जनतालाई धोका दिन्नँ : नवनिर्वाचित मेयर साम्पाङ- समाचार - कान्तिपुर समाचार
कान्तिपुर वेबसाईट
AdvertisementAdvertisement
अन्तर्वार्ता

जनतालाई धोका दिन्नँ : नवनिर्वाचित मेयर साम्पाङ

प्रदीप मेन्याङ्बो

सुनसरी — धरानमा एक दशकदेखि खानेपानी, सडक, सर्दु–सेउतीको गिटीबालुवा ठेक्का, बीपी कोइराला स्वास्थ्य विज्ञान प्रतिष्ठानको बेथिति जस्ता विभिन्न समस्या देखाउँदै स्थानीय सरकारलाई समाधान गर्न दबाब दिने सामाजिक अभियन्ता हुन् हर्कराज साम्पाङ । विद्रोही स्वभावको छवि बनाएका धरान–१८ बुद्धचोक बस्ने सामाजिक अभियन्ता ३९ वर्षीय साम्पाङ धरान उपमहानगरपालिकाको प्रमुख बन्न सफल भएका छन् । साम्पाङ मेयरमा निर्वाचित भएपछि कान्तिपुरकर्मी प्रदीप मेन्याङ्बोले उनीसँग लिएको अन्तर्वार्ता :

गठबन्धन दल नेपाली कांग्रेसका उम्मेदवार र एमालेका उम्मेदवारलाई हराएर धरान उपमहानगरपालिकाको मेयर पद जित्न सफल भएकोमा कस्तो महसुस गरिरहनु भएको छ ?

उहाँहरु हार्नु भएको छैन । उहाँहरु (एमाले र कांग्रेस) कै भोटर्सले मलाई भोट दिएकाले मैले जितेको हो । त्यसैले उहाँहरुसँगसँगै यो चनुाव जित्या छौं । यो स्वतन्त्रको जित हो । सबै पार्टीको जित हो । स्वतन्त्र र साझा उम्मेदवारको जित भएको महसुस गरिरहेको छु ।

स्वतन्त्र उम्मेदवार मेयर हुनु भएको छ । अन्य जनप्रतिनिधि त कांग्रेस र एमालेका बहुमत छन् नि ? काम गर्न देलान् ?

कसरी काम गर्न दिँदैनन् ? कसले दिँदैन ? एउटा परिवार चलाउन पनि अर्काको छोरी ल्याउनु पर्छ । एक्लै त चल्दैन नि । म पनि उहाँहरु सबैसँग सहकार्य समन्वय गरेर नगरपालिकाको काम गर्छु । यत्रो उपमहानगरपालिका म आफैं चलाउँछु त ? एक्लै चलाउन सक्छु त ? सक्दिनँ । म एक्लैले खुशी गरेर हुँदैन पनि । त्यसो भएको कारणले हामी सबै सहकार्य गरेर अगाडि बढ्ने छौं । सबै राजनीतिक दललाई ससम्मान सहभागी गराउँछु ।

हिजोको दिनमा चुनावको बेला केके भनियो होला, उहाँहरुले पनि भने होलान्, त्यो त आफ्नो मेलो गरेको हो । तर भोलिको दिनमा त मलाई पनि उहाँहरुकै साथ सहयोग चाहिन्छ । राजनीतिक दल, संघसंस्था, नागरिक समाज सबै मिलेर के गर्दा बेस्ट हुन्छ । धरान बनाउने हो । उहाँहरुले यो स्वतन्त्रबाट आएको मेयर हो, यसको प्रस्ताव सबै बल्झाउनु पर्छ भन्ने कुरा उहाँहरुले गर्नु हुन्न । उहाँहरुलाई सुशासन र विकासको मुलधारमा जोडेर लाने हो । म लान सक्छु त्यही क्षमता भएको मान्छे हो म । धरानको समग्र विकासका लागि म सबैलाई आह्वान गर्छु । मेरो क्षमतै नभएको भए मलाई जनताले जिताउने थिए त ? बजेटको कुरा गर्छन् । बजेट भनेको पाटीको नेताको गोजीबाट आउने पैसा होइन । जनताबाट संकलित कर हो । मैले जित्ने बित्तिकै नेपाल भन्दा बाहिर गइहाल्यो त धरान ? यसर्थ, मेरो समन्वयकारी भूमिका अझै दरिलो बनाउँछु ।

मेयरको रुपमा तपाईँ धरान उपमहानगरको कुर्सीमा पुगेकाले तपाईंको पहिलो प्राथमिकता के हो ?

खानेपानी । खानेपानीमा एक प्रकारको चुहावट छ, मर्मतसम्भारको लापरबाही छ । खानेपानीमा प्राकृतिक र कृत्रिम समस्या छ । खानेपानीको समाधान नभएसम्म म प्राय प्राय फिल्डमा हुनेछु । मैले गर्ने काम नै त्यही हो । त्यसपछि स्वास्थ्यको कुरा छ । बीपी कोइराला स्वास्थ्य विज्ञान प्रतिष्ठानलाई सुधार्ने कुरा छ । शिक्षाका कुराहरु छन् । सबै कुरा यहा भनेर साध्ये नहोला यहाँ ।

तपाईं पहिल्यैदेखि विद्रोही स्वभावको । धरानका समस्या उठाउँदा धेरै विद्रोही भाषा पनि प्रयोग गर्नु भयो । अब मेयरको कुर्सीमा बसेपछि पनि विद्रोह नै गर्नुहुन्छ ?

अब मेरो भूमिका चेन्ज भयो नि । त्यहाँ पुगे पछि त म अब हाँसी मात्र रहनेछु । सधैंभरि कराइमात्र रहने ? अहिले तपाईंहरुले मलाई जति गालि गर्नुस म हाँसी मात्र रहन्छु । बरु तपाईंहरुले पनि धरान बनाउन सल्लाह सुझाव दिनुस् ।

प्राय मान्छे (नेता)हरु सत्तामा पुगेपछि बिग्रने गरेका छन् नि ?

म बिग्रन्नँ । यत्रो जनताले मलाई एउटा व्यक्तिलाई जिताइदिनु भएको छ । उहाँहरुको विश्वासमा घात गरेँ भने मलाई पाप लाग्दैन ? बिना पार्टीको एक्लै कुदेर संघर्ष गरेँ । लामो समयसम्म निरन्तर संघर्ष गरेकाले आज मलाई धराने जनताले मूल्यांकन गरेर यो माया (मेयर पद) दिनु भा छ । यत्रो माया दिने जनतालाई मैले धोका दिन मिल्छ ?

नगरपालिका र बीपी प्रतिष्ठानमा भएका बेथितिविरुद्ध संघर्ष गर्नु भयो । अब कसरी ती बेथिति सफा गर्नुहुन्छ ?

नगरपालिका र बीपीमा केके बेथिति छ भन्ने त मलाई पनि थाहा छ । अब पहिला म एउटा अभियन्ताको रुपमा कराउँथेँ । त्यहाँ गइसकेपछि नारा जुलुस गर्छु भन्या होइन । त्यो त पहिलाकै शैली भइहाल्यो । त्यसैले अब मेरो भूमिका र शैली परिवर्तन हुन्छ । तर बेथिति सफा गर्नका लागि एक खालको पहल र दबाब भने रहन्छ ।

स्वतन्त्र मेयर स्थानीय सरकार प्रमुख भएको बेला संघ र प्रदेशले बजेट दिएन भने के गर्नुहुन्छ ?

मलाई नपत्याउने बित्तिकै सरकारको औचित्य नै सकियो नि त । म एक भोट ल्याएर जितेको होइन । मैले सारा धराने जनताको प्रतिस्पर्धीमध्ये पहिलो मत लिएर जितेको मान्छे । म स्थानीय सरकार प्रमुख हुँदा प्रदेश र संघीय सरकारबीच समन्वय भएन भने सरकार कहाँ रह्यो र ? यो पुरानो खालको बुझाइबाट हामी मुक्त हुनुपर्छ । हामी विभिन्न परिवारका छौं । परिवार मिलेर एउटा समाज बनेको छ । त्यसरी नै विभिन्न पार्टीबाट हामी कार्यपालिकामा गएता पनि मिलेर नै काम गर्ने छौं । त्यहाँ कुस्ती हुँदैन । म उहाँहरुलाई हाँसीहाँसी मिलाउँछु । मिलाउन सक्ने क्षमता मसँग छ ।

तपाईसँग जनताले के आशा राखेका होलान् ?

धेरै आशा पनि राखेका छैनन् धराने जनताले । सामान्य आशा राखेका छन् । नगरबासीले पाउने सेवासुविधालाई चुस्तदुरुस्त गर्ने । त्यो म गर्छु ।

दलका उम्मेदवारले जितेर गएपछि नगरपालिकामा आफ्ना कार्यकर्ता र आफन्तलाई भर्ती गर्ने गरेका थिए । तपाईंले चाहिँ के गर्नुहुन्छ ?

मेरो कार्यकर्ता नै छैन । म सबैभन्दा पहिला वर्कलोड हेर्छु , त्यसपछि म वर्कफोर्स हेर्छु । आफैं म धेरै स्टडी गर्छु । वर्कलोडचैँ छैन वकफोर्स धेरै राखेर त भएन । म्यानेजमेन्ट टिममा एउटा काम गर्ने मान्छे छ, चार जना सुपरभाइजर राखेर त काम हुँदैन । वर्कफोर्स बढाउनु पर्छ वकलोड अनुसार । मेरो कार्यकर्ता हो भनेर ए मलाई भोट दिएको सहयोग गरेको भनेर हामीले भर्ती गरेर काम छैन । हाम्रो इन्कम कति हो एक्सपेन्सेज कति हो ? यी सम्पूर्ण कुरालाई हेरेर सोहीअनुसार काम हुन्छ । मसँग आएका सबै स्वफूर्त स्वयंसेवक भएर आएका मात्र छन् । कार्यकर्ता छैन । वकफोर्स र वकलोडकालागि फ्री कम्पीटिसशन हुन्छ । योग्यता र क्षमताका आधारमा मान्छेले जब पाउँछन् । अयोग्य मान्छेहरुलाई पार्टीले गरेर जस्तो हुँदैन ।

सर्दुको घटना (खोलाको गिटी बालुवा बिक्री) अब के गर्नु हुन्छ ?

म रोक्छु । तर ठेक्का लगाएर बेचिसकेको छ भन्ने सुन्या छु ।

उपमहानगरपालिकालाई राजस्व त चाहिन्छ नि ?

म त्यसको अन्तरवस्तु बुझ्छु । तर राजस्व बढाउनका लागि देश बेच्नु पर्छ भन्ने मलाई लाग्दैन । अब भात खानका लागि किड्नी वेच्छ नि मान्छेहरुले त्यही खालका कुरा हो यो पनि । धरान नगरपालिकाको राजस्व बढाउनका लागि सर्दु र सेउती बेच्नु पर्दैन । किन भने जब खोला बाटा ढुंगा उठाइन्छ त पानी दबिन्छ । धरानको प्राकृतिक कुरालाई बिगार्ने काम हामीबाट हुँदैन बरु अरु श्रोत खोजेर हामीले राजस्व बढाउनेतिर लाग्ने छौं । अघि भनेनी जिउ पाल्न लाई किड्नी बेचे जस्तो काम हामीबाट हुँदैन ।

तपाईं अभियन्ताबाट मेयर बन्नु भयो । अब सेवा सुविधा लिनु हुन्छ कि हुन्न ?

धरानभित्र हिँड्दा म मेरै मोटरसाइकल प्रयोग गर्छु । तर धरान बाहिर जाँदा मेयर जस्तो मान्छे मोटरसाइकलमा जाँदा धरानको बेइज्जत हुने भएकाले गाडी प्रयोग गर्छु । अरु त्यो केके तलब भत्ता सुविधा भन्छ नि त्यो पहिला बुझ्छु । अहिले नै लिन्न भनिहाल्दिनँ ।

प्रकाशित : जेष्ठ ९, २०७९ १३:४१
प्रतिक्रिया
पठाउनुहोस्

धरानका नवनिर्वाचित मेयर साम्पाङले लिए शपथ

प्रदीप मेन्याङ्बो

सुनसरी — सुनसरीको धरान उपमहानगरपालिकाका नवनिर्वाचित प्रमुख हर्कराज साम्पाङ राईले सोमबार शपथ ग्रहण गरेका छन् ।

सामाजिक क्षेत्रमा बढ्दो बेथितिविरुद्ध सडकमा एक्लै संघर्ष र आन्दोलन गरेर सरोकारवालालाई प्रश्न गर्दै सुशासन र पारदर्शिता देखाउन दबाब दिँदै आएका साम्पाङको नगरपिता बन्ने सम्मको यात्रालाई धरानले पहिल्यैदेखि देखाउँदै आएको केन्द्रीय सत्ताविरुद्धको असन्तुष्टिको नतिजा भएको बताउन थालिएको छ ।

स्थानीय तहको निर्वाचनमा दलीय उम्मेदवारहरुलाई पराजित गर्दै विद्रोही स्वभावको पहिचान बनाएका साम्पाङ स्वतन्त्रबाट विजयी भएका हुन् । धरानको चुनावी राजनीतिक इतिहासमा एमाले र कांग्रेस र माओवादी केन्द्रसहितको गठबन्धन दलका उम्मेदवारलाई पराजित गर्दै पहिलो पटक साम्पाङले स्वतन्त्र उम्मेदवारीमार्फत प्रमुख पदमा विजयी भएका हुन् ।

शपथ लिनका लागि इनरुवा पुगेका नवनिवार्चित प्रमुख साम्पाङलाई जिल्ला निर्वाचन प्रमुख अधिकृतसमेत रहेका सुनसरी जिल्ला अदालतका १ नम्बर न्यायाधीश कैलाश सुवेदीले शपथ ग्रहण गराएका थिए । अब धरान प्रमुख साम्पाङले उपप्रमुखसहित वडाबाट निवार्चित जनप्रतिनिधिहरुलाई शपथ ग्रहण गराउने कार्यक्रम रहेको छ । धरानमा मेयर, उपमेयरसहित १०२ जना जनप्रतिनिधि निवार्चित भएका छन् ।

निर्वाचित वडाध्यक्षहरुमा एमालेबाट वडा २ का रमेश राई, वडा ४ का धनबहादुर राई, वडा ५ का मनप्रसाद लिम्बू, वडा ७ का जीवन सुवेदी, वडा ८ का धनबहादुर राई, वडा १० का विवेक राई, वडा १२ का टंक राई, वडा १३ का नेत्र काफ्ले, वडा १५ का नरेश इङ्वारम, वडा १९ का पूर्ण लिम्बू गरी १० जना रहेका छन् ।

नेपाली कांग्रसबाट वडा १ का यज्ञमणि आचार्य, वडा ३ का विद्या शाक्य, वडा ९ का रुपेश आचार्य, वडा ११ का लोकेन्द्र फागो, वडा १६ का मुरारी भट्टराई, वडा १८ का प्रविण राई, वडा २० का पदम लिम्बू गरी ७ जना रहेका छन् भने नेकपा माओवादी केन्द्रबाट वडा १७ का मनोज भट्टराई, राप्रपा हलोबाट वडा १४ का कृष्ण भट्टराई, स्तवतन्त्रबाट वडा ६ का भूपेन्द्र भट्टराई रहेका छन् ।

प्रकाशित : जेष्ठ ९, २०७९ १२:३१
पूरा पढ्नुहोस्
प्रतिक्रिया
पठाउनुहोस्
×