बेलायतको राजदूतमा आचार्य नियुक्त
काठमाडौँ — राष्ट्रपति विद्यादेवी भण्डारीले ज्ञानचन्द्र आचार्यलाई संयुक्त अधिराज्यका लागि नेपालको आवासीय राजदूत नियुक्त गरेका छन् ।
राष्ट्रपतिले शुक्रबार उनलाई नेपालको संविधानको धारा २८२ बमोजिम मन्त्रिपरिषद्को सिफारिसमा राजदूतमा नियुक्त गरेको राष्ट्रपतिको कार्यालयले जनाएको छ ।
आचार्यको नाम संसदीय सुनुवाइ समितिबाट मंसिर २० गते अनुमोदन भएको थियो । कात्तिक ११ गते बसेको मन्त्रिपरिषद् बैठकले उनीसहित भारतका लागि शंकर शर्मा र अमेरिकाका लागि श्रीधर खत्रीलाई संसदीय सुनुवाइका लागि सिफारिस गरेको थियो ।
संसदीय समितिबाट अनुमोदन भएसँगै तीन राजदूतको एग्रिमो (अनुमति पत्र) को लागि सम्बन्धित मुलुकलाई पत्राचार गरिएको थियो । पत्राचार गरिएकोमा बेलायतबाट मात्र हालसम्म स्वीकृति प्राप्त भएको छ । अमेरिका र भारतबाट एग्रिमो आइसकेको छैन । त्यसैले बेलायतका लागि राजदुत आचार्यलाई राजदूतमा नियुक्त गरिएको हो ।
सरकारले चीनसहित अन्य २० विदेशी नियोगमा भने राजदूत नियुक्त गरेको छैन ।