उदयपुरमा कार दुर्घटना हुँदा एकको मृत्यु, ४ जना घाइते- समाचार - कान्तिपुर समाचार

उदयपुरमा कार दुर्घटना हुँदा एकको मृत्यु, ४ जना घाइते

डिल्लीराम खतिवडा

उदयपुर — उदयपुरमा कार दुर्घटना हुँदा एक युवकको मृत्यु भएको छ भने ४ जना घाइते भएका छन् ।

मदन भण्डारी राजमार्गको उदयपुरगढी गाउँपालिका– ६ नेपालटार दनुवारबेसीको वैद्यनाथ खोला पुलमा वीरगंञ्जबाट विराटनगर जाँदै गरेको बा २५ च ७८१९ नम्बरको कार अनियन्त्रित भएर दुर्घटना हुँदा कारमा सवार ५ जना घाइते भएको जिल्ला प्रहरी कार्यालय उदयपुरका सूचना अधिकारी प्रहरी नायब उपरीक्षक सन्तोष आचार्यले बताए ।

मंगलबार राति ९ बजे भएको दुर्घटनामा घाइते भएकामध्ये मोरङको विराटनगर महानगरपालिका– ५ चाँदनी चोकका ३४ वर्षीय देवेन्द्र चापागाईंको जिल्ला अस्पताल गाईघाटमा उपचारका क्रममा मंगलबार राति ११ बजे मृत्यु भएको जिल्ला प्रहरी कार्यालय उदयपुरले जनाएका छन् । राति कार अनियन्त्रित भई सडकबाट १५ मिटर तल खसेको थियो । दुर्घटनामा घाइते भएकाहरुलाई जिल्ला अस्पताल गाईघाटमा प्राथमिक उपचारपछि थप उपचारका लागि विराटनगरस्थित न्युरो हस्पिटल रिफर गरिएको छ ।

घाइतेहरुमा कार चालक मोरङ विराटनगर महानगरपालिका– ५ चाँदनी चोकका ३१ वर्षीय विशाल राय, २३ वर्षीय सुजन खतिवडा, २७ वर्षीय सागर घिमिरे र ३५ वर्षीय सुरज पौडेल रहेको जिल्ला प्रहरी कार्यालय उदयपुरका सूचना अधिकृत प्रहरी नायब उपरीक्षक सन्तोष आचार्यले बताए । प्रहरी चौकी नेपालटार र स्थानीयबासीको सहयोगमा घाइतेहरुको उद्धार गरी अस्पताल पठाउने काम भएको स्थानीयबासीले बताए । मृतक चापागाईंको शव जिल्ला अस्पताल गाईघाटको शव गृहमा राखिएको छ ।

प्रकाशित : जेष्ठ ४, २०७९ ००:२७
प्रतिक्रिया
पठाउनुहोस्

उदयपुरको रौतामाईमा गठबन्धन विजयी

डिल्लीराम खतिवडा

उदययपुर — रौतामाई गाउँपालिकामा सत्ता गठबन्धनबाट माओवादी केन्द्रका अध्यक्षका उम्मेदावर वीरेन्द्रकुमार मगर र उपाध्यक्षमा कांग्रेसका भूपेन्द्रबहादुर थापा निर्वाचित भएका छन् ।

मतगणनाको अन्तिम परिणाम अनुसार माओवादी केन्द्रका मगरले ४ हजार ३ सय ५ मत ल्याई रहँदा नेकपा(एमाले)का भरतबहादुर थापाले ३ हजार ३ सय ४६ मत ल्याएका छन् । उनीहरुबीच ९ सय ५९ को मतान्तर रहेको रौतामाई निर्वाचन अधिकृतको कार्यालयले जनाएको छ ।

त्यसैगरी उपप्रमुखमा सत्ता गठबन्धन दलका तर्फबाट कांग्रेसका भूपेन्द्र थापाले एमालेकी कुमारी ज्यु ठकुरीलाई ६ सय ६ मतको फराकिलो अन्तरले उछिनेका छन् । कांग्रेसका थापाले ३ हजार ६ सय ९९ मत ल्याउँदा एमालेकी ज्यु ठकुरीले ३ हजार ९३ मत मात्रै प्राप्त गरेकी हुन् । अहिले उपाध्यक्षमा पराजित ठकुरी ०७४ सालको स्थानीय तह निर्वाचनमा एमालेबाटै उम्मेदवार भएर निर्वाचित भएकी थिइन् । यता अहिले उपाध्यक्षमा निर्वाचित थापा २०७४ सालको निर्वाचनमा कांग्रेसको तर्फबाट अध्यक्षको उम्मेदवार भएर एमालेसँग पराजित भएका थिए । थापा एमालेका गजेन्द्रबहादुर खडकासँग पराजित भएका हुन् ।

८ वटा वडा रहेको रौतमाई गाउँपालिकामा ५ वटा वडामा नेकपा एमाले, २ वटामा कांग्रेस र एउटा वडामा माओवादी केन्द्रले वडाध्यक्ष निर्वाचित भएको निर्वाचन अधिकृतको कार्यालयले जनाएको छ ।

प्रकाशित : जेष्ठ २, २०७९ २२:१३
पूरा पढ्नुहोस्
प्रतिक्रिया
पठाउनुहोस्
×