निःशुुल्क दिइने कोभिड खोपमा पैसा लिएको पाइयो : छानबिन प्रतिवेदन
काठमाडौँ — कोभिड खोप छानबिन समितिले निःशुुल्क कोभिड खोपमा पैसा लिएको पाइएको जनाएको छ । यस सम्बन्धमा उजुरीको आधारमा अख्तियार दुरुपयोग अनुसन्धान आयोगले समेत छानबिन गरिरहेको प्रतिवदेनमा उल्लेख छ।
२४ लाख खोपको हराएकोमा प्रश्न उठेपछि छानबिनका लागि गत माघ १६ गतेको मन्त्रीस्तरीय निर्णयानुसार पाँच सदस्यीय छानबिन समिति गठन भएको थियो। कोभिड १९ विरुद्धको खोप मौज्दात र उपभोगको अभिलेख राख्न गठन गरिएको छानबिन समितिले प्रतिवदेन सार्वजनिक गरेको हो।
प्रतिवदेनका अनुसार प्राप्त सबै विवरणलाई विश्लेषण गर्दा ४,५५,३५५ मात्रा खोप बढि रहेको देखिन्छ। विभिन्न स्थानहरुमा गरिएको स्थलगत अवलोकन,अन्तरकृया र सन्दर्भ सामाग्रीको अध्ययन गर्दा १० मात्राको भायलमा ११ जनालाई लगाएको समेत देखिएको प्रतिवेदनमा उल्लेख छ । यो हेर्दा स्वास्थ्यकर्मीले खोपको मात्रा नमिलाइ लगाएको पाइएको छ ।
केहि जिल्ला तथा स्थानिय तहमा हस्तान्तरण फारम, मौज्दात र खोप लगाएको विवरणको अभिलेख नियमित र पूर्ण रुपमा अध्यावधिक हुन नसकेको, बुस्टर मात्रा लगाउने सम्बन्धी आधिकारिक निर्णय नहुँदै पहिले खोप लगाइसकेका केहीव्यक्तिले पहिलो खोप भनि बुस्टर लगाएको खोपको प्रतिवेदनमा उल्लेख छ ।
समितिले खोपको अभिलेख राख्न केन्द्रिय खोप भण्डार, ७ प्रदेश, ७७ जिल्ला र ७५३ स्थानीय तहलाई सार्वजनिक सूचना आह्वान गरेतापनि हालसम्म ७ प्रदेश, ७७ जिल्ला र ७४४ स्थानिय तहबाट मात्र तथ्याङ्क प्राप्त हुन सकेको छ।
समिति संयोजकमा संयोजकमा डा. गुणराज लोहनी, प्रमुख विशेषज्ञ सदस्य यशोदा अर्याल, प्रमुख जनस्वास्थ्य प्रशासक सदस्य अनिल थापा, उपसचिव (तथ्यांक) सदस्य डा. अभियान गौतम, उप–स्वास्थ्य प्रशासक सदस्यसचिव डा. गुण निधि शर्मा, वरिष्ठ स्वास्थ्य प्रशासक रहेका थिए ।
नेपालमा २०७७ माघ १४ गतेबाट कोभिड–१९ विरुद्धको खोप अभियान सञ्चालन भएको थियो ।
