काठमाडौँ — त्रिभुवन विश्विवद्यालयका उपकुलपति प्रा.डा. धर्मकान्त बाँस्कोटाले  राजनीति हाबी भएकैले नेपालका विश्वविद्यालयहरूमा विद्यार्थीको आकर्षण नभएको बताएका छन् । 

‘दलहरूले राजनीतिक परिवर्तनका लागि विश्वविद्यालयका शिक्षक, कर्मचारी र प्राध्यापकलाई प्रयोग गरे,’ बाँस्कोटाले भने, ‘त्यसले राजनीतिक परिवर्तन ल्याउन सघायो पनि । त्यसपछि विश्वविद्यालयलाई राजनीतिबाट अलग गर्नुपर्थ्यो । तर, अझै पनि राजनीति हाबी भएको छ ।’

यति हुँदाहुँदै पनि त्रिविप्रति विद्यार्थी र प्राध्यापकको आकर्षण हुँदै नभएको भन्नेमा आफू सहमत नभएको बाँस्कोटाको भनाइ छ । सोमबार कान्तिपुर मिडिया ग्रुपले आयोजना गरेको कान्तिपुर एजुकेसन समिट- २०२२ को तेस्रो सत्र ‘ज्ञानको गन्तव्य, स्वदेश कि विदेश ?’ मा उनले त्रिविमा विश्वका प्रतिष्ठित र स्थापित व्यक्तिहरू प्राध्यापनका लागि आउने गरेको बताए ।

‘आकर्षण नभएको भए उनीहरू आउँथेनन् होला,’ उपकुलपति बाँस्कोटाले भने, ‘बाहिरको काम गरिरहेका, प्रेस्टिजियस ठाउँमा बसिरहेकाहरू त्रिविमा आइरहेका छन् ।’

शिक्षामा फन्डिङको व्यवस्था खोज्दै कतिपय मेधावी विद्यार्थीहरू विदेसिने गरेको पनि उनको भनाइ छ। नयाँ–नयाँ 'इन्टरडिसिप्लिनरी' कोर्समा रुचि हुनेहरू पनि पढाइका लागि विदेसिने उनले बताए । ‘हाम्रा केही समृद्ध वर्गले सामाजिक प्रतिष्ठाका लागि पनि छोराछोरी विदेश पठाउँछन्,’ उनले थपे, ‘यो मेन्टालिटीले, अरुलाई देखाउन, नातेदार गएकाले सन्तानलाई विदेश पठाउने चलन छ ।’