'कानुनी र राजनीतिक उपचार खोज्ने' निर्णय- समाचार - कान्तिपुर समाचार
कान्तिपुर वेबसाईट
AdvertisementAdvertisement
निर्वाचन आयोगसँग राप्रपा असन्तुष्ट

'कानुनी र राजनीतिक उपचार खोज्ने' निर्णय

कान्तिपुर संवाददाता

काठमाडौँ — राष्ट्रिय प्रजातन्त्र पार्टीले विधानको सम्बन्धमा निर्वाचन आयोगले पठाएको पत्रप्रति असन्तुष्टि जनाएको छ । राप्रपाको केन्द्रीय पदाधिकारी बैठकले निर्वाचन आयोगले पार्टीप्रति देखाएको पूर्वाग्रहलाई लिएर राजनीतिक र कानुनी उपचार खोज्ने निर्णय पनि गरेको छ । 

राप्रपाका केन्द्रीय पदाधिकारीको आइतबारको बैठकले आयोगलाई तत्काल जवाफ नदिई उपयुक्त समय कुर्ने निर्णय गरेको पनि महामन्त्री भुवन पाठकले जानकारी दिएका छन् । 'निर्वाचन आयोगले पार्टीलाई पठाएको पत्रको जवाफ उपयुक्त समयमा दिने तथा आयोगको पत्रका सम्बन्धमा कानुनी र राजनीतिक उपचार खोज्नेसमेत निर्णय गरेको छ,' राप्रपाको निर्णयमा भनिएको छ ।

राप्रपालाई विधानबाट 'सनातन हिन्दुराष्ट्र एवं राजसंस्था सहितको प्रजातन्त्रको मान्यता अभिवृद्धि गर्न र कायम गर्न' भन्ने वाक्य हटाउन निर्वाचन आयोगले पत्र पठाएको थियो । त्यस्तै, पार्टी झन्डामा प्रयोग गरिएको गाईको तस्बिर हटाएर अनुसूची संशोधन गर्न पनि राप्रपालाई भनिएको थियो ।

यसरी पत्र काट्नु संविधान र कानुनविपरीत भएको राप्रपाको ठहर छ । 'निर्वाचन आयोगले राप्रपाको विधानको प्रस्तावनाको बुँदा नम्बर ४ मा उल्लेखित 'सनातन हिन्दुराष्ट्र एवं राजसंस्थासहितको प्रजातन्त्रको मान्यता अभिवृद्धि गर्न र कायम गर्नु' भन्ने वाक्यांश संविधानको प्रस्तावना एवं भावनाको प्रतिकूल देखिएकोले सो वाक्यांश हटाई नेपालको संविधानको धारा २६९ तथा राजनीतिक दलसम्बन्धी ऐन, २०७३ अनुकूल हुने गरी उल्लेख गर्नुहुन भनी पठाएको पत्र नेपालको संविधानको मर्म र भावनाविपरीत भएको,' राप्रपाको ठहर छ ।

त्यस्तै, गाई चिह्न हटाउन भनेकोबारे राप्रपाले भनेको छ, 'राप्रपाको मूल्य र मान्यताविपरीत रहेको, विगतमा पार्टीले प्रयोग गर्दै आएको निर्वाचन आयोगले समेत मान्यता प्रदान गरेको राप्रपाको झन्डामा र राप्रपाको चुनाव चिह्नको रुपमा समेत प्रयोग भई स्थानीय तह, प्रादेशिक तथा संघीय निर्वाचनमा समेत निर्वाचित भएको सन्दर्भमा आयोगको निर्देशन पूर्वाग्रही देखिएको ।'

राप्रपाले पार्टी विधान आयोगमा पठाएको थियो । जसमा संशोधन गर्न भन्दै आयोगले माघ २ गते पत्र काटेको थियो ।

प्रकाशित : माघ ९, २०७८ १५:४०
प्रतिक्रिया
पठाउनुहोस्

तीन दशकयता तीनपटक नापजाँच गरिए पनि बन्न सकेन विमानस्थल

विप्लव महर्जन

सल्यान — तीन दशकअघि नापजाँच गरी छनोटमा परेको कालिमाटी गाउँपालिका १ लक्ष्मीपुरको कोट भन्ने ठाँउमा बनाउने भनिएको एयरपोर्ट कागजमै सिमित रहेको छ । जिल्लाका अधिकांश ठाँउमा गाडी गुड्न थालेपछि विमानस्थल प्राथमिकतामा पर्न नसक्दा काम अघि बढ्न नसकेको हो ।



कालिमाटी गाउँपालिका १ लक्ष्मीपुरको कोटमा विमानस्थल बनाउन आर्थिक वर्ष ०१८, ०३५ र ०४८ मा तीनपटक नापजाँच गरिएको थियो । उक्त स्थानमा विमानस्थल बनाउन ०१८ मा वन सहायक मन्त्री बनेका सल्यानका नेवबहादुर मल्लले छनोट गरेका थिए ।

सबै ठाउँमा मोटर बाटो पुगेर साना ठूला गाडी गुड्न थालेपछि विमानस्थल बनाउने विषयमा कुरै उठ्न छाडेको लक्ष्मीपुरका खुमबहादुर रावत बताउँछन् । पछिल्लो समय बारम्बार नेतालाई जानकारी गराउनुका साथै ठाउँसमेत देखाइए पनि विमानस्थल निर्माणबारे कुनै चासो नदिइएको उनले बताए ।

‘पहिला मोटर बाटो नहुँदा सबैले चासो देखाएका थिए , अहिले सबैले बिर्सिए,’ उनले भने ‘सम्बन्धित निकाय सबै सडक खन्नमै व्यस्त छन् । यसरी त कहिले बन्ला र एयरपोर्ट ।’

जिल्लामा एउटा भए पनि विमानस्थल बनाउने सपना अघि बढ्न नसकेको उनी बताउँछन् । कसैले ध्यान नदिँदा स्थानीयले विमानस्थल बनाउनका लागि छनोटमा परेको जग्गाको आधाभन्दा बढी भाग अतिक्रमण गरेर घर बनाएर बस्दैआएको र बाँकी जग्गामा खेती गर्दैआएको हिरालाल रावतले बताए ।

विमानस्थल बनाउने जग्गाको केही भाग स्थानीय आधारभूत विद्यालय र एक निजी कम्पनीले ओगटेको उनले बताए । ‘विमानस्थल बनेको भए प्लेनबाट छिटो यात्रा गर्न सकिन्थ्यो । कोही बिरामी भएमा छिटै राजधानी र नेपालगन्ज लगायत सहरका अस्पतालमा बिरामी लैजान सकिन्थ्यो । घण्टौंसम्म एम्बुलेन्स तथा अन्य गाडीको भर पर्नु पर्दा बिरामीको ज्यान जाने सम्भावना उस्तै छ’ उनले गुनासो गरे ।

७० वर्षीय नीमलाल भण्डारी भने विमानस्थल नबन्दा स्थानीयहरू निराश बनेको बताउँछन् । यतिसम्म कि विमानस्थलका लागि स्थान छनोटमा परेपछि केही श्रमदान गरेर त्यहाँ रहेका साना थुम्का सम्याएको र गोरेटो बाटो निर्माण गरेको उनले बताए ।

विमानस्थल निर्माण लागि सम्बन्धित निकायमा बारम्बार पहल गरे पनि कसैले नसुनेको उनको गुनासो छ । कालिमाटी गाउँपालिका अध्यक्ष दानबहादुर खत्रीले भने विमानस्थल निर्माणका लागि बजेट जुटाउन मुस्किल हुनसक्ने बताए ।

प्रकाशित : माघ ९, २०७८ १५:३५
पूरा पढ्नुहोस्
प्रतिक्रिया
पठाउनुहोस्
×