बाघ पाइने देशका मन्त्रीहरूको भर्चुअल बैठक : संरक्षणका चुनौती र उपलब्धिबारे छलफल- समाचार - कान्तिपुर समाचार

बाघ पाइने देशका मन्त्रीहरूको भर्चुअल बैठक : संरक्षणका चुनौती र उपलब्धिबारे छलफल

यसै वर्ष रुसको भ्लादिभोस्तोकमा दोस्रो बाघ सम्मेलन हुने 
अब्दुल्लाह मियाँ

काठमाडौँ — नेपालमा बाघ गणना भइरहेकै बेला बाघ पाइने एसियाली मन्त्रीहरुको चौथो बैठक भर्चुअल रुपमा बुधबारदेखि सुरु भएको छ । बाघ पाइने देशमध्येको मलेसिया सरकार र ग्लोबल टाइगर फोरम (जीटीएफ) को संयुक्त आयोजनामा भएको यो बैठकमा बाघ संरक्षणका चुनौती र अहिलेसम्मका उपलब्धिबारे अनुभव आदान–प्रदान हुनेछ ।

बुधबार सुरु भएको बैठकमा पहिलो चरणमा बाघ पाइने सबै देशका सरकारी अधिकारी, सहयोगी संस्थाका प्रतिनिधि र विशेषज्ञहरुले अहिलेसम्म बाघ संरक्षण, बाघका चुनौती र दोब्बर बनाउने घोषणामा भएका उपलब्धिबारे अनुभव साटेका छन् ।

नेपालका तर्फबाट बुधबार राष्ट्रिय निकुञ्ज तथा वन्यजन्तु संरक्षण विभागका महानिर्देशक डा.रामचन्द्र कँडेलले बाघ संरक्षणमा नेपालको अवस्थाबारे जानकारी गराएका छन् । ‘बाघ संरक्षणमा भएका उपलब्धि र चुनौतीबारे विश्व समुदायलाई जानकारी गराएँ,’ उनले भने, ‘अरु मुलुकहरुले पनि आ आफ्नो अनुभव साटेका छन् ।’

वन तथा वातावरणमन्त्री रामसहायप्रसाद यादवले भने वैठकलाई शुक्रबार सम्वोधन गर्दैछन् । उनको सम्बोधनमा नेपालले बाघ संरक्षणमा प्राप्त गरेको उपलब्धि र चुनौतीबारे विस्तृत रुपमा उल्लेख गरिएको छ ।

बाघ पाइने एसियाली देशका मन्त्रीहरुको तेस्रो बैठक सन् २०१६ मा भारतको नयाँदिल्लीमा भएको थियो । चौथो बैठक सन् २०२० मा मलेसियामा गर्ने तय भएकामा कोभिड संक्रमणका कारण स्थगित भएको थियो ।

बाघ पाइने १३ देशका राष्ट्रप्रमुखहरुको सन् २०१० मा रुसको सेन्ट पिटर्सबर्गमा भएको पहिलो सम्मेलनले यही वर्ष (सन् २०२२) प्राकृतिक वासस्थानमा बाघको संख्या सन् २०१० मा भन्दा दोब्बर बनाउने संकल्प गरेको थियो । घोषणा भएको बेला नेपालमा बाघको संख्या १२१ थियो भने विश्वभर ३ हजार २०० थियो । सन् २०१८ को गणनाअनुसार नेपालमा बाघको संख्या २३५ छ । मंसिर १९ देखि देशभर बाघ गणना जारी छ ।

महानिर्देशक कँडेल यो पटकको गणनाबाट बाघको संख्या दोब्बर गर्ने घोषणा पूरा हुने बताउँछन् । ‘बाघको संख्या बढाउनका लागि हामीले वासस्थान विस्तार, वासस्थान सुधार र आहार संरक्षणमा जोड दिएका छौं,’ उनले भने, ‘आशा छ, हामीले सन् २०१० मा घोषणा गरेको प्रतिवद्धता यो गणनाबाट पूरा हुनेछ ।’

आगामी जुलाई २९ मा बाघ गणनाको परिणाम सार्वजनिक गरिनेछ ।

भ्लादिभोस्तोकमा बाघ सम्मेलन यसै वर्ष

यसै वर्ष रुसको भ्लादिभोस्तोकमा बाघ पाइने देशका सरकारहरुको दोस्रो सम्मेलन हुँदैछ । रुसका राष्ट्रपति भ्लादिमिर पुटिनले यसै वर्षभित्र दोस्रो बाघ सम्मेलन आयोजना गर्न लागेका हुन् । मिति भने तय भइसकेको छैन । पहिलो सम्मेलन पनि सन् २०१० मा रुसको सेन्ट पिटर्सबर्गमा भएको थियो । उक्त सम्मेलनमा तत्कालिन प्रधानमन्त्री माधवकुमार नेपालसहित वनमन्त्री दीपक बोहरालगायत् सहभागी भएका थिए ।

प्रकाशित : माघ ७, २०७८ ०८:१०
प्रतिक्रिया
पठाउनुहोस्

हुम्लामा ४ महिनापछि चामल ढुवानी

कर्णाली प्रदेशका मुख्यमन्त्री जीवनबहादुर शाहीको निर्देशनपछि जहाज कम्पनीहरूले चामल ढुवानीलाई दिए तीव्रता
जनकबहादुर शाही

हुम्ला — सडक सुविधा नपुगेको हुम्लामा झन्डै ४ महिनापछि खाद्यान्न ढुवानी सुरु भएको छ । टेन्डर प्रक्रियामा ढिलाइ र टेन्डरमा अनियमितता भएको भन्दै अदालतमा मुद्दा परेपछि चालु आर्थिक वर्षका लागि खाद्य व्यवस्था तथा व्यापार कम्पनी लिमिटेडले बल्ल चामल ढुवानी सुरु गरेको हो ।

हुम्लाका लागि चालु आर्थिक वर्षमा २७ हजार ५ सय क्विन्टल चामलको कोटा स्वीकृत भएको छ । यसमा हवाईमार्गबाट १० हजार र स्थलमार्गबाट १७ हजार ५ सय क्विन्टल चामल ढुवानी गर्ने गरी कोटा स्वीकृत भएको छ । कर्णाली प्रदेशका मुख्यमन्त्री जीवनबहादुर शाहीको निर्देशनपछि सबै जहाज कम्पनीले चामल ढुवानीलाई तीव्रता दिएका हुन् । मंगलबार मात्रै १ सय ४२ क्विन्टल चामल ढुवानी भएको खाद्य व्यवस्था तथा व्यापार कम्पनी, हुम्ला शाखाले जनाएको छ ।

अहिलेसम्म १ हजार ३ सय ४२ क्विन्टल चामल हवाई मार्ग र स्थलमार्गबाट १ हजार १ सय ३१ क्विन्टल चामल ढुवानी गरिएको कम्पनीका प्रमुख कृष्णप्रसाद अधिकारीले बताए । चालु आर्थिक वर्षका लागि आएको चामलबाट अहिलेसम्म १२ सय ७३ क्विन्टल चामल वितरण गरिएको कम्पनीले जनाएको छ । कम्पनीका अनुसार गत वर्ष खाद्यमा करिब ३५ सय क्विन्टल चामल मौज्दात थियो ।

चालु आर्थिक वर्षका लागि सदरमुकाम सिमकोटमा हवाई ढुवानीबाट चामल पुर्‍याउने जिम्मा श्रीर्मिका एयर काग्रो सर्भिसले पाएको छ । उसले सीता एयरलाई मात्र ढुवानीको जिम्मा दिँदा कम चामल ढुवानी भएको भन्दै मुख्यमन्त्री शाहीले सबै जहाज प्रयोग गर्न ठेकेदार कम्पनी र कम्पनी लिमिटेडलाई निर्देशन दिएका थिए । तर कम्पनीको हुम्ला शाखाको गोदाममा चामल मौज्दात कम भएपछि शुक्रबारबाट चामल वितरण रोकिएको छ । अहिले कम्पनीको सिमकोट गोदाममा करिब १२ सय क्विन्टल चामल मौज्दात रहेको शाखा प्रमुख अधिकारीले बताए । ‘स्थानीयले कोटाअनुसारकै चामल माग्न थाले,’ उनले भने, ‘कोटाअनुसार चामल दिँदा गोदाम रित्तिने देखियो ।’


कम्पनीले सिमकोट बजारस्थित सिमकोट–५ र ६ का स्थानीयलाई मासिक प्रतिपरिवार ५ किलो र सिमकोट गाउँपालिकाका अरू वडाका बासिन्दालाई ४ किलोका दरले चामल वितरण गर्ने गरेको छ । अन्य गाउँपालिकामा भने मागका आधारमा चामल पठाइने गरिएको अधिकारीले जानकारी दिए । ‘यही रफ्तारमा चामल ढुवानी भए एक साताभित्र फेरि चामल बिक्री सुरु हुन्छ,’ उनले भने, ‘अहिले नियमित दुई जहाजले चामल ढुवानी गरिरहेका छन् ।’

खाद्यले हुम्लामा हवाईमार्गबाट खाद्यान्न ढुवानी गर्न गत साउन १५ मा बोलपत्र आह्वान गरेको थियो । तर प्रतिकिलो ४२ रुपैयाँ महँगोमा ढुवानी गर्न प्रस्ताव गरेको श्रीर्मिका एयर काग्रो सर्भिसलाई ठेक्का दिन कम्पनीले कात्तिक २९ मा सूचना निकालेपछि कानुनविपरीत भन्दै समिट एयर प्रालिका तर्फबाट प्रवीण खरेलले उच्च अदालत पाटनमा मुद्दा दर्ता गराएका थिए ।

अदालतका न्यायाधीशद्वय महेन्द्रनाथ उपाध्याय र नारायणप्रसाद पौडेलको संयुक्त इजलासले मंसिर १४ मा ढुवानी प्रक्रिया नियमसम्मत भएको भन्दै आदेश जारी गरेपछि हुम्लामा खाद्यान्न ढुवानीको बाटो खुलेको हो । श्रीर्मिका कार्गोले नेपालगन्जदेखि हुम्ला सदरमुकाम सिमकोटसम्म भ्याटबाहेक प्रतिकिलो १ सय १२ रुपैयाँ र सुर्खेतबाट सिमकोटसम्म १ सय ५ रुपैयाँमा चामल ढुवानीको कबोल गरेको छ ।

प्रकाशित : माघ ७, २०७८ ०७:५९
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×