रेम र भागी विवाहलाई लिएर ६ जनाको ज्यान जाने गरी सामूहिक हत्याकाण्ड भयो ।

घटनामा मारिएका नवराज विक उर्मिलाका एक्ला छोरा हुन् । प्रेम नवराजले गरेका थिए । प्रेमिकालाई भगाउने योजना उनको थियो । तर, त्यसबेला नवराजमात्रै मारिएनन्; उनीसँगै सोती पुगेका उनका साथीहरू लोकेन्द्र सुनार, सन्दीप विश्वकर्मा, गणेश बुढा, टीकाराम सुनार र गोविन्द शाही पनि मारिए । तर, घटनाको दुई वर्ष बित्दा पनि मुद्दाको किनारा लागेको छैन ।

पीडित न्याय पाउनेमा शशंकित छन् । मृतकका आमाहरू दुई वर्षसम्म पनि न्याय नपाएको भन्दै काठमाडौं आइपुगेका छन् ।

‘६-६ जनालाई एकै चिहान बनाएर मारे । तर, यतिञ्जेलसम्म मार्नेहरू दोषी करार भएनन् । उनीहरुलाई अझै पनि पुर्पक्षमै राखिएको छ,’ उर्मिला भन्छिन्, ‘हाम्रो छोराहरू मरेर माटो भइसके, तर मार्नेहरू खुलेआम छन् । केटी र केटीकी आमा मुख्य हुन् । तर‚ उनीहरू नै छुटे । अरु ११ जना पनि छुटिसके । भित्र भएकाहरू पनि कुन बेला बाहिर निस्किजान्छन्‚ थाहा छैन ।’

न्याय माग्न नवराजकी आमा उर्मिला, लोकेन्द्रकी आमा लक्ष्मी सुनार, सञ्जुकी आमा सविता विश्वकर्मा, गणेशकी आमा राधिका बुढामगर र टीकारामकी आमा गीता विक जाजरकोटदेखि काठमाडौं आएका छन् ।

उनीहरूको एकै स्वर छ- ‘सबैले हाम्रो छोराहरू मारिएका हुन् भन्नुभयो । तर, दुई वर्षसम्म हामीले न्याय पाएनौँ । मारिएका हुन् भने हामीले किन न्याय पाएनौँ ?’

‘सबैले घरैमा आएर थुम्थुम्याउँदा छोराहरू गुमे पनि न्याय त पाइएला भन्ने थियो तर यतिञ्जेलसम्म केही भएन । हिजो थुम्थुम्याउन आउनेहरू पनि अहिले टाढिन थाल्नुभयो । हामीलाई त अदालतमा के हुँदैछ ? त्यो पनि थाहा हुदैन,’ उर्मिला भन्छिन्, ‘हामीले सधैँ रोएर बस्ने कि न्याय पनि पाउने ?’

लोकेन्द्रकी आमा लक्ष्मी सुनार छोरोसँगै जीवनको आशा भरोसा सबै भेरीमा बगेको बताउँछिन् । ‘कमाउने उमेर भएको छोरो बित्यो । गरिखाने उपाय छैन । काखमा सानी छोरी छे, त्यसैको आशमा बाँचेकी छु,’ उनले भनिन्, ‘घटना हुँदा सबै आउनुभयो । सबैले आश देखाउनुभयो । अब त न न्याय पायौँ, न त आश्वासन दिने मान्छेहरू ।’

छोराका हत्याराहरूलाई आजीवन काराबास नभएसम्म आफूहरूलाई सुकुनको निद्रा नपर्ने उनी बताउँछिन् । ‘आजसम्म न्याय नपाएपछि अब न्याय नै पाइँदैन कि भन्ने लाग्छ । मर्ने त मरिसके, कम्तीमा तिनको हत्या गर्नेहरूलाई जेल सजाय भए मनलाई शान्ति मिल्ने थियो, छोराहरूको आत्माले शान्ति पाउँथ्यो,’ उनले भनिन् ।

प्रकाशित : जेष्ठ १०, २०७९ १८:३९
प्रतिक्रिया
पठाउनुहोस्

यस्तो छ सरकारको नीति तथा कार्यक्रम [पूर्णपाठ]

कान्तिपुर संवाददाता

काठमाडौँ — सरकारले आगामी आर्थिक वर्षका लागि नीति तथा कार्यक्रम सार्वजनिक गरेको छ । राष्ट्रपति विद्यादेवी भण्डारीले मंगलबार संघीय संसद्का दुवै सदनको संयुक्त बैठकमा सरकारको आव २०७९/८० को नीति तथा कार्यक्रम प्रस्तुत गरेकी हुन् । 

सरकारले अर्थतन्त्रमा कोभिड लगायत कारणले नकारात्मक प्रभाव परिरहेका बेला आयात प्रतिस्थापन र निर्यात प्रवर्द्धन गर्ने नीति लिएको जनाएको छ ।

पूर्णपाठ

प्रकाशित : जेष्ठ १०, २०७९ १८:३३
पूरा पढ्नुहोस्
प्रतिक्रिया
पठाउनुहोस्
×