बाढीपीडित प्रतिपरिवारलाई तीन लाख दिने कर्णाली सरकारको निर्णय

मन्त्रिपरिषद् बैठकले बुधबार गरेका निर्णय सार्वजनिक गर्दै प्रवक्ता विष्टले बिहीबार पत्रकार भेटघाटमार्फत २०७१ का सुर्खेतका एक हजार ६२ बाढीपीडितलाई प्रदेश सरकारले चालु आव २०७८/७९ मा प्रतिपरिवार तीन लाख रुपैयाँ उपलब्ध गराउने बताएका हुन् । तीन लाखका दरले प्रदेश सरकारले ३१ करोड ८६ लाख रकम बाढीपीडितलाई दिनु पर्नेछ ।

मन्त्रिपरिषद् बैठकबाट कर्णाली प्रदेशका विपन्न घरपरिवारको घर निर्माणका लागि भौतिक पूर्वाधार तथा सहरी विकास मन्त्रालयद्वारा पेस गरिएको ‘कर्णाली प्रदेश विपन्न घर निर्माण कार्यक्रम कार्यान्वयन कार्यविधि, २०७८’ का सम्बन्धमा स्वीकृत प्रदान गर्ने निर्णय गरिएको प्रवक्ता विष्टले बताए । विपन्नहरूको घर निर्माणका लागि हुम्ला र डोल्पामा पाँच लाख र अन्य जिल्लामा चार लाखका दरले उपलब्ध गराइने उनको भनाइ थियो ।

'मुख्यमन्त्री तथा मन्त्रिपरिषद् कार्यालयद्वारा पेस गरिएको ‘प्रशासकीय कार्यविधि नियमित गर्ने ऐन, २०७५’ लाई संशोधन गर्न बनेको विधेयक कर्णाली प्रदेशसभा पेस गर्ने निर्णय गरिएको छ', उनले भने, 'आर्थिक मामिला तथा योजना मन्त्रालयले पेस गरेको ‘कर्णाली प्रदेश बेरुजु व्यवस्थापन सूचना प्रणाली’ कार्यान्वयनमा ल्याउने सम्बन्धमा स्वीकृत प्रदान गर्ने निर्णय बैठकले गरेको छ ।'

प्रवक्ता विष्टका अनुसार मन्त्रिपरिषद् बैठकले मुख्यमन्त्री जीवनबहादुर शाहीको सामाजिक सल्लाहकारमा नरेशविक्रम ढकाललाई नियुक्त गरेको छ । ढकाल गुर्भाकोट नगरपालिका–२ सुर्खेतका स्थायी निवासी हुन् ।