जेठमा स्थानीय निर्वाचन गर्ने सत्ता गठबन्धनमा सहमति- समाचार - कान्तिपुर समाचार

जेठमा स्थानीय निर्वाचन गर्ने सत्ता गठबन्धनमा सहमति

कान्तिपुर संवाददाता

काठमाडौँ — सत्ता गठबन्धनसम्बद्ध दलहरुले ०७९ सालको जेठमा स्थानीय तहको निर्वाचन गर्ने सहमति जुटाएका छन् । प्रधानमन्त्री एवम् कांग्रेस सभापति शेरबहादुर देउवाको प्रस्तावमा गठबन्धनका सबै दलहरुले सहमति जनाएका हुन् । देउवाले शनिबार बिहानको बैठकमा त्यस्तो प्रस्ताव गरेका थिए ।

त्यसबारे पार्टीभित्र आन्तरिक छलफल गरेपछि प्रधानमन्त्रीको सरकारी निवास बालुवाटारमा शनिबार साँझ कानुनविद्हरुसहित गठबन्धनको बैठक बसेको थियो । बैठकमा ०७९ सालको जेठमा स्थानीय निर्वाचन गर्ने सहमति भएको नेकपा (माओवादी केन्द्र)का नेता नारायणकाजी श्रेष्ठले इकान्तिपुरलाई जानकारी दिए । ‘जेठमा स्थानीय निर्वाचन गर्ने सहमति भएको छ । अब सरकारले निर्वाचन आयोगसँग परामर्श गरेर निर्वाचनको मिति तोक्छ,’ नेता श्रेष्ठले इकान्तिपुरसँग भने, ‘त्यसका लागि संविधान र ऐनमा आवश्यक संशोधन गर्ने र निर्वाचनको तयारी अघि बढाउने सहमति भएको छ ।’

यसअघि गठबन्धनले असोजपछि मात्रै स्थानीय निर्वाचन गर्ने गरी छलफल चलाउँदै आएको थियो । तर, शनिबार बिहानमात्रै प्रधानमन्त्री शेरबहादुर देउवाले तत्काल स्थानीय निर्वाचन गर्नुपर्ने प्रस्ताव गरेका थिए ।

निर्वाचन आयोगले यसअघि नै वैशाखमा निर्वाचन गर्न मिति प्रस्ताव गरिसकेको छ । तर, आयोगको प्रस्तावविपरीत गठबन्धनले निर्वाचन सार्ने प्रपञ्च रचेको भन्दै चौतर्फी आलोचना भएपछि प्रधानमन्त्री देउवाले गठबन्धनमा जेठमै निर्वाचन गर्ने सहमति जुटाएका हुन् । राष्ट्रपति विद्यादेवी भण्डारीले समेत बिहीबार देउवासँगको भेटमा लिखितरुपमै स्थानीय निर्वाचन नसार्न आग्रह गरेकी थिइन् । पार्टीभित्रैबाट र चौतर्फी दबाबमा परेका देउवाले शुक्रबारमात्रै पार्टीका पदाधिकारीहरुसँग छलफलपछि स्थानीय निर्वाचनलाई जेठभित्रै गर्नुपर्ने निष्कर्षमा पुगेका थिए ।

संविधानले स्थानीय तहका जनप्रतिनिधिको पदावधिको ५ वर्षको हुने व्यवस्था गरेको छ । तर, ऐनको व्यवस्थाबमोजिम आगामी जेठ ५ गते स्थानीय तह जनप्रतिनिधिविहीन हुनेछन् ।

प्रकाशित : माघ १५, २०७८ १८:४५
प्रतिक्रिया
पठाउनुहोस्

दशकपछि नेपालको मैत्रीपूर्ण खेलमा जित

हिमेश

काठमाडौँ — राष्ट्रिय टिममा पुनर्आगमन गरिरहेका विमल घर्तीमगरको निर्णायक गोलसँगै नेपालले मोरिससविरुद्धको पहिलो अन्तर्राष्ट्रिय मैत्रीपूर्ण खेलमा १–० को जित निकालेको छ । एक दशकभन्दा बढी समयपछि नेपालले अन्तर्राष्ट्रिय मैत्रीपूर्ण खेलमा जित हात पारेको हो । यस्तै नेपाल दशरथ रंगशालामा भएको अन्तर्राष्ट्रिय मैत्रीपूर्ण खेलमा विजयी रहेको यो पहिलो पल्ट हो ।

मुख्य प्रशिक्षक अब्दुल्लाह अल्मुताइरीले पनि दशरथ रंगशालामा जित आत्मसात् गरेको यो पहिलो पल्ट हो । नेपालले सन् २०११ देखि कुनै पनि मैत्रीपूर्ण अन्तर्राष्ट्रिय खेलमा जित निकाल्न सकेको थिएन । यस जितपछि नेपालको मैत्रीपूर्ण अन्तर्राष्ट्रिय खेलमा लगातार २३ खेलको जितहीन यात्रामा पूर्ण विराम लगाएको छ ।

विमलले ५५ औं मिनेटमा गोल गरेका हुन् र यो उनको व्यक्तिगत नवौं गोल हो । उनले अन्तिम पटक सन् २०१९ मा बंगलादेशविरुद्ध साफ च्याम्पियनसिपमा ढाकामा गोल गरेका थिए । यस्तै उनले नेपालका लागि अन्तिम पटक सन् २०१९ को नोभेम्बरमा म्यानमारविरुद्ध खेलेका थिए । प्रतिबन्ध र चोटका कारण उनी तीन वर्ष राष्ट्रिय टिमबाट बाहिर रहे ।

घुँडाको चोटबाट मुक्त हुन शल्यक्रिया गरेपछि उनी विमल पुरानो लय समात्ने प्रयासमा छन् । त्यसयता पहिलोपल्ट नेपालका लागि खेलिरहेको विमलले मोरिससका तीन डिफेन्डरबीच प्राप्त बललाई पोस्टको दिशा दिए । उनलाई अञ्जन विष्टले पास उपलब्ध गराएका थिए । यस खेलबाट विमलसँगै जगजीत श्रेष्ठ र देवेन्द्र तामाङले राष्ट्रिय टिममा पुनर्आगमन गरेका छन् ।

जगजीतले सात वर्षपछि नेपालका लागि खेले । अस्ट्रेलिया जान अगाडि उनले सन् २०१५ मा अन्तिम पटक नेपालका लागि खेलेका थिए । निराशाजनक पहिलो हाफमा दुवै टिमले खासै उल्लेखनीय आक्रमण बुन्न सकेनन् । दोस्रो हाफको सुरुमै मोरिससको फर्नान्डो ज्याक्सनको प्रहार पोस्टमा लागेर फर्केको थियो ।

यस्तै दोस्रो हाफमै अञ्जन र जगजीत श्रेष्ठको प्रहार मोरिससको पोस्टमा लागेको थियो । नेपालका लागि सुदीप गुरुङ र आकाश बुढामगरले डेब्यूको अवसर पाए । मोरिससले अपेक्षाभन्दा बढी नेपाललाई जितका लागि संघर्ष गर्न बाध्य गरेको थियो । मोरिससले साढे दुई वर्षपछि अन्तर्राष्ट्रिय फुटबलमा फर्केको हो ।

अब दुई टिमबीचको दोस्रो अन्तर्राष्ट्रिय खेल मंगलबार दशरथ रंगशालामा हुनेछ ।

नेपाली टिम : किरण लिम्बु, गौत्तम श्रेष्ठ, दिनेश राजवंशी, देवेन्द्र तामाङ, सुमन अर्याल, सुरज ठकुरी (सुदीप गुरुङ), सुमन लामा (विशाल राई), तेज तामाङ (आकाश बुढामगर), अञ्जन विष्ट (सुजल श्रेष्ठ), विमल घर्तिमगर (मनीष डाँगी), सुनिल बल (जगजीत श्रेष्ठ) ।

प्रकाशित : माघ १५, २०७८ १८:४२
पूरा पढ्नुहोस्
प्रतिक्रिया
पठाउनुहोस्
×