कांग्रेसको ३७ सदस्यीय कार्यसम्पादन समिति गठन- समाचार - कान्तिपुर समाचार

कांग्रेसको ३७ सदस्यीय कार्यसम्पादन समिति गठन

कान्तिपुर संवाददाता

काठमाडौँ — नेपाली कांग्रेसको केन्द्रीय कार्यसम्पादन समिति गठन भएको छ । शुक्रबार बसेको केन्द्रीय समितिको भर्चुअल बैठकमा सभापति शेरबहादुर देउवाले कार्यसम्पादन समितिका सदस्यहरुको नाम प्रस्ताव गरेका थिए । बैठकले ३७ सदस्यीय कार्यसम्पादन समिति गठन गरेको हो ।

समितिमा सभापति देउवासहित उपसभापति पूर्णबहादुर खड्का, धनराज गुरुङ, महामन्त्री विश्वप्रकाश शर्मा, गगन थापा, सहमहामन्त्रीहरु जीवन परियार, महालक्ष्मी उपाध्याय, भिष्मराज आङ्देम्बे, बद्री पाण्डे, फरमुल्लाह मन्सुर, महेन्द्र यादव, किशोरसिंह राठौर, उमाकान्त चौधरी गरी १३ स्वत: सदस्य बनेका छन् ।

सभापति देउवाले केन्द्रीय कार्यसमिति सदस्यमध्येबाट पूर्वपदाधिकारीहरुसहित वरिष्ठताका आधारमा २४ जनालाई कार्यसम्पादन समितिमा समेटेका हुन्। विधानअनुसार कार्यसम्पादन समिति ४६ सदस्यीय हुन्छ । जसमध्ये कोषाध्यक्ष र प्रवक्ता स्वत: सदस्य रहने व्यवस्था छ । अब सभापति देउवाले समितिमा ७ जना केन्द्रीय सदस्यहरुलाई मनोनित गर्न पाउने छन् ।

महाधिवेशन सकिएको २ महिना बित्नै लाग्दा देउवाले केन्द्रीय कार्यसमितिलाई पूर्णता दिन भने सकेका छैनन् । जसकारण केन्द्रीय कार्यसम्पादन समितिसमेत अपूरो बनेको छ ।

पहिलो चरणमा रामचन्द्र पौडेल, गोपालमान श्रेष्ठ, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, डा. शशांक कोइराला, चित्रलेखा यादव, डा. रामशरण महत, अर्जुननरसिंह केसी, डा. प्रकाशशरण महत, सुनीलबहादुर थापा, डा. शेखर कोइराला, बलबहादुर केसी, बालकृष्ण खाँण, ज्ञानेन्द्रबहादुर कार्की, उमा रेग्मी, रमेश रिजाल, डा. नारायण खड्का, जिपछिरिङ लामा, सुजाता कोइराला, एनपी साउद, जीवनबहादुर शाही र आनन्दप्रसाद ढुंगाना कार्यसम्पादन समितिमा परेका छन् ।

यस्तै विगतको अभ्यासबमोजिम सभापति देउवाले वरिष्ठताका आधारमा मनोनयन गर्दा ३१ सदस्यको सूचीमा सभापतिमा पराजित शेखर कोइराला, केन्द्रीय सदस्यहरु बलबहादुर केसी, बालकृष्ण खाँण, ज्ञानेन्द्रबहादुर कार्की, रमेश रिजाल, जीपछिरिङ लामा, पद्मनारायण चौधरी, दिलेन्द्रप्रसाद बडू, एनपी सावद, आनन्द ढुंगाना र जीवनबहादुर शाहीलाई पनि समेटेका छन् ।

प्रकाशित : माघ १४, २०७८ १६:४६
प्रतिक्रिया
पठाउनुहोस्

कर्मचारीमा कोरोना देखिएपछि पाल्पा प्रशासन र तानसेन नगरपालिकाको सेवा बन्द

माधव अर्याल

पाल्पा — कर्मचारीमा कोरोना संक्रमण फैलिएपछि जिल्ला प्रशासन कार्यालय र तानसेन नगरपालिकाको सेवा एक साताका लागि बन्द गरिएको छ ।

प्रमुख जिल्ला अधिकारी जगन्नाथ पन्तका अनुसार नागरिकता शाखामा काम गर्ने तीन जना कर्मचारीमा कोरोना संक्रमण देखिएपछि सेवा बन्द गरिएको हो । साथै अरुकेही कर्मचारीमा कोभिडसँग मिल्दोजुल्दो लक्षण देखिएकोले एक हप्ता सेवा बन्द गर्नु परेको बताइएको छ ।

१४ गते शुक्रबारदेखि २१ गतेसम्म कार्यालयको शान्तिसुरक्षा, विपद्, महामारीजन्य, मुद्दा लगायत अत्यावश्यक सेवा बाहेक नागरिकता, राहदानी, राष्ट्रिय परिचय पत्र, मतदाता नामावली संकलन लगायत कार्यहरू बन्द गरिएको प्रमुख जिल्ला अधिकारी पन्तले बताए ।

तानसेन नगरपालिकामा ३२ जना कर्मचारीमा कोरोना परीक्षण गर्दा २३ जना कर्मचारी तथा जनप्रतिनिधिमा कोरोना देखिएपछि एक साताका लागि कार्यालयको सेवा बन्द गरेको छ ।

प्रमुख प्रशासकीय अधिकृत पिताम्बर पाण्डेयले सूचना जारी गर्दै माघ २१ गतेसम्म कार्यालयको अत्यावश्यक सेवा बाहेक अन्य सबै सेवा बन्द भएको जानकारी दिएका छन् । उनका अनुसार कतिपय कर्मचारीमा पनि कोरोनासँग मिल्दोजुल्दो लक्षण देखिएको छ ।

प्रकाशित : माघ १४, २०७८ १६:४६
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×