राप्रपा, नेपाल राजा वा राजसंस्था केन्द्रित राजनीति गर्ने छैन : थापा

राष्ट्रिय सभा गृहमा शनिबार आयोजित कार्यक्रममा थापाले राजसंस्थालाई सम्मान गर्ने तर त्यसलाई केन्द्रमा राखेर राजनीति नगर्ने घोषणा गरे । 'राप्रपा, नेपाल आगामी दिनमा राजसंस्थालाई सम्मान गर्ने नीति अख्तियार गर्नेछ । तर, राप्रपा, नेपाल राजा वा राजसंस्था केन्द्रित राजनीति होइन, जनताकेन्द्रित राजनीतिक गर्दछ,' उनले भने ।

थापाले लोकतान्त्रमा आधारित राजनीति गर्ने बताए । 'राप्रपा, नेपाल संविधान र संवैधानिक व्यवस्थासँग सहकार्य गर्दछ । राप्रपा, नेपाल लोकतान्त्रिक मूल्य र मान्यतामा विश्वास गर्दछ । यसमा कोही साथीहरू भ्रममा नपर्नको निमित्त आग्रह गर्दछु,' उनले भने, 'राजसंस्थाप्रति सम्मान जनतामा आधारित राजनीति र लोकतान्त्रिक प्रणाली अबको हाम्रो बाटो हुनेछ भन्ने कुरा निवेदन गर्न चाहन्छु ।'

पृथ्वीनारायण शाहदेखि वीरेन्द्र शाहसम्मलाई स्मरण गरेका थापाले पूर्वराजा ज्ञानेन्द्र शाहको भने नाम लिएनन् । उनले राष्ट्रिय एकीकरमा पृथ्वीनारायण शाह, प्रजातन्त्र स्थापनामा त्रिभुवन शाह, नेपालको आधुनिकीकरण र राष्ट्रियताको सम्बर्धनमा महेन्द्र शाह र पूर्वाधार विकासमा वीरेन्द्र शाहले पुर्‍याएको योगदानको उच्च मूल्यांकन र प्रशंसा गरेका थिए ।

उनले नेपालको भूराजनीतिक अवस्था, धार्मिक, सामाजिक, राजनीतिक, परिवेशमा राजनीतिभन्दा माथि उठेको सेरेमोनियल, संवैधानिक राजसंस्था उपयुक्त हुँदा पनि पछिल्ला घटनाले त्यस्तो कुराको खण्डन गरेको बताए । 'केही वर्षयताका पटकपटकका घटनाक्रमले राजसंस्था संविधानको परिधिभित्र राष्ट्रियता र एकताको प्रतिकको रूपमा रहन सक्नेबारे गम्भीर प्रश्न र आशंका खडा भएको छ,' उनले भने ।

• राप्रपामा हामीलाई योजनाबद्ध रूपमा पाखा लगाउने परिस्थिति निर्माण भयो : थापा