दुई दिने बिदाले सेवाग्राहीलाई मर्का- समाचार - कान्तिपुर समाचार
कान्तिपुर वेबसाईट
AdvertisementAdvertisement

दुई दिने बिदाले सेवाग्राहीलाई मर्का

शनिबार र आइतबार दुई दिन सार्वजानिक बिदा दिने संघीय सरकारको निर्णयले सेवाग्राहीलाई सरकारी कामकाजका लागि खर्च बढाउनुको साथै समयसमेत बढाएको छ । 
प्रतीक्षा काफ्ले

कास्की — गोरखाको चुमनुव्रीवासीलाई सरकारी कामकाजका लागि जिल्ला सदरमुकाम गोरखा बजार आइपुग्न पाँच दिन लाग्छ । हालसम्म मोटरबाटोको सुविधा नपुगेको चुमनुव्रीबाट सदरमुकाम आएर सरकारी काम लिएर फर्किदा अर्को पाँच दिन लाग्छ । सरकारी काम लिन १० दिन हिँड्नुपर्ने त छँदै छ अझ थपिएको सरकारी बिदाले चुमनुव्रीवासीलाई सरकारी कामकाज लिन थप दुई दिन कुर्नुपर्ने बाध्यता बनाएको छ । 

सामागाउँका पासाङ शेर्पा भन्छन्, ‘सदरमुकाम गएर एक दिनको सरकारी काम गर्न हामीलाई ११ दिन लाग्छ । अहिले सरकारले दिएको सार्वजानिक बिदाले गर्दा दुई दिन थपिएको छ । सरकारी बिदाका कारण हाम्रो खर्च पनि बढेको छ ।’ उनले सार्वजानिक बिदाले आफूहरू मारमा परेको बताए । यस्तै, गण्डकीमा मोटरबाटोले नछोएको मनाङको नार्पाभूमि गाउँपालिकाका बासिन्दालाई पनि जिल्ला सदरमुकाम चामे आएर सरकारी सेवा लिन उस्तै सास्ती छ । सदरमुकाम पुगेर फर्किन यहाँका बासिन्दालाई ४ दिन लाग्छ भने सरकारी कामका लागि छुट्टै एक दिन लाग्छ ।

चुमनुव्री र नार्पाभूमिका स्थानीयलाई मात्र होइन, थप भएको सार्वजानिक बिदाले आम सर्वसाधारणलाई समेत असर पारेको छ । गोरखाका सहायक प्रमुख जिल्ला अधिकारी कमलराज भण्डारीले सरकारी सेवा लिन जनता दुर्गम क्षेत्रबाट मात्र होइन, अमेरिकाबाट पनि आउने भएकाले यसमा बढाइचढाइ गर्न आवश्यक नरहेको बताए । ‘नेपालमा शनिबार मात्रै बिदा दिने भएकाले यो नौलो लागेको हो,’ उनले भने, ‘यसभन्दा पनि पहिले साताको दुई दिन बिदा दिने निर्णय भएको नै थियो ।’

उनले सरकारले दिएको बिदामा जतिसुकै टाढाबाट सेवाग्राही आए पनि सरकारी अड्डा बन्दै हुने बताए । काठमाडौंको एक कम्पनीमा कार्यरत स्याङ्जाको पुतलीबजार नगरपालिका–८ कोल्माका थमबहादुर गुरुङ आफ्नो जग्गाको कामले पोखरा आए । बिहीबार साँझ पोखरा आएका उनी शुक्रबार काम सकेर रात्रप बस अर्थात शनिबार बिहान काठमाडौं जाने तयारीमा थिए । जग्गाको झन्झटिलो काम । उनले योजना बनाएअनुसार शुक्रबार आफ्नो काम सकाएनन् ।

शनिबार मात्र नभई आइतबार पनि पोखरा नै बस्नुपर्ने गुनासो उनको छ । ‘यो कस्तो बाध्यता ?,’ आक्रोश पोख्दै उनले भने, ‘एक दिनको बिदा लिएर आएको थिए चार दिन यही भुल्नुपर्ने भयो ।’ यदि आइतबार सार्वजानिक बिदा नभएको भए उनी आइतबारै काम सकेर काठमाडौं फर्किन्थे । ‘पोखराको महँगी, होटलमा बस्नुपर्‍यो, खानै पर्‍यो,’ उनले थपे, ‘न काम हुन्छ भन्ने ढुक्क छ । खाली खर्च मात्रै बढ्यो ।’

शुक्रबार बिहान सुनसान कास्की मालपोत कार्यालय । तस्बिर : प्रतीक्षा काफ्ले/कान्तिपुर

सार्वजानिक बिदा कर्मचारीको लागि फाइदा भए पनि आफू जस्ता सेवाग्राहीका लागि समयको बर्बादी र खर्च बढाउनेबाहेक अरु केही नरहेको उनले आक्रोश पोखे ।सेवाग्राहीको बढी भीड हुने मालपोत, नापीलगायतका कार्यालयमा बिहान साढे नौ बजे र बेलुका ५ बजेपछि स्थलगत रिर्पोटिङको लागि कान्तिपुरकर्मी पुगेका थिए । मालपोत र नापी कार्यालय खुलेका भए पनि सेवाग्राही थिएनन् ।

१० बजेअघि नै उपस्थित भए पनि ठीक साढे नौ बजे कुनै कर्मचारी उपस्थित थिएनन् । नापी कार्यालयमा पनि शुक्रबार बिहान कार्यालयका सवै कोठा खोलिएका थिए । फाटफुट कर्मचारी, कार्यालय सहयोगी भए पनि सवै कर्मचारी उपस्थित भएनन् । नापी कार्यालयका एक कर्मचारी भन्छन्, ‘सरहरु फिल्ड जानुभयो होला आउन समय लाग्छ ।’

मालपोत कार्यालयका प्रमुख राजेन्द्र पौडेलले निर्वाचनको समय भएकाले सेवाग्राही बिहानै कार्यालय नआएको बताए । ‘सरकारले बनाएको नियमअनुसार हामी बिहान साढे नौ बजे नै कार्यालय आएका छौँ,’ उनले भने, ‘शुक्रबार पनि बेलुका साढे ५ बजेसम्म बस्छौँ ।’ सेवाग्राहीमा अझै पनि बिहान १० बजे सरकारी कार्यालय खुल्छन् भन्ने मानसिकता छ । बेलुकाको समयमा भीडभाड भए पनि बिहानपख कार्यालय सुनसान हुने पौडेलले बताए ।

वैशाख १४ मा बसेको संघीय मन्त्रिपरिषद्को बैठकले आइतबार पनि सार्वजानिक बिदा दिने निर्णय गरेको थियो । मूलुकमा आर्थिक संकट परेको र इन्धन खपत कम गर्न भन्दै जेठ १ देखि लागू हुने गरी हप्तामा एक दिन सार्वजानिक बिदा थप गरेको थियो । काठमाडौं उपत्यकामा शनिबार र आइतबार सार्वजानिक बिदा दिने चलन भने विगतमा कार्यान्वयनमा आएको थियो । तर, सार्वजानिक सेवा सञ्चालनमा कर्मचारीले ध्यान नदिएपछि त्यो निर्णय कार्यान्वयन भएन । व्यवसायी सन्देश घिमिरेले बिदा दिएर मात्र आर्थिक संकट व्यवस्थापन नहुने बताए ।

‘हाम्रो जस्तो मुलुकमा दिनरात गरेर चौबीसै घण्टा काम गर्नुपर्ने हो । तर, त्यसविपरीत कर्मचारीको दबाब र प्रभावमा सार्वजानिक बिदा थप्ने काम भएको छ’ घिमिरेले भने, ‘यो प्रत्युत्पादक हो ।’ विकसित देशमा सातामा दुई दिन सार्वजानिक बिदा दिने चलन छ । तर, दक्षिण एसियाली देशमा भने सातामा एक दिन मात्र सार्वजानिक बिदा दिने चलन रहेको घिमिरे बताउँछन् ।

प्रकाशित : जेष्ठ ६, २०७९ १६:३२
प्रतिक्रिया
पठाउनुहोस्

स्याङ्जा: नगरमा कांग्रेस, गाउँमा एमाले 

एक नगरसहित ५ गाउँपालिकामा एमाले र चार नगरसहित एउटा गाउँपालिकामा कांग्रेस विजयी भएको छ । वालिङ नगरपालिका बाहेक सबै पालिकामा एउटै दलका प्रमुख र उपप्रमुख विजेता भएका छन् ।
प्रतीक्षा काफ्ले

स्याङ्जा — स्थानीय तहको निर्वाचनमा स्याङ्जामा प्रमुख प्रतिस्पर्धी पार्टी कांग्रेस र एमाले मात्र रहे । नगरपालिकामा कांग्रेसको वर्चश्व देखिएको छ भने गाउँपालिकामा एमालेकाे । मतगणनाको अन्तिम परिणम अनुसार स्याङ्जाका एघार पालिकामध्ये १० वटामा प्रमुख र उपप्रमुखमा एउटै पार्टीबाट निर्वाचित भएका छन् भने वालिङ नगरपालिकामा एमाले र कांग्रेस निर्वाचित भए ।  

वालिङमा नगरप्रमुख कृष्ण खाँण विजयी भएका छन् । उनी एमालेको तर्फबाट उम्मेदवार बनेका थिए । पूर्व मेयरसमेत रहेका दिलिपप्रताप खाँणलाई २ हजार १ सय ८३ मतले हराउँदै उनले विजय हासिल गरे । यस्तै, उपप्रमुखमा कांग्रेसकी कविता तिवारी विजयी भएकी छन् । एमालेकी खगिसरा थापालाई ४ सय ८२ मतले उछिन्दै उनी उपमेयरकी विजेता बनिन् । खगिसरा यसभन्दा अघि पनि उपमेयरको उम्मेदवार बनेकी थिइन् । कांग्रेसकी कल्पना तिवारीसँग पराजय भोगेकी खगिसराले यसपटक पनि सफलता हात पार्न सकिनन् । २०७४ को स्थानीय निर्वाचनमा वालिङ नगर प्रमुख र उपप्रमुख का‌ंग्रेसबाटै विजयी भएका थिए ।

कांग्रेसको गढ मानिने वालिङले पहिलोपटक आफ्नो साख गुमाएको छ । यस्तै चापाकोट नगरपालिकामा कांग्रेसबाटै मेयर र उपमेयर विजयी भए । एमालेका प्रतिस्पर्धी राजु कोइरालालाई ९ सय ३५ मतले पछाडि पार्दै कांग्रेसका देवबहादुर खाँण विजयी भएका छन् । उपमेयरमा एमालेका सृष्टि मल्ललाई १ हजार १३ मतले पछाडि पार्दै इशा राना विजयी भइन् ।

यसभन्दा अघिल्लो स्थानीय तहको निर्वाचनमा चापाकोटमा प्रमुख र उपप्रमुख कांग्रेसबाटै प्रतिनिधित्व थियो । अघिल्लो निर्वाचनमा मेयर र उपमेयर एमालेले जितेको पुतलीबजारमा भने यसपटक दुवै पद कांग्रेसले हात पारेको छ । मेयरमा प्रमुख प्रतिस्पर्धी एमालेकी सीमा क्षेत्रीलाई २ हजार ४ सय ४ मतान्तरले हराउँदै तुलसीराम रेग्मी विजयी भए । अघिल्लो निर्वाचनमा तुलसीरामलाई हराउँदै सीमा मेयरमा निर्वाचित भएकी थिइन् । यस्तै, उपमेयरमा ९ सय ४७ मतले एमालेका महेश पुरीलाई पछाडि पार्दै देवी अर्याल विजयी भइन् । पुरी निवर्तमान उपमेयर हुन् । एमालेको लाल किल्ला रहेको पुतलीबजारमा कांग्रेसले पहिलोपटक सफलता हात पारेको कांग्रेस स्याङ्जाका प्रवक्ता भरत लम्सालले बताए । एउटा वडा आफूले लिनेगरी पुतलीबजारमा कांग्रेसलाई माओवादी केन्द्रले सहयोग गरेको थियो ।

गल्याङ नगरपालिकामा २०७४ मा प्रमुख र उपप्रमुख दुवै पदमा एमालेको प्रतिनिधित्व थियो । अहिलेको निर्वाचनमा कांग्रेसका उम्मेदवार मेयर र उपमेयरमा विजेता भए । जिल्ला अध्यक्ष समेत रहेका एमालेका सूर्यप्रसाद गैह्रेलाई ६ सय ९९ मतले हराउँदै गुरुप्रसाद भट्टराई विजयी भएका हुन् । भट्टराई कांग्रेस पार्टीका जिल्ला सचिव हुन् । निवर्तमान उपमेयर एमालेकी देवीसरा थापालाई ६३ मतले पछि पार्दै उपमेयरमा हेमा न्यौपाने विजयी भइन् । गल्याङ पनि एमालेको आधार क्षेत्र मानिन्छ ।

अघिल्लो निर्वाचनमा मेयर र उपमेयरमा विजयी भएको कांग्रेसले यसपटक पनि भीरकोटमा आफ्नो विरासत कायम राख्यो । मेयरमा एमालेका विश्वनाथ अर्याललाई ८ सय ३५ मतले पछाडि पार्दै गोविन्दकुमार कर्माचार्य विजयी भए । एमालेकी सरस्वती अधिकारीलाई २ हजार २ सय ६९ मतले पछाडि पार्दै भगवती रेग्मी अर्याल विजयी भइन् ।

अघिल्लो निर्वाचनमा अर्जुनचौपारी गाउँपालिका उपप्रमुख गुमाएको कांग्रेसले यसपल्ट कायम गर्यो । अध्यक्ष र उपाध्यक्ष दुवै पदमा कांग्रेसका उम्मेदवार विजयी भए । निवर्तमान उपाध्यक्ष समेत रहेकी एमालेकी उम्मेदवार चिनमाया गुरुङलाई १ हजार ९ सय ४४ मतान्तरले पछाडि पार्दै अध्यक्षमा प्रकाश तिवारी विजयी भएका छन् भने एमालेका टंकप्रसाद खनाललाई १ हजार ६० मतले पछाडि पार्दै सपना गुरुङ उपाध्यक्षमा विजयी भइन् । अघिल्लो पटक अध्यक्ष पनि कांग्रेसबाटै निर्वाचित भएका थिए ।

विरुवामा २०७४ को निर्वाचनमा अध्यक्ष/उपाध्यक्ष जितेको एमालेले यसपल्ट पनि आफ्नो वर्चस्व कायम राखेको छ । विरुवा गाउँपालिकाका कांग्रेस सभापति समेत रहेका डोलराज पोखरेल कांग्रेसबाट अध्यक्षको उम्मेदवार बनेका थिए । १ सय २६ मतले पोखरेल पराजित भए । एमालेका सूर्य कुँवर अध्यक्षमा विजयी भए । माओवादीका थमबहादुर गुरुङलाई १ हजार २ सय ६१ मतले पछाडि पार्दै उपाध्यक्षमा एमालेकै भगवती शर्मा विजयी बनिन् । यहाँ कांग्रेस र माओवादीको गठबन्धन थियो । एमालेको पकड क्षेत्र मानिने विरुवामा यसभन्दा अघिल्लो निर्वाचनमा पनि कांग्रेस र माओवादीको गठबन्धनलाई तोड्दै एमाले विजयी बनेको थियो ।

आँधीखोला गाउँपालिकाले यसपटक पनि एमालेकै नेतृत्व पाएको छ । अघिल्लो निर्वाचनमा पनि अध्यक्ष र उपाध्यक्ष पदमा एमालेकै उम्मेदवार विजयी भएका थिए । यसपटक एमालेका विश्व पौडेलले काँग्रेसका प्रेमराज पौडेललाई ८ सय २६ मतले पराजित गरे । उपाध्यक्षमा एकीकृत समाजवादीका रामचन्द्रप्रसाद पौडेललाई १ हजार ४ सय ५६ मतले एमालेकी सीता थापाले पराजित गरिन् । यहाँ समाजवादी र कांग्रेसको गठबन्धन थियो ।

यस्तै कांग्रेस र माओवादीको गठबन्धन तोड्दै फेदीखोला गाउँपालिका अध्यक्ष र उपाध्यक्षमा एमालेका उम्मेदवार विजयी बनेका छन् । कांग्रेसका लक्ष्मीप्रसाद बराललाई १ सय ३२ मतले पछाडि पार्दै अध्यक्षमा एमालेका घनश्याम सुवेदी चुनिए । उपाध्यक्षमा माओवादीका शिवप्रसाद पराजुलीलाई १ हजार ५ सय ९९ मतले पछाडि पार्दै एमालेकी देउकुमारी गुरुङ निर्वाचित भइन् । अघिल्लो निर्वाचनमा पनि फेदीखोलामा एमालेकै उम्मेदवार निर्वाचित थिए । सुवेदी अघिल्लो निर्वाचन पनि अध्यक्ष निर्वाचित भएका थिए भने गुरुङ ५ नम्बरकी वडाध्यक्ष थिइन् ।

त्यस्तै कालीगण्डकी गाउँपालिका अध्यक्ष र उपाध्यक्षमा एमालेका उम्मेदवार विजयी भएका छन् । अघिल्लो निर्वाचनमा पनि एमालेकै प्रतिनिधित्व थियो । पूर्व अध्यक्षसमेत रहेका खिमबहादुर थापा पुन: अध्यक्षमा विजयी भएका हुन् । कांग्रेसकी माया रानालाई १ हजार ६ सय ४५ मतले पछि पार्दै खिमबहादुर विजयी घोषित भए । यस्तै, उपप्रमुखमा पनि पुन: सावित्रा कोइराला नै विजयी भइन् । राष्ट्रिय जनमुक्ति पार्टीका बमबहादुर लामिछानेलाई १ हजार ३ सय ९३ मतले पराजित गर्दै उनी विजयी भएकी हुन् ।

कांग्रेस र माओवादीको गठबन्धनलाई तोड्दै हरिनासमा पुन: खिमनारायण मानन्धर अध्यक्षमा विजयी भएका छन् । एमालेबाट उम्मेदवार बनेका उनले कांग्रेसका टोपबहादुर भुजेललाई ३७ मतले हराए । अघिल्लो निर्वाचनमा पनि गठबन्धनलाई हराउँदै मानन्धर विजेता बनेका थिए । यसैगरी उपाध्यक्षमा माओवादीकी मिठु लम्साललाई २४ मतले हराउँदै एमालेकी इन्द्रकुमारी थापा विजयी बनेकी छन् । अघिल्लो निर्वाचनमा पनि हरिनासमा अध्यक्ष र उपाध्यक्ष एमालेकै पोल्टामा थियो ।हरिनासमा दुईवटै निर्वाचनमा माओवादी र कांग्रेसले सफलता हात पार्न सकेनन् ।

प्रकाशित : जेष्ठ ५, २०७९ १३:४०
पूरा पढ्नुहोस्
प्रतिक्रिया
पठाउनुहोस्
×