वैशाख मसान्तसम्म लक्षित जनसंख्याका सबैलाई कोभिड-१९ विरुद्धको पूर्ण खोप- समाचार - कान्तिपुर समाचार
कान्तिपुर वेबसाईट
AdvertisementAdvertisement

वैशाख मसान्तसम्म लक्षित जनसंख्याका सबैलाई कोभिड-१९ विरुद्धको पूर्ण खोप

फागुन १ देखि १८ वर्षमाथिका सबैलाई बुस्टर
कान्तिपुर संवाददाता

काठमाडौँ — स्वास्थ्य तथा जनसंख्यामन्त्री विरोध खतिवडाले २०७९ वैशाख मसान्तसम्म लक्षित जनसंख्याका सबैलाई कोभिड–१९ विरुद्धको पूर्ण खोप प्रदान गर्ने लक्ष्य निर्धारण गरिएको बताएका छन् । स्वास्थ्यमन्त्री खतिवडाले मन्त्रालयको कार्यभार सम्हालेपछिको प्रगति विवरण सार्वजनिक गर्दै शुक्रबार वैशाख मसान्तसम्ममा लक्षित जनसंख्याका सबैलाई खोप प्रदान गर्ने दाबी गरेका हुन् ।

उनले गत असोज २२ गते मन्त्रालयको कार्यभार सम्हालेपछिको प्रगति विवरण सार्वजनिक गरे पनि त्यसमा अधिकांश रुपमा विगतका सरकारहरूले गरेका निर्णयहरूकै निरन्तरतामात्रै देखिएका छन् ।

उनले लक्षित जनसंख्यालाई खोप दिनका लागि खोपको सुनिश्चितता भइसकेको पनि दाबी गरेका छन् । उनका अनुसार माघ २७ गतेसम्म १२ वर्षमाथिको लक्षित जनसंख्याको ७७ प्रतिशतलाई पहिलो मात्रा र ६९ प्रतिशतलाई पूर्ण खोप प्रदान गरिएको पनि जानकारी दिएका छन् । नेपालले हालसम्म ४ करोड ६५ लाख ७० हजार ७२० डोज खोप प्राप्त गरिसकेको छ भने नागरिकलाई ३ करोड ४८ लाख २५ हजार ६०१ डोज खोप लगाइसकेको छ ।

मन्त्री खतिवडाले कोभिड–१९ को खोप अभियानलाई नै आफ्नो प्रमुख कार्यका रुपमा पेश गरेका छन् । उनले १२ देखि १७ वर्ष उमेर समूहका करिब ३४ लाख बालबालिकाहरूलाई खोप दिने कार्य आफ्नो नेतृत्वमा भएको बताए; यद्यपि पूर्ववत् सरकारले नै खोप प्राप्तिको सुनिश्चितता गरिसकेको थियो । यस्तै गर्भवती महिलालाई खोप लगाउन थालिएको कार्यलाई पनि मन्त्री खतिवडाले आफ्नो कार्यगत सफलतामा समावेश गरेका छन् ।

ओमिक्रोन भेरिएन्ट नेपालमा फैलिसकेपछि मात्रै स्वास्थ्य मन्त्रालयले अग्रपंक्तिमा खटिनेलाई बुस्टर डोज दिने निर्णय गर्नुलाई आफ्नो सफलताका रुपमा पेश गरेका छन् । सरकारले पुसको अन्तिम साता नै बुस्टर डोज दिने घोषणा गरेपनि पछि त्यो प्राविधिक कारण भन्दै माघको २ गतेदेखि मात्रै सुरु गरिएको थियो ।

त्यस्तै, ५ देखि ११ वर्ष उमेर समूहका बालबालिकालाई पनि कोभिड–१९ विरुद्धको खोप प्रदान गर्न खोपको सुनिश्चितता गरेको पनि मन्त्री खतिवडाले जानकारी गराएका छन् ।

यसैगरी मन्त्री खतिवडाले फागुन १ गतेदेखि १८ वर्षमाथिका सबैलाई कोरोनाविरुद्धको बुस्टर खोप प्रदान गर्ने बताएका छन् ।

स्वास्थ्यमन्त्रीले आफ्नो कार्यगत प्रगती विवरणमा नसर्ने रोग रोकथाम तथा नियन्त्रणसम्बन्धी बहुक्षेत्रीय कार्ययोजना (२०७८–२०८३) मन्त्रिपरिषद्‌बाट स्वीकृत भइसकेको, मिर्गौला प्रत्यारोपण, क्यान्सर रोगी र मेरुदण्ड पक्षघातका बिरामीलाई औषधि उपचार खर्च उपलब्ध गराउनेसम्बन्धी कार्यविधि, २०७८ को मस्यौदा, राष्ट्रिय राष्ट्रिय स्वास्थ्य वित्त रणनीति २०७८-२०८८ को मस्यौदा, राष्ट्रिय आँखा स्वास्थ्य रणनीति २०७८-२०८६ को अन्तिम मस्यौदा, जेरीयाट्रीक स्वास्थ्य सेवा रणनीति २०७८, नेपाल स्वास्थ्य लेखा २०१७/१८, नेपाल स्वास्थ्य संस्था सर्वेक्षण–२०२१, टेलिमेडिसिन सेवा सञ्चालन कार्यविधि, २०७८, आन्तरिक नियन्त्रण प्रणाली निर्देशिका, २०७८ तर्जुमा भएको पनि उल्लेख गरेका छन् ।

यस्तै तत्कालीन प्रधानमन्त्री केपी शर्मा ओलीले बिनाकुनै ठोस योजना हठात्‌मा उद्धघाटन गरेका ३९६ आधारभूत अस्पतालमध्ये २२६ वटाको टेन्डर प्रक्रिया भई कार्य प्रारम्भ भइएसकेको पनि आफ्नो कार्यगत प्रगति विवरणमा समेटेका छन् ।

प्रकाशित : माघ २८, २०७८ १३:५०
प्रतिक्रिया
पठाउनुहोस्

दलहरुसँगको सहमतिबाट एमसीसी पास गरिनुपर्छ : थापा

कान्तिपुर संवाददाता

मोरङ — राप्रपाबाट अलग भएर नयाँ पार्टी खोल्ने घोषणा गरेका कमल थापाले बढीभन्दा बढी दलसँग सहमति कायम गरी एमसीसी पास गर्नुपर्ने बताएका छन् ।

फाइल फोटो

विराटनगरमा शुक्रबार सञ्चारकर्मीसँगको कुराकानीमा थापाले एमसीसी आफैंमा आपत्तिजनक नभएको तर यस बारेमा केही आशंका र प्रश्नहरु उब्जिएकाले सरकारले एमसीसी अगाडि बढाउनुअघि त्यस्ता आशंका र प्रश्नहरुको निवारण गर्न आवश्यक भएको बताए । एमसीसी आर्थिक सहयोग भएको र यसले नेपाललाई कुनै हानीनोक्सानी नहुने उनको भनाइ थियो ।

यस्तै, आफूले नयाँ पार्टी खोल्ने घोषणा गरेको र फागुन पहिलो साताभित्र निर्वाचन आयोगमा पार्टी दर्ता गराउने पनि उनले बताए । उनले पार्टीको नाम, चुनाव चिह्न र झन्डाबारे आफ्नो नेतृत्वमा विश्वास गर्ने नेता तथा कार्यकर्तासँग विभिन्न विकल्पमा छलफल गरिरहेको बताए । राष्ट्रिय एकता पार्टी नाम राख्नु पर्ने धेरैको सुझाव आएको समेत उनले बताए ।

निर्वाचन आयोगमा दर्ता रहेका केही दलहरुसँग पनि छलफल भइरहेकाले अरु पार्टीसँग पनि एकीकृत भएर अघि बढ्ने विकल्पमा समेत छलफल भइरहेको उनको भनाइ थियो । उनले आफूले खोल्न लागेको पार्टीको प्रमुख एजेन्डा हिन्दुराष्ट्र, सुशासन र समृद्धि रहने बताए ।


प्रकाशित : माघ २८, २०७८ १३:३३
पूरा पढ्नुहोस्
प्रतिक्रिया
पठाउनुहोस्
×